Bəs bu hünər yoxdursa, hansı hökmdən danışmaq olar?! Hünərsiz hökmlərin bolluğunda isə qardaşlıqdan necə dəm vurasan?! Xülasə...Balaca məmurların özbaşınalığından böyüklərə yazdıqlarımın baxılması üçün elə balacaların özünə də qaytarıldığını gördükdə sarsıldım.Doğrudanmı biz hələ 16-cı əsrdəyik?! Axı güclü idarəçilik ənənələrimiz olub! Elə indi də ASAN XİDMƏT-imiz dünyaya nümunədir. Bəs mənim haqq işim niyə ÇƏTİNƏ düşüb?” Axı mən də müsəlmanam, cənablar!” - deyib haray salsam da, səsimə səs vermədilər. Üz tutdum məhkəmələrə.
Deyim ki, iddiama üç instansiyada- mülki, inzibati-iqtisadi və bir apellyasiya məhkəməsində baxılıb. Hər üç məhkəmədə traktorla 30-a yaxın meyvə ağacını məhv edən, xəbər vermədən ev, hasar dağıdan, saxta sərəncamla istifadəmdə olan torpaqda tikinti aparmağa şərait yaradanlar qaldı bir kənarda. Əvəzində məni çəkdilər məhşər ayağına; niyə torpağı zəbt etmisən? Niyə tikinti aparıbsan? Bələdiyyə niyə səninlə icarə müqaviləsi bağlayıb? Evinin qalan hissəsini də söksələr, nə edərsən? Və sair... Sonuncu sualın müəllifi Bakı şəhər 2 saylı inzibati-iqtisadi məhkəməsinin hakimi Xaliq İmanov yalançılıqda bütün rekordları təzələdi. Guya iddia əri- zəmdə göstərdiyim sənədlər təqdim olunmayıb,ev də sökülməyib, hasar da uçurulmayıb. İcranın saxta sərəncamı, sındırlmış ağaclar barədə ağzına su alan hakimin gözünə nə vaxtsa sökülüb “təmizlənmiş” metal tor hasar göründü.
Kəşf etdi ki,ərazidə “ yol genişlənməsi” baş verdiyindən “obyektlər geri çəkilib”... Bəh , bəh,bəh! Eynilə Sabunçu İcra Hakimiyyəti başçısının müavini Güloğlan Məmmədovun ağ yalanları möhtərəm hakim Xaliq İmanovun ifadəsində!!!
Sabunçu rayon məhkəməsində isə, bələdiyyə qarşısında 1980-ci ildən istifadəmdə olan 250 kv.m. məlum torpaq sahəsinin mülkiyyətimə verilməsi üçün iddia qaldırdım. Gülünc vəziyyət yarandı. Başladılar fal açmağa ki, torpaq bələdiyyənin mülkiyyətindədir, yoxsa dövlətin? Bu yerdə icranın vəkili özündən çıxdı, nə çıxdı... Torpaq Məcəlləsinin 47-ci və bir yığın maddələri qatıb qarışdırdı. Mən isə Mülki Məcəllənin 178.6 maddəsini qalxan edib 30 ildən artıq etirazsız istifadəmdə olan torpağın mənə də verilməsini əsaslandırdım. Hüquq cəngavərləri artıq xorla düşdülər üstümə ki,sən çox incəliyi başa düşmürsən. Bu qanun 2000-ci ildən qüvvəyə minib, yəni hələ 15 il də gözləməlisən. Sakitcə məsləhət gördüm ki,gedin Konstitusiya Qanununun 149.7 maddəsini oxuyun. Bakıxanov bələdiyyəsinin vəkili isə əl atmadığı yalan qalmadı. 2005-ci ildən bəri yuxarı təşkilatlara torpağın mənə verilməsi üçün məktublar yazan bu idarə 2008-ci ildən tikdiyim tikili barədə mənimlə icarə müqaviləsi də bağlayıb, vergiyə də cəlb edilmişəm, 10m.80qəp. 21.06 2011-ci ildən isə qəsəbədə yaradılan qeyri-qanuni tikililərin qeydə alma komissiyasına ərizə ilə müraciət etmişəm. Məhz bu bələdiyyənin verdiyi eskiz əsasında elə o vaxtdan torpaq (ildə 37m.50 qəp.) və əmlak (ildə 6m.) v e r g i l ə r i n i ödəməkdəyəm. 2009-cü ildən 2014-cü ilədək olan müraciətlərimə eyni cavab verilib: “torpaq sahələrinin xəritəsi hazır olan kimi ərizənə baxılacaq.” Elə bu bəhanə ilə də məhkəmənin iclasları aydan aya keçirilərək proses 8 ay uzadılıb. 