Müğənni Akif İslamzadə Moderator.az-ın suallarını cavablandırıb.
- Akif bəy, öncə sizi salamlayıram. Necəsiz?
- Şükür Allaha, pis deyiləm. Sadəcə olaraq bir az peyvənd olunmuşam, halım yoxdur. Ayaqlarım ağrıyır, deyirlər ki, belə olmalıdır.
- Könüllü şəkildə peyvənd etdirdiz?
- Bəli, könüllü peyvənd olundum. Bu birincisidir, ikincisini də etdirəcəm. Peyvənd olunmaq hər kəsin öz şəxsi istəyi, seçimidir. Deyərsən ki, etdirmə sonra ziyan olar, deyərlər ki, sən dedin mən də etdirmədim. Yaxud da əksinə.
- Özünüzü koronovirusdan necə qoruyursunuz?
- Camaat necə mən də elə. Maska taxdım, canlı təması azaltdım.
- Bir neçə gün öncə ananız, dəyərli sənətkarımız Sara Qədimovanın doğum günü idi. Ruhu şad olsun!
- May ayının 12-də dünyasını dəyişdiyi gündür, gedib ziyarət etmişdim. May ayının 31-də isə doğum günü idi. Hər il bayram və özəl günlərdə Sara xanımın məzarını ziyarət edirəm.
- Maraqlıdır, Sara xanım doğum günlərini necə qeyd edirdi?
- Doğum günlərini hər zaman evdə yaxın ailə üzvləri, sənət yoldaşları ilə birgə qeyd edərdi. Şövkət xanım, Xan əmini hər zaman evimizdə görmüşəm.
- Həqiqətən də sizin estrada sənətimizdə xüsusi yeriniz var. Uşaqdan-böyüyə hamı tərəfindən böyük hörmətlə qarşılanırsız. Yəqin ki, bu hörməti qazanmaq, qoruyub saxlamaq asan deyil.
- Əlbəttə ki, asan deyil. Birinci növbədə insan gərək özü-özünə hörmət etsin, başqasında səhv axtarmasın, rişxənd etməsin. İnsanın səhvi olar, nəyisə düz etməz, bunu ona deməyin də yolu var. Heç kəsə sataşmaq olmaz ki, sənin keçmişin belə olub, peraşki satan olmusan, restoranda ofisiant olmusan. Ev yıxmaq, ədəbsizlik, əxlaqsızlıq qəbul olunmazdır, amma yük daşımaq, fəhləlik etmək, çörək pulu qazanmaq, peraşki satmaq ayıb deyil. Kiminin axırı, kiminin əvvəli.
- Sizin sənətə gəldiyiniz ilk illərlə bu günü müqayisə etsək çox böyük fərqin olduğunu görmüş olarıq. Dediyiniz bu hallarla o vaxtlar sizdə üzləşmisiz?
- Əlbəttə, bu cür tənqidlər hər zaman olub, olacaq da. Şəhər sakinlərinin sayı 5 dəfə artıb, demək ki, hər şey artıb. Təhsil sistemimiz pis gündədir. Qərb təhsil sistemidir, ruslara keçib, ruslardan da bizə. Bu təhsil sistemi kökündən dəyişilməlidir, biz sonuncu Qarabağ savaşında müharibəni yox, döyüşü qazandıq. Müharibə hələ qabaqdadır.
- Yəqin ki, son günlər ermənilərin törətdiyi təxribatlardan da xəbərdarsız.
- Yenə də deyirəm, müharibəni qazanmaq üçün təhsil sistemi dəyişilməlidir. Bu günlərdə biri qabağımı kəsdirib dedi ki, biz həqiqətənmi qorxaq millətik? Dedim ki, yox qorxaq deyil, yaltaq millətik. Tankın üstünə ayağı yalın gedən insanları görmüşəm. Yadımızdan çıxarmayaq ki, əsr yarımdan artıq bir dövrdə biz müstəmləkə altında olmuşuq. Hələ o müstəmləkə zəncirini axıra qədər qıra bilməmişik.
- Hansı illərin həsrətini çəkirsiz?
- Öncə onu deyim ki, mən nostalji hisssləri sevmirəm. Elə adam deyiləm ki, deyim ki, ətəyimdə namaz qılmaq olar. Mənim bəndə qarşısında günahım yoxdur, amma səhv hərəkətim olub.
- Hansı hərəkətdir?
- Bu bəndə ilə Allah arasında olan bir haldır.
- Sənət yoldaşlarınızdan kimlərlə əlaqələriniz var?
- Eyyub Yaqubov, İlqar Muradov, Faytonçu Nazim, Rüstəm və bir çoxu ilə telefon vasitəsilə əlaqə saxlayıram.
- Gənclərə, bu yolda addımlayan sənətçilərə tövsiyyəniz nə ola bilər?
- Özlərini axtarıb tapmaq üçün bir şeyi dərk etməlidirlər ki, siz fərdsiniz. Öyrətmək, öyrənmək mütləqdir. Biz özümüz bizdən əvvəl yetişən sənətkarlara baxıb öyrənmişik. Çalışmışıq ki, onların təsiri altına düşməyək. Sənətçilər var ki, təsir altına düşürlər, sonra çıxa bilmirlər. Hər kəs öz yolunu axtarıb tapmalıdır. Bunun üçün Allah sənə şüur verib.
- Nədənsə sizi işğaldan azad edilmiş torpaqlarda görmədik. Dəvət gəlmişdi, getmədiz yoxsa?
“- Xeyr, sözün düzü təklif gəlməyib. Bu sualı o torpaqlara sənətçilərin gedişini təmin edən təşkilatçılara ünvanlayın. O münsiflər heyətində Akif İslamzadədən məqamına, dərəcəsinə görə yüksək adam varsa onda o başqa məsələdir. Birini üzə çıxarıb göstərsinlər. 35 ildir mən oxumuram. Amma oxuduqlarım da qızıl arxivdədir. İnanmırlarsa gedib arxivlərə baxsınlar ki, Akif İslamzadəyə qədər o nüanslar, intonasiyalar olub, ya yox? Azərbaycan incəsənətində hamının haqqı pozulub, amma musiqiçilər qədər olmayıb. Onların əsas qazancı toylar, banketlərdir, amma indi o yoxdur. Musiqiçilər qızıl barmaqları ilə sənətlə məşğul olmaq yerinə başqa iş görürlər. Mənim qızıl fondda səs yazılarım var, çıxış etmişəm, bir qəpik pul da almamışam.
“
“- İslam da efirlərdən qonorar istəmişdi, amma ona qarşı da münasibət birmənalı olmadı.
“
“- Televiziya işçiləri, sədr başda olmaqla maaş alırsa efirə gələn müğənni də qonorar almalıdır. Biz efirə, radioya gedirik, amma pul almırıq. Bir sənəd çıxarsınlar ortalığa ki, nə vaxtsa mənə bir qəpik veriblər. Olmayıb belə bir hal.
