Son illər ölkəmizin bank sektorunda müştərilərin sayı gündən-günə artsa da, yaşanan problemlərin də sayı durmadan artmaqda davam edir. Buna səbəb, təkcə banklardan verilən kreditlərin faiz göstəricilərinin yüksək olması deyil, həm də bank əməkdaşlarının qol qoyduqları maxinasiyalar da, çoxsaylı problemlərin əmələ gəlməsinə səbəb olan amillərdən biridir. Bu gün belə bir problemlərdən biri haqda danışmağa çalışacağıq. Belə ki, 2008-ci ildə “Rabitə Bank”ın Yasamal filialında çalışan əməkdaşlar, Qəşədərova Almara Oruc qızının başına elə bir müsibətlər açıblar ki, o, bu gün də küçələrdə qalmaqdadır. Üz-üzə qaldığı problemlə bağlı nə qədər qapıları döysə də, vəzifə sahiblərinə sayı-hesabı bilinməyən müraciətlər ünvanlasa da, hələ ki, onun dərdinə əlac edən bir kimsə tapılmayıb.
Bir faktı da qeyd edək ki, hələ qəzetimizin ötən saylarının birində “Rabitə Bank” əməkdaşlarının qol qoyduqları başqa bir maxinasiyalardan da bəhs etmişdik. Düzdür, dərc etdiyimiz açıqlama birbaşa Almara Qəşədərovaya aid olmasa da, o məqaləni oxuduqdan sonra “Gündəm Xəbər” qəzetinin redaksiyasına üz tutmaq haqda qərarını verir. Və o, çox keçmir ki, redaksiyamıza təşrif buyurub, üz-üzə qaldığı maxinasiyaları açıq-aydın şəkildə əməkdaşımıza danışır və “Gündəm Xəbər” qəzetinin redaksiyasına yazılı ərizəsini də təqdim edir. O, redaksiyamıza təqdim ərizəsində bildirir ki, “2008-ci ildə “Rabitə Bank”ın Yasamal filialında Sumqayıt şəhər sakini, hal-hazırda CM-nin 178.3.2 və 320.1-ci maddələri ilə axtarışda olan və əslən Şəmkir rayonundan olan Abdullayev Şəlalə Yaqub qızı ilə bank arasında kredit müqaviləsi bağlanır. Müqavilə şərtinə əsasən, ona 22% olmaqla 24 ay müddətinə 30 min manat kreditə pul verilir. Abdullayeva Şəlalə Yaqub qızı Yasamal filialının o zamankı müdiri Əliyev Şəmsəddin Camalxan oğlu, bankın sabiq əməkdaşları Azad, Azər və Məhərrəm adlı şəxslərlə cinayət əlaqəsinə girərək, kredit müqaviləsi üzrə öhdəliyin təminatını, mülkiyyətimdə olan Sumqayıt şəhəri 4-cü məhəllə ev-18/15 mən-8 ipoteka yüklü edərək mənzilimə yönəldirlər. İmzalanmış müqavilə sənədləri Bakı şəhəri 32 saylı notariat kontorunun notariusu vəzifəsini daşımış Mirzəyev Ziyafət Sabir oğlu tərəfindən də təsdiq olunur. Onu da qeyd edim ki, istər 30 min manat kredit pulun “Rabitə Bank”dan götürülməsində, istərsə də müqavilə sənədlərinin notariat kontorunda təsdiqləməsində iştirakım olmayıb. Yəni, baş verənlər mənim iştirakım və xəbərim olmadan həyata keçirilib ki, bu da birbaşa cinayət əməlinin törədildiyini göstərir. Belə bir addımlarının nəticəsidir ki, Ziyafət Mirzəyev qol qoyduğu çoxsaylı qanunsuzluq əməlləri ilə bağlı, hələ bir neçə il bundan əvvəl məsuliyyətə də cəlb olunur. Üz-üzə qaldığım problemin varlığı ilə bağlı, dəfələrlə hüquq-mühafizə orqanlarına müraciətlər etsəm də, çox təəssüflər olsun ki, bu günədək heç bir nəticə olmayıb. Baxmayaraq ki, Səlalə Abdullayevaya Azərbaycan Respublikası CM-nin 178.3.2 və 320.1-ci maddələri ilə cinayət isi açılmıs və 69598 saylı cinayət isində zərərçəkmis kimi mən tanınmışam. Cavabdeh Şəlalə Abdullayeva bankdan göturdüyü pulları, yəni 30000 manatı bankın isçiləri il ələ keçirmiş və öhdəliyini yerinə yetirə bilmədiyi üçün, borc mənim yasadıgım mənzilə yönəldilmişdir.
Elə ki, bankla Şəlalə Abdullayeva arasında ciddi problem yaranır, yəni o, heç bir halda krediti ödəyə bilmir, çox keçmir ki, iş məhkəmə müstəvisinə də çıxarılır. Nəticə o oldu ki, 2/105/53/2011 saylı icra vərəqəsi icraya yönəldildi və 07 noyabr 2012-ci il tarixdə anam və iki azyaşlı uşagımla birlikdə, həmin mənzildən zorla, döyulə-döyulə bayıra cıxarıldıq. Təəssüf doğuran hal odur ki, mülkiyyətimdə olan mənzil 40 min manata qiymətləndirilərək “Respublika Xammal və Əmtəə BirjasI Kulək” MMC tərəfindən, heç bir halda xəbərim olmadan acıq hərraca çıxarılaraq satılır. İlk əvvəl mənzilimi “Rabitə Bank” ASC-i almiş və adıma olan mülkiyyət hüququm da müdaxilə etmişdir. DƏDRX-i Sumqayıt Ərazi İdarəsi isə, “Rabitə Bank” ASC-nin mülkiyyət hüququnu 03 avqust 2012-ci il tarixdə qeydiyyata alır və dövlət reystrindən banka çıxarış da təqdim edir. Onu da bildirirəm ki, 28 min manat borc ola-ola evimi bank əvvəlcə öz işçisinin adına, sonra isə Məmmədova Nailə Rüstəm qızı adlı bir şəxsə 43 min manata satır. Atılmış addımdan da acıq-askar görünür ki, bank mülkiyyətimə bilərəkdən qəsd etmiş və bununla da mülkiyyət hüququmu pozmuşdur. Ötən illər ərzində müraciət etmədiyim, şikayət məktubları ünvanlamadığım bir kimsə də qalmayıb.
