Biləcərinin sabir bələdiyyə sədri İlham Xəlilov əldə etdiyi milyonları Kanadaya köçürüb?
Bu günlərdə LEGİON-da “Akif Çovdarovla İlham Xəlilovu birləşdirən “sauna” məsələsi də varmış?” başlıqlı yazı dərc olunmuşdu. Həmin yazıda bildirilirdi ki, sabiq MTN generalı Akif Çovdarovun məhkəməsində ona qarşı ifadə verən şəxslərin arasında Biləcəri bələdiyyəsinin sabiq sədri İlham Xəlilovun da adı hallanırdı. İ.Xəlilov ifadəsində göstərir ki, 2014-cü ilin sonlarında Çovdarov zəng vuraraq əmr edib ki, Masazırda, “Zəli gölü”nün yaxınlığında 10 hektar torpaq sahəsini Adil Yaqubovun adına sənədləşdirsin. Bunlardan əlavə ondan 120 min də tələb olunduğunu deyən bələdiyyə sədri Çovdarovdan “Sən generalı barmağına dolamısan? Deyəsən məni yaxşı tanımırsan. Səni həbs edərəm, başına torba keçirdib podvala ataram” deyə təhdidlər də eşitdiyini söyləyib.
İstintaqda Biləcəri bələdiyyəsinin sədri ilə Çovdarovu üzləşdiriblər. Bələdiyyə sədri bunları təkrar danışsa da Çovdarov təkzib edib. Çovdarov deyib ki, Biləcəri qəsəbə bələdiyyəsinin sədri işləmiş İlham Xəlilov özü dələduz adamdır: “İlham Xəlilov özü dələduz olduğundan, çox borcu var. Bunun üçün də mənə böhtan atır və aldatdığı şəxslərdən vaxt udub səbəbkar kimi məni göstərir” (musavat.com).
Bu məlumat ictimaiyyətin diqqətini çəkdi və LEGİON da öz növbəsində İlham Xəlilovun keçmişinə işıq salmağı qərara aldı. Biləcəridə İlham Xəlilovu tanıyanlar deyirlər ki, vaxtilə, bu şəxs Akif Çovdarovun adamı kimi tanınırdı, indi onun üzünə durması isə təəccüb doğurur. Belə ki, LEGİON-a daxil olan məlumata görə, İlham Xəlilov vaxtı ilə Bakı Dəmiryolu Vağzalının rəisi işləyən vaxt, bilet kassalarından satılan biletlərin pullarını mənimsədiyinə görə, Ziya Məmmədov tərəfindən işdən qovulmuşdu. LEGİON-a daxil olan məlumata görə, sonradan nəqliyyat nazirinin müavini Musa Pənahov və qayınatası Vaqif Məmmədovun köməyindən yararlanan İ.Xəlilov yenidən Bakı Dəmiryol Sərnişin Stansiyasının rəisi vəzifəsinə gətirilir, amma burda da korrupsioner əməlləriylə “ad çıxararaq”, ölkədən qaçaq düşür.
Daha sonra İ.Xəlilovun qayınatası ilə şərikli “Çinar” restoranını da işlətdiyi, bu restoranda “Makarov” tapanca tapılmasına görə isə 16 il əvvəl qayınatası V.Məmmədovun 3 sutka Nərimanov RPİ-də saxlandığı da deyilir. Sonralar bələdiyyə sədri kimi cəmiyyətin qarşısına çıxan İlham Xəlilovun bu vəzifədə də “dinc durmaması” keçən il vəzifəsindən uzaqlaşdırılması ilə nəticələndi.
Bu məlumatı Biləcəri Bələdiyyəsində də LEGİON-a təsdiqlədilər. Bələdiyyə əməkdaşı Səbinə Məmmədova keçən ildən İlham Xəlilovun bələdiyyə sədrliyindən çıxdığını və görünmədiyini bildirdi. Onu necə tapacağımızı soruşduqda, bələdiyyə əməkdaşı bildirdi ki, “hazırda rəhbər şəxslərdən heç kim yoxdur, sabah zəng edərsiniz, bəlkə, onlar İlham Xəlilovun mobil nömrəsini bilərlər”. Dekabrın 28-də Legion-un redaksiyasına bir qrup Biləcəri sakini Biləcəri qəsəbəsinin keçmiş Bələdiyyə sədri İlham Xəlilov bərədə məlumat göndəriblər.
Məlumatda deyilir ki, İlham Xəlilov uzun illər Biləcəri qəsəbəsinin bələdiyyə sədri olduğu vaxt, bir çox Biləcəri sakinləri ondan hüquq mühafizə orqanlarına şikayətçi olublar. Hətta o, bu şikayətlərdən ehtiyatlanaraq həyat yoldaşı Esmira Xəlilovanı (qızlıq soyadı Məmmədova) Kanadaya göndərib ki, sabahın dar günü üçün, həmin ölkədə şərait qursun. Hətta deyilənlərə görə, onun illər ərzində topladığı milyonlarla ABŞ dolları həcmində sərvəti də beynəlxalq bank köçürmələri yoluyla Kanadada yerləşdirilib.
Digər məlumatda isə bildirilir ki, İlham Xəlilova Musa Pənahov elə Akif Covdarova görə dəmir yolunda “krışalıq” edib. Yəni, əldə etdiyimiz məlumata görə Musa Pənahovla Akif Covdarov “eloğlu” olmaqdan savayı hətta qohumdurlar. Musa Pənahovun oğlunu da vaxtı ilə MTN-ə işə qəbul edən də Akif Çovdarov olub. Hətta Musa Pənahovun oğlu MTN-ə işə qəbul olunandan sonra, xidmətini MTN-nin Nəsimi idarəsində davam etdirib. Akif Çovdarovla Musa Pənahovun qohumluğundan savayı, İlham Xəlilov Musa Pənahovun sürücüsü, Biləcəri qəsəbəsində yaşayan Ramiz Xuzəhmədov ilə də yaxın münasibətlərdə olub. Hətta Akif Çovdarovla Musa Pənahov tərəfindən İlham Xəlilova qarşı gələcəkdə nəsə tədbir görüləcəyi barədə sürücü Ramiz Xuzəhmədov İlham Xəlilova əvvəlcədən məlumat verib. Və Akif Çovdarovla İlham Xəlilovun arasında baş verəcəyi konfliktdən də Ramiz Xuzəhmədov vasitəsi ilə İlham Xəlilov əvvəlcədən xəbər tutub. Əldə etdiyimiz məlumata görə, adi sürücü Ramiz Xuzəhmədov iri məmurlarla bələdiyyə sədrinin arasında “körpü” rolu oynadığı üçün, elə İlham Xəlilov tərəfindən hektarlalrla torpaq sahələri ona hədiyyə olunub. Əldə etdiyimiz məlumata görə, İlham Xəlilovun qayınanası Donara Məmmədova ilə sürücü Ramiz Xuzəhmədovun yaxın qohumluq əlaqələri var. Çox güman ki, bu qohumluğu İlham Xəlilov və sürücü Ramiz Xuzəhmədov Musa Pənahovla Akif Çovdarovdan gizli saxlamağa müvəffəq olublar ki, öz planlarını həyata keçirsinlər. Məsələyə Nəqliyyat Nazirliyinin mətbuat katibi Namiq Həsənovun münasibətini öyrənmək üçün ona dəfələrlə zəng etsək də cəhdlərimiz uğursuz oldu.
Qarşı tərəfin də mövqeyini dərc etməyə çalışacağıq.
Araşdırmamız davam edir, bizi izləyin...
