Naxçıvan şəhərinin daxilində sərnişin daşımasının əksəriyyətini hələ də istismar müddəti bitmiş PAZ və digər sovet istehsalı avtobuslar həyata keçirir. Yerdə qalan kiçik hissəni isə, keyfiyyəti və komfort sarıdan PAZ-lardan geri qalmayan Çin istehsalı elektroavtobusları təmin edir.

Sərnişinlər qışın soyuğunda, yayın istisində kondisioneri olmayan, bəzən döşəməsi və tavanı çürümüş bu avtobuslardan istifadə etməli olurlar.

Sərnişinlər bildirirlər ki, problemlə bağlı şəhər icra hakimiyyətinə və digər aidiyyati qurumlara dəfələrlə müraciət etsələr də nəticəsi olmayıb:

“Lazım olanda marşurutun qiymətini tez qaldırırlar. Lakin, yeni, keyfiyyətli avtobus almağa gələndə deyirlər, maliyyə yoxdur. İstismara yarasız avtobuslar şəhərin kəndlərinə gedib-gələrkən çox zaman xarab olub, yolda qalır. 3-4-il əvvəl bir neçə Çin istehsalı olan yeni elektobuslar gətirdilər ki, onlar da elə, PAZ-ların tayıdır. Yayın istisində toz-torpaqdan, iydən baş çatlayır. Çünki avtobuslarda havalandırma yoxdur. Koninsonerlər işləmir, və ya qoşulmur. Köhnə avtobuslarda oturacaqlar dağılıb, qapılar, pəncərələr normal bağlanmır, elektrpbuslarda isə oturacaqlar plastikdir, xəstəlik törədirlər.”

Sürücülər də avtobusların yararsız və keyfiyyətsiz olmasından şikayət edirlər. Adının çəkilməsini istəməyən sürücülərdən biri deyir ki, bu azmış kimi, tavtobusların əmir xərclərini də öz hesablarına qarşılamalı olurlar:

“Yanacağı, avtomobilin hissələrini özümüz almalıyıq. Ötən il də planı 2-dəfə qaldırdılar. Marşurutdan asılı olaraq 80-100 manat plan veririk. Çörək pulumuzu ancaq çıxara bilirik. Bu səbəbdən avtobuslara vaxtında və yaxşı xidmət edə bilmirik. Texniki baxışdan da pul verib keçirik, nasaz olanda belə qarajda pul verib marşuruta çıxırıq. Amma gücümüz çatan qədər öz hesabımıza avtobus və mikroavtobusları saz saxlamağa çalışırıq. Çox zaman təmir etdirib, borclu qalırıq. Nə bizi, nə də sərnişinləri fikirləşən yoxdur. Əsas çalışdığımız odur ki, planı dolduraq və özümüzə də çörək pulu qalsın. Biz də istərdik ki, ictimai nəqliyyat yenilənsin, kamfort olsun, müştəri məmnun qalsın.”

Naxçıvan şəhərində sərnişindaşıma xidmətini 9 marşrut xətti üzrə 70-ə yaxın avtobus həyata keçirir.