Bu gün iki azyaşlı övladımla, yetmiş yaşlı xəstə anamla qohumların evində qalırıq. Onu da qeyd edim ki, iki dəfə Bas Prokuror cənab Zakir Qaralovun qəbulunda olmuşam. Amma, verilən vədlər üzləşdiyim problemin həllinə heç bir halda təsir etməyib. Ötən illər ərzində ölkə rəhbəri İlham Əliyev cənablarına, Heydər Əliyev Fondunun prezidenti Mehriban xanım Əliyevaya yazdıgım ərizə ve teleqramların da, bu günədək heç bir nəticəsi olmayıb. Çox güman ki, ünvanladığım məktub və teleqramlar ünvanı üzrə çatdırılmır. Dəfələrlə Yasamal rayon Prokurorluğuna da müraciətlər etmişəm və şəxsən rayon prokurorunun qəbulunda da olmuşam. Bu gün də adları çəkilən şəxslər Azad, Azər, Məhərrəm və sabiq müdir Şəmsəddin Əliyev barəsində heç bir ölçü götürülməyib.
Onu da qeyd edim ki, bu gün Əliyev Şəmsəddin Camalxan oğlu “Ekspresskredit Bank”da, Azər və Azad isə “Milli Bank” da işləyirlər. Baxmayaraq ki, “Rabitə Bank” adı çəkilən şəxsləri 02 mart 2010-cu il tarixdə tutduqları vəzifədən azad etmişdir. Bu barədə, hətta Sumqayıt Apelliyasiya Məhkəməsinin 01 fevral 2011-ci il tarixli 2/105- 53/2011 saylı qətnaməsində də var.
Diqqəti cəlb edən digər hal da odur ki, Sumqayıt şəhər Polis İdarəsinə Şəlalə Abdullayeva ilə bağlı ünvanladığım şikayət ərizəsinə hər zaman cavab olaraq bildirilib ki, “onun Azərbaycan Respublikası CM-nin 320.1 və 178.3.2-ci maddələri ilə təqsirləndiriməsi və istintaqa cəlb edilməsi barədə 12 noyabr 2009-cu il tarixli qərar da qəbul edilmişdir. Amma, o, ölkə hüdudlarından kənarda olduğuna görə və istintaqdan gizləndiyi üçün, ona həmin maddələrdə nəzərdə tutulan ittihamı elan etmək mümkün olmur. Ona görə də, təqsirləndirilən şəxs Şəlalə Abdullayevanın tapılaraq istintaqa cəlb olunması üçün, onun barəsində axtarış da elan edilmişdir. Bundan əlavə, 23 avqust 2010-cu il tarixdə Sumqayıt şəhər Məhkəməsi onun barəsində həbs qətiimkan tədbiri də seçmişdir”.
Daha çox diqqəti cəlb edən hal odur ki, 05 may 2014-cü il tarixdə Sumqayıt şəhər Məhkəməsində hakim İlyas Mahmudovun sədrliyi ilə keçirilən prosesdə belə bir qətnamə də çıxarılır ki, cavabdeh Abdullayeva Şəlalə Yaqub qızından 40000 (qırx min) manat, dövlət rüsumuna görə ödənilmiş 30 (otuz) manat, hüquqi yardımla bağlı ödənilmiş 3500 (üç min beş yüz) manat, ümumilikdə 43530 (qırx üç min beş yüz) manat pul alınsın və iddiaçı Qəşədərova Almara Oruc qızına verilsin.
Bütün bunlar bir daha onu söyləməyə əsas verir ki, “Rabitə Bank”ın sabiq əməkdaşlarının qol qoyduqları əməllər, birbaşa cinayət əməlləridir. Necə ola bilər ki, Almara Qəşədərovanın xəbəri və iştirakı olmadan Abdullayev Şəlalə Yaqub qızı 30 min manat kreditə pul götürür və onun evi banka girov da qoyulur. Hətta, onun barəsində Azərbaycan Respublikası CM-nin 178.3.2 və 320.1-ci maddələri ilə cinayət isi açılsa da, o bu gün də istintaqdan yayına bilir və hüquq-mühafizə orqanı əməkdaşları onun istintaqa cəlb olunmasında maraqlı görünmürlər. Eyni zamanda 05 may 2014-cü il tarixdə Sumqayıt şəhər Məhkəməsi onun barəsində qətnamə çıxarsa da, məhkəmə icraçıları da çıxarılmış qətnaməyə məhəl qoymadan 07 noyabr 2012-ci il tarixdə, Almara Qəşədərovanı, onun anasını və iki azyaşlı övladını yaşadıqları mənzildən zorla, döyulə-döyulə bayıra cıxarırlar.
Bu yöndə araşdırmalarımız davam etdiyindən, növbəti sayımızda ictimaiyyətə daha ətraflı məlumatlar verməyə çalışacağıq. Odur ki, bizi izləməyi unutmayın. Adları çəkilən şəxslərin də mövqeyini dinləməyə hazırıq.
