Mədəniyyət və Turizm Nazirliyinin Göygöl rayon Mədəniyyət və Turizm Şöbəsinin müdiri Şərqiyyə Hümbətovanın fəaliyyətindəki qanun pozuntuları ilə bağlı son vaxtlar müxtəlif səpkili məlumatlar yayılmaqdadır. Artıq bir neçə müddətdir mətbuatda çıxış edən şöbənin sabiq əməkdaşı Şahin Məmmədov şöbə müdirinin qanunsuz əməllərinin üstünü açıb. Qeyd edək ki, adıçəkilən xanım məmurun fəaliyyətindəki çatışmazlıqlarla bağlı qəzetimizin ötən saylarında yazılar dərc olunub.
Və bu yazılardan sonra Maliyyə Nazirliyinin yetkililəri Göygöl rayon Mədəniyyət və Turizm Şöbəsində yoxlamalara başlayıblar. Redaksiyamıza şikayət ərizəsi ilə müraciət edən Şahin Məmmədov Şərqiyyə Hümbətovanın onu nəyə görə işdən uzaqlaşdırmasının detallarını açıqladı: "Mən 1984-cü ildə Göygöl rayon Üçtəpə kəndində anadan olmuşam. Hal-hazırda həmin ünvanda yaşayıram. Atam birinci qrup əlildir. Ali təhsilimi fərqlənmə diplomu ilə başa vurmuşam. Hərbi xidmətdə ön xətdə zabit kimi qulluq etmişəm. 2003-cü ildən Yeni Azərbaycan Partiyasının üzvüyəm. 07 oktyabr 2011-ci il tarixdən Göygöl rayon Mədəniyyət və Turizm şöbəsində məsləhətçi vəzifəsində işləyirəm. İşə Dövlət Qulluğu Məsələləri Komissiyasının təşkil etdiyi imtahanın müsabiqə və müsahibə mərhələlərini keçərək qəbul edilmişəm. Kiçik dövlət qulluqçusuyam. Dövlət qulluğu keçdiyim müddət ərzində heç vaxt barəmdə hər hansı intizam tənbeh tədbiri tətbiq edilməyib. Göygöl rayon Gənclər və İdman idarəsi tərəfindən rayonda gənclər siyasətinin həyata keçirilməsində fəal iştirak etdiyimə görə, Fəxri Fərmana layiq görülmüşəm. Cənab prezidentin korrupsiyaya qarşı apardığı qətiyyətli mövqeni daim dəstəkləmişəm. Hər zaman rüşvətxorluğa, korrupsiyaya, dövlət büdcəsinin talanmasına qarşı olmuşam və bundan sonra da olacağam. "Korrupsiyaya qarşı mübarizə bizim prioritetimizdir. Hesab edirəm ki, Azərbaycanın bu sahədə nadir təcrübəsi vardır. Əfsuslar ki, bütün keçmiş sovet respublikalarında eyni problem yaşanır. Korrupsiya mirası ölkəmizin uğurlu inkişafına ciddi zərbə vurur. Biz Azərbaycanda bir çox tədbirlər görürük, o cümlədən inzibati və təsisat islahatlarını həyata keçiririk ki, korrupsiyaya qarşı uğurla mübarizə aparaq. Onlardan biri bu yaxınlarda dövlət xidmətləri proqramının qəbul edilməsi oldu. O, il yarımdır ki, icra edilir və artıq iki milyona yaxın insan bu dövlət xidmətləri mərkəzlərinə müraciət edib və lazımi sənədləri alıb. Bu, Azərbaycanda korrupsiyanın azaldılmasına böyük təsir göstərdi". Bu sözləri prezident İlham Əliyev söyləyib. Mən də bir vətəndaş kimi ölkə rəhbərinin bu sahədə apardığı siyasəti dəstəkləyirəm. Göygöl rayon Mədəniyyət və Turizm Şöbəsinin müdiri xanım Şərqiyyə Hümbətova mən işlədiyim müddət ərzində daim korrupsiya əməlləri ilə məşğul olub. Belə ki, şöbəyə alınan inventar və avadanlıqlar, dəftərxana ləvazimatları, şöbə üçün görülməli olan işlərin dəyəri, təmir-tikinti işləri üçün ayrılan vəsait dəfələrlə artıq qiymətə sənədləşdirilir. Məsələn, kompyuter dəsti "Casper"in satış qiyməti 400-500 manat olduğu halda 1380 manata, kompyuter dəsti "LC" satış qiyməti 400-500 manat olduğu halda 1320 manata, Notebook "Casper" satış qiyməti 500-600 manat olduğu halda 1246 manata, dinakort satış qiyməti 1800-2000 manat olduğu halda 4066 manata, stulun satış qiyməti 30 manat olduğu halda 56 manata, şkaf 150-180 manat olduğu halda 400-450 