01.05.2015-ci il tarixdən(bu haqda məhkəmədə vəsatət qaldırmağıma baxmayaraq) İcra hakimiyyəti SAXTA sərəncamla Anar Bağırov adlı şəxsin qalan ağacları da məhv edib sahəmdə kafe tikməsinə şərait yaratmış, bələdiyyə də buna göz yummuşdur. Əmlak komitəsindən aldığım arayış gözlənilməz oldu: “Torpaq bələdiyyəyə məxsusdur”. Əslində buna şübhəm də yox idi. Bu zaman başqa əmma tapdılar: “Ümumi istifadədə olan torpaqdır, mülkiyyətə vermək olmaz”. Nəhayət , mənim də vəkilim dilə gəldi ki, bu torpaq qeyri-qanuni zəbt olunan torpaqdir. Bura ancaq “Bələdiyyə torpaqlarının idarə edilməsinə dair qanunun 16.3 bəndi şamil edilməlidir. Qanunda isə yazılıb ki, tikinti məqsədilə zəbt olunmuş qeyri-qanuni istifadədə olan bələdiyyə torpaqları bu qanun qüvvəyə minənədək, yəni 12.12.2008-ci il tarixinədək ya geri alınmalı, ya da istifadəçinin mülkiyyətinə verilib, vergiyə cəlb olunmalıdır. Bakıxanov Bələdiyyəsi isə 2008 və 2011-ci illərdən iddiaçını vergiyə cəlb etsə də, torpağı mülkiyyətinə verməmiş, Anar Bağırov kimilərə satmaq üçün süründürməçiliyə yol vermişdir. Məsələ burada da bitməli idi. Nədənsə bələdiyyədən torpağın ümumi istifadədə olması barədə sənəd tələb edildi. Üç gün sonraya təyin ediilən iclasda da tələb olunan sənəd təqdim olunmadı. Əsl möcüzə bundan sonra baş verdi. “Müşavirə” otağına getməklə qayıtmağı bir olan hakim axır ki, qətnaməni oxudu: “...torpaq ümumi istifadədə olduğu üçün tələb təmin edilməsin...” Elə buna da bəh, bəh, bəh...
Bələdiyyə sədrinin dedikləri hakim Elşən Kazımovun ifasında!
İnzibati-iqtisadi məhkəmənin çıxardığı qərardaddan apellyasiya şikayətimə “baxış”uzun çəkmədi. Hakimin əsaslandığı yalan faktları dəlillərlə ifşa edib çıxışımı yazılı şəkildə, yeni faktlarla hakim Valeh Ağayevə təqdim etdim.Yenə nədənsə cavabdeh tərəf gəlmədiyindən bələdiyyə nümayəndəsindən soruşdular ki,niyə vergi alırsınız. (heç işə dəxli var?) O da növbəti yalana imza atdı: “banka ödəyib poçtla göndərirlər.Dedilər,siz də poçtla geri qaytarın”. Nümayəndə yenə qızara-qızara susdu.”Məhkəmə iclası” burada da bitdi. Hakimlər “müşavirəyə” girib çıxdılar: “iddia təmin edilməsin”. Yenə də bəh,bəh,bəh...
Qarşıda hələ Ali məhkəmələr var. Hələ çox “bəh, bəh”lər olacaq.Avropa məhkəmələrinə yol axtarıram. Ancaq qorxuram ki, bu məmur tayfası Şəhrəbanu xanımdan da zirək tərpənib təkcə Avropa məhkəməsi yerləşən Parisi yox, bütün Avropanı partladalar. Onda bəs özümüzü kimlərə oxşadarıq? Hara şikayət edərik? Düşünürəm, elə Afrikaya müraciət etsəm, yaxşı olar,axı orada da cəngəllik qanunları hökm sürən cəngəlliklər az deyil...Hər halda onların təcrübəsi Avropadakından da çox olar!
Hörmətlə; Sərraf Əsəd Muğanlı
Redaksiyadan: Bu maraqlı yazı bir daha göstərir ki, yerində olmayan bəzi kiçik məmurlar, şahı qanun hesab edən bəzi hakimlər vətəndaşları qəsdən dövlətdən narazı salmaqda maraqlıdırlar. Vətəndaşları haqsız incidən, onları qəsdən dölətdən narazı salan MTN generallarının aqibəti Prezident cənab İlham Əliyevin qətiyyəti nəticəsində hamıya məlumdur. Bu baxımdan inanırıq ki, oktyabrın 28-də Ali Məhkəmədə olacaq prosesdə hakim Zakir Quliyev, noyabrın 6-da Apellyasiya məhkəməsində keçiriləcək prosesdə hakim Toğrul Əliyev obyektiv qərar çıxarmaqla ədalətin bərpasına nail olacaqlar və bununla da vətəndaşın dövlətdən narazı salınmasına son qoyulacaq.\\tezadlar.az\\
Mövzunu diqqətdə saxlayacağıq.
