"Müdafiələrnin keçirildiyi və alim diplomlarının verildiyi qurumların nəzarətdən kənarda qalması dövlət əhəmiyyətli məsələdir. Diqqət etsəniz, müdafiə şurasının sədri olan əksər universitet rektorları, institut direktorları və prosesin aktiv iştirakçıları olan alim-üləmalar, həmçinin AAK yetkililəri özlərini çox rahat, hətta toxunulmaz hiss edirlər. Niyə? Çünki cəmiyyətimizin hələ də səcdə etdiyi kağız parçası - diplom məhz onların imzası ilə verilir. Həmin kağız parçası rüşvət, möhtəkirlik, Vətən övladlarını aldatmaq, istismar etmək, səhv yönləndirib ciblərinə girmək işinə yarayırsa, fəalkətin ortasındayıq. Bu fəlakəti kim yaradır? Akademşəbəkə..." "DİA-AZ" xəbər verir ki, bunu öz etirazında AMEA Nəsimi adına Dilçilik İnstitutunun Nəzəri dilçilik şöbəsinin müdiri, filologiya üzrə elmlər doktoru İdris Abbasov ifadə edib.
O daha sonra davam edir: "Bəli, çox çəm-xəm edərsən, diplomunu verməzlər, dizin-dizin süründürərlər, çünki bizi içdən yeyən bu müstəqbih ənənənin əsasını özləri qoyublar və gözəl bilirlər ki, diplomları elmə, biliyə, dürürüstlüyə görə çoox nadir hallarda, özü də dava-dalaşla verirlər. Qalan 80-90 faizin işi bəllidir, yəni elmsiz cızma-qaralar.
Elmi mühitdə ləyaqət, mənəviyyat bazarı açanlar gələcəyimizi qaraldaraq dövlətə arxadan zərbə vurub keflərində davam edirlər. Təki bahalı mülkləri, özlərinin, əhli-əyallarının, gül balalarının eyş-işrətləri var olsun!
Dərinliyi qarınları və nəfsləri qədər olan bu nəfsəklərin vəzifə, mənsəb tutmaları milli intihara səbəbdir. Müasir dünyada elm və təhsil bir dövlət üçün rifahın əsası, özülü, bünövrəsi və inkişafın tək rəhnidir.
Mürtəceləşib harınlamış elm və təhsil bosları özlərinin qudurğanlıq meyarına görə tələbəyə, dissertanta, doktoranta, iddiaçıya "Öl!" desələr, ölməli, "Qal!" desələr, qalmalıdır. Bu meyil çox zərərli olub milli maraqlara zidd qruplaşmaların, dəstələrin yaranmasına, yəni içdən aşınmaya ideal örnəkdir. Bilirsiniz, bu, nəyə bənzəyir? Barmağını kəsib isti suyun altına qoymağa. Qan itirdiyini hiss etmədən bir neçə dəqiqədən sonra sakitcə həyatla vidalaşırsan. Elm və təhsil sarıdan bizi beləcə məhv edirlər, səssiz-səmirsiz.
Proses içimizdə baş verdiyi üçün məhz öldürcüdür, çünki içimizdəki diplomzadələrin, bizə vaxtilə dərs deyib "yol" göztərənlərin qəbihliyi adamın ağlına da gəlmir. Amma unutmayın ki, millət balalarına rəhmi gəlmədən soyğunçuluqla, fırıldaqla məşğul olan rüşvətxor alimdən nə desən, gözləmək olar. O, nəinki dədəsini, anasını, övladını, hətta Vətənini və dövlətini də bir göz qırpımında satmağa hazırdır!
Yaxın ayların birində Dilçilik İnstitunda rastlaşdığım bir dissertant nəyisə məndən soruşdu. Onun nə qədər aldadıldığını gördüm, düzgün, qanuni tərəfini ona izah etdim. Ertəsi gün dissertant məni görəndə 10 metr aralı keçdi, bir daha mənə yaxın düşmədi. İşini müsbət həll etmişdilər, amma yaxşıca tənbeh etmişdilər ki, məndən uzaq dursun.
Boslar ona görə arxayıdırlar ki, işləri onlardan keçən yüzlərlə tələbə, magistr, dissertant, doktorant var. Yaratdıqları bu reallığa əmin olan akademik şəbəkə üzvləri arxalarında böyük bir dəstə hiss edirlər...
Bəli, dövlət qurumlarını "zəbt" etmiş bu "beyəmllər" öz xeyirləri, zövqləri üçün təcrübəsiz nəsli beləcə korlayır, xoşbəxtliklərini onların bədbəxtlikləri üzərində qururlar.
Yadınızdadırmi, işçilərindən və tələbə heyətindən özünə basılmaz qala yaratdığını düşünən sabiq rektor Abel Məhərrəmov nə demişdir: Elə etməyin ki, kontigenti qaldırım ayağa.
İndikilər elə demirlər, ancaq elə taktika, elə fənd seçiblər ki, Abel Məhərrəmov bunların yanında yalan olub.
Cəmiyyətimizdə diplomun həqiqi simasını insanlarımıza izah etmək lazımdır.
Diplomdan ötrü hər cür sövdələşməyə getməkdən, mütəşəkkil milli korlama dəstəsinə qoşulmaqdan çəkinin, gələcəyinizi məhv etməyin! Biliyinə, savadına güvənirsənsə, qorxma, sözünü de, mübarizə apar, lap mübarizə yolu ilə kağız parçasını da al və sübut et ki, o, bilik göstəricisi deyil, kağız parçasıdır!
Təəssüf ki, biz əksinə edirik: real biliyi, savadı adiləşdirib, heçləşdirib, kağız parçasına səcdə edirik. Diplomlu kəmsavad, kəmağıl akademikə, professora, doktora inanmaq, hətta onların sərsəmləmələrini, cızma-qaralarını ciddiyə almaq milli geriliyə aparan yoldur. Gördüklərinizdən dərs çıxarmadınızmı?! Kitab yazırlar, plagiat çıxır, tərtibatları, redaktorluqları saxta, rüsvayçılıq şəklində təzahür edir, "işləmələri" nəticəsində olub-qalanımız məhv olur. Belə davam etmək olmaz!
Onu da qeyd edim ki, bəzi universitet rəhbərləri müəllimləri yerli-yersiz alimlik diplomu almağa məcbur edir, əks halda işini itirməsi ilə hədələyirlər. Tam səhv və yanlış addımdır. Təşviş içində olan neçə ilin təcrübəli müəllimləri işdə qalmaq naminə üz tuturlar elm və ali təhsil ocaqlarında zəzərli fəaliyyət göstərən saxta dissertasiya şəbəkələrinə. Ailə büdcələrində olan pulları verib 1-2 ilə tezbazar bir diplom alırlar ki, aldıqları 800-1000 manat maaşı itirməsinlər. Dəhşət deyilsə, bəs nədir?! Bilik artırmaqdırmı? Vətən elminə xidmətdirmi? Əsla! ALi təhsil müəssisələrinin rəhbərləri və digər elm və təhsil şefləri də yaxşı bilirlər ki, bu əməl dövlətə, millətə və gələcəyimizə arxadan vurulan zərbədir. Bilə-bilə bu xain zərbənin endirilməsində fəal iştirak edirlər!.."