manata, tozsoran 130-150 manat olduğu halda 256 manata, telefon aparatı 8-10 manat olduğu halda 25-30 manata, xətkeşin satış qiyməti 0.10 manat olduğu halda 0.40 manata, pozan 0.10 manat olduğu halda 0.40 manata, süpurgə 2 manat olduğu halda 4 manata sənədləşdirilib. Alınan inventar və avadanlıqların onlarla, yüzlərlə olduğunu nəzərə alsaq, mənimsənilmiş vəsaitin nə qədər çox olduğunu yəqin etmək olar. Məzuniyyətdə olduğum müddətdə Şərqiyyə xanım məni çağırdı ki, qanvermə aksiyası keçiriləcək, gəl sən də iştirak elə. Qanvermə aksiyasında iştirak edəndən sonra şöbə müdiri bəzi sənədlərə imza atmalı olduğumu bildirdi. Həmin sənədlərlə tanışolanda gördüm ki, Şərqiyyə xanım qiymətləri süni şəkildə şişirtməklə mənimsəmə hallarına yol vermək istəyir. Mən buna etirazımı bildirdim və sənədlərə qol çəkmədim. Bundan sonra şöbə müdiri mənə heç bir iş tapşırmadı. Demək olar ki, iki ay ondan heç bir tapşırıq almadan işlədim. Bütün bunlarla bağlı aidiyyəti orqanlara müraciət etməyimə baxmayaraq, mənə bütün bu qiymətlər "Dövlət satınalmaları haqqında qanun"la tənzimlənən qiymətlərdir deyirlər. Mən anlaya bilmirəm ki, məqsədi dövlət büdcəsindən ayrılan vəsaitlərin qənaətlə istifadəsini təmin edən bir qanun və ya qurum dövlət büdcəsinin vəsaitinin belə bədxərcliklə xərclənməsinə icazə versin. Necə ola bilər ki, bir inventar dəyərinin 3-5 qat artıq qiyməti ilə alınsın və bu, qanunla tənzimlənsin. Üstəlik, bütün alqı-satqı əməliyyatları pul ələ dəymədən həyata keçirilməli olduğu halda xanım Şərqiyyə Hümbətova Gəncə şəhərindən həmin məhsulları nağd pulla gedib alıb gəlir. Mən bu qiymətlərin niyə bu qədər artıq yazıldığını Şərqiyyə xanımdan şoruşanda o həmişə mənə deyərdi ki, "Hərənin öz faizi var". Mədəniyyət obyektlərinin xalçalarının, pərdələrinin yuyulması, eləcə də vaxtaşırı elektrik naqillərinin dəyişdirilməsi üçün "Ədirəf" MMC və "Zaur" MMC kimi şirkətlərlə müqavilələr imzalanır, onların hesabına pul köçürülür. Əslində isə, heç vaxt həmin işlər görülməyib". Şöbənin keçmiş işçisi deyir ki, Şərqiyyə Hümbətova hər ay 8-10 nəfər mədəniyyət işçisini guya Bakı şəhərinə göndərir və onlar üçün ezamiyyət vərəqələri yazır: "Halbuki həmin işçilərdən heç biri Göygöl rayonunu tərk etmir, hər birinə üç günlük ezamiyyət pulu yazılır və daha sonra həmin pullar həmin şəxslərdən Şərqiyyə Hümbətova tərəfindən yığılır. Bunu sübut etməyin ən asan yolu həmin ezamiyyətə "gedənlərin" gediş-gəliş biletlərinin həmin tarixə uyğunluğunun və onların Bakı şəhərində harada "qaldıqlarını" yoxlamaqdan keçir. Şöbənin baş mühasibi Mübariz Əliyev işlədiyim müddət ərzində bir dəfə də olsun Bakı şəhərinə getmədiyi halda dəfələrlə ezamiyyətə getmiş kimi ezamiyyət pulu alırdı". Şahin Məmmədov Şərqiyyə Hümbətovanın qanuna sığmayan digər əməllərini də açıqladı. Yazının davamını gələn sayımızda oxuya biləcəksiniz. İnanmaq istərdik ki, Mədəniyyət və Turizm Nazirliyinin, Hesablama Palatasının, Korrupsiyaya Qarşı Mübarizə İdarəsinin və Maliyyə Nazirliyinin rəhbərliyi Şərqiyyə Hümbətovanın fəaliyyətini ən incə məqamlarına kimi yoxlayıb korrupsiyaya qarşı barışmaz mövqe tutan Şahin Məmmədovun şikayətinə lazımi səviyyədə baxacaqlar. Hər şeydən əvvəl isə mədəniyyət və turizm naziri cənab Əbülfəs Qarayev özü şəxsən Şərqiyyə xanımın fəaliyyətinə nəzarəti gücləndirməlidir.
Qarşı tərəfin də dinləməyə hazırıq.
