Artıq iki ildir Naxçıvan MR DİN-də Azərbaycan Polis Akademiyası məzunlarının ovuna başlandığı barədə xəbər vermişdik. Onu da vurğulamışdıq ki, bu “ixtisar”ların bir neçə səbəbi var. Bunlardan biri həmin ixtisaslı kadrlara “paytaxtın casusları” kimi baxılması, digəri isə IQ dərəcələrinin yüksək olmasıdır.
Qısası, düşünmə qabiliyyəti yüksək olan bu məzunlar Azərbaycan Polis Akademiyasında aldıqları hüquqi təhsilin də sayəsində etdikləri hərəkətlərin məsuliyyətini anlayır, verilən qanunsuz əmrləri canü-könüldən yerinə yetirmirlər. Naxçıvan rəhbərliyi isə bu casərəti göstərə bilən kadrlardan xoşlanmır. Odur ki, müxtəlif basqılarla onları sinsidib işdən çıxmağa vadar edirlər. Bu da alınmayanda şəxsi işlərini ləkəyib “polis fəaliyyətinə yararsız” damğası ilə Daxili İşlər orqanlarından uzaqlaşdırırlar. Beləcə, bir tərəfdən yüksək intellektual səviyyəli polis əməkdaşları ömürlərinin sonuna qədər bu strukturlardan uzaqlaşdırılır, digər tərəfdən isə Naxçıvan MR DİN heyəti çiynində paqon daşıyan savadsızlar ordusundan təşəkkül tapır.
Sual oluna bilər: bəs, bu savadsızlar ordusunun sərkərdəsi sayılan Daxili İşlər nazirlərinin biliyi hansı səviyyədədir?
Sirr deyil ki, Azərbaycan Polis Akademiyasının məzunlarına qarşı sıxışdırma hərəkətləri Naxçıvan MR DİN-in bundan əvvəlki rəhbəri Fazil Ələkbərov zamanında başlamışdı. Fazil Ələkbərovun isə 40 yaşına qədər polis serjantı kimi fəaliyyət göstərdiyi, Naxçıvan Ali Məclisinin sədri (bəziləri “paxıllıq”dan ona “xan” da deyirlər) Vasif Talıbovla qohum olduqdan sonra bir neçə il müddətində birdən-birə general-leytenantlığa sıçradığı hər kəsə bəllidir. Ondan əvvəl Naxçıvan MR DİN-nə rəhbərlik edən Əhməd Əhmədovun IQ səviyyəsi də heç ondan geri qalmırdı.
Polis Akademiyasının məzunlarının ən böyük ovu da məhz Fazil Ələkbərovun zamanında baş vermişdi. 1 ildə 36 polis əməkdaşı müxtəlif bəhanələrlə işdən uzaqlaşdırılmışdı. Bu böyük “ixtisar”ın isə bir səbəbi vardı: həmin Naxçıvan Orta İxtisas Polis Məktəbindən (el arasında ona “Polis peşə texniki məktəbi” də deyirlər, çünki bu təhsil ocağına girmək üçün qəbul imtahanlarından 50 bal toplamaq kifayətdir) 30 məzun buraxılacaqdı. Onları iş yeri ilə təmin etmək üçün, təbii ki, Polis Akademiyasının eyni sayda məzunu işdən çıxarılmalı idi. Fazil Ələkbərov isə bir az “uzaqgörənlik” göstərib bu sayın üzərinə daha 6 nəfər əlavə edərək, gələcək təyinatlar üçün vakant yerlər də hazırlamışdı.
DİA.AZ xəbər verir ki, ovqat.com-un əldə etdiyi məlumatlara görə, Polis Akademiyasının məzunları ovu nə qədər Fazil Ələkbərovun zamanında başlasa da, əslində bu ixtisarların əsas müəllifi indiki nazir Rəşad İsmayılov idi. Belə ki, savadlı polis ixtisarları gedən sıralarda Fazil Ələkbərov müəyyən səbəblərdən öz qudası Vasif Talıbovun gözündən düşmüş və nazirliyə faktiki rəhbərlik onun müavini Rəşad İsmayılova keçmişdi. Rəşad İsmayılov isə “Seyid Əhməd əli ilə ilan tutmaq” qabiliyyətini işə salıb özünə uyğun kadrların polis orqanlarına doldurulması əməliyyatlarına start vermişdi.
Növbəti sual: Bəs, bu ilin 7 fevral tarixində Ali Məclisi Sədri Vasif Talıbovun imzaladığı fərmanla nazir təyin olunan Rəşad İsmayılovun savadı hansı səviyyədədir?
Sözsüz ki, bu suala dəqiq cavab vermək üçün gərək Rəşad İsmayılovu attestasiya imtahanından keçirəsən. Naxçıvanda isə bir naziri attestasiya imtahanından keçirməyi heç paytaxtın ən yüksək səlahiyyətli şəxsləri də bacarmaz. Çünki bu diyarda əsas odur ki, “xan”ın süzgəcindən keçəsən. “Xan süzgəci” bütün attestasiya imtahanlarının nəticələrindən daha üstündür və Rəşad İsmayılov da o süzgəcdən keçdiyi üçün bu gün Naxçıvan MR Daxili İşlər naziri postunda əyləşib.
Bununla belə, Naxçıvan MR Daxili İşlər Nazirliyindəki mənbəmizdən Rəşad İsmayılov barədə əldə etdiyimiz bəzi məlumatlar onun savadı haqqında bəzi ipucları verməkdədir. Sizi cənab nazirin qısa avtoqrafiyası ilə tanış edirik. Daha geniş məlumatları onun barəsində yaradılacaq “Wikipediya” materialı üçün saxlayırıq.
Rəşad İsmayılov: Naxçıvan Muxtar Respublikasının Daxili İşlər naziri, polis polkovniki.
İsmayılov Rəşad Rafiq oğlu 20.09.1978-ci il tarixdə Şərur rayonunun Xok kəndində anadan olmuşdur. 2000-ci il tarixdə Ali Diplomatiya Kollecini, 2012-ci il tarixdə isə Naxçıvan Dövlət Universitetini bitirmişdir. 2000-2001-ci il tarixlərdə Silahlı Qüvvələrin sıralarında müddətli həqiqi hərbi xidmət keçmişdir. Culfa rayon Prokurorluğunun stajor-müstəntiqi, Culfa rayon Prokurorluğunun müstəntiqi, Naxçıvan Muxtar Respublikası Hərbi Prokurorluğunun böyük müstəntiqi, Naxçıvan Muxtar Respublikası Hərbi Prokurorluğunun İstintaq Şöbəsinin böyük müstəntiqi, Naxçıvan Muxtar Respublikası Hərbi Prokurorluğunun İstintaq Şöbəsinin mühüm işlər üzrə müstəntiqi, Naxçıvan Muxtar Respublikası Hərbi Prokurorunun böyük köməkçisi (Təşkilat-analtik məsələlər üzrə), Naxçıvan Muxtar Respublikası Hərbi Prokurorluğunun İstintaq Şöbəsinin rəisi və Naxçıvan Muxtar Respublikası Hərbi Prokurorunun müavini vəzifələrində xidmət etmişdir. Bu kimi böyük vəzifələrin əksəriyyətini isə kollec məzunu vəsiqəsi ilə həyata keçirmişdir.
25.01.2021-ci il tarixdən daxili işlər orqanlarında xidmət edir. Naxçıvan Muxtar Respublikası Ali Məclisi Sədrinin 25.01.2021-ci tarixli 83-06/S nömrəli Sərəncamı ilə Naxçıvan Muxtar Respublikası Daxili İşlər nazirinin müavini və Naxçıvan Muxtar Respublikası Ali Məclisi Sədrinin 07.02.2022-ci il tarixli 106-Vl FR nömrəli Fərmanı ilə Naxçıvan Muxtar Respublikasının Daxili İşlər naziri vəzifəsinə təyin olunmuşdur. Azərbaycan Respublikası Daxili İşlər Nazirliyinin 02.02.2021-ci il tarixli Ə268ş/h-001-21 nömrəli əmri ilə polis polkovniki xüsusi rütbəsi verilmişdir. Ailəlidir, üç övladı var.
Ali Diplomatiya Kolleci 1992-ci il, aprelin 30-da fəlsəfə elmləri doktoru, professor Nazim Ziyad oğlu Hüseynli tərəfindən təsis edilmişdir. Həmin kollecin indiki adı Bakı Avrasiya Unversitetidir.
Deyəsən, xoruzun quyruğu məhz bu məqamda gizlidir. Söhbət hörmətli Rəşad müəllimin niyə Naxçıvan Orta İxtisas Polis Kollecinin məzunlarına xüsusi sevgi bəsləməsinin əsl səbəbindən gedir. Çünki nazirin özü də böyük hörmət bəslədiyi polis peşə texniki məktəbinin məzunları kimi kollec yetirməsidir.
O ki qaldı Rəşad İsmayılovun kolleci bitirdikdən hardasa 10 il sonra - 2012-ci ildə Naxçıvan Dövlət Universitetindən məzun olmasına, hər kəs bu universitetdə ikinci təhsilin necə əldə edilməsi haqqında məlumatlıdır. Ona görə də o barədə hələlik geniş yazmağı ehtiyac duymuruq.
