Su Ehtiyatları Agentliyi işçilərinin aylıq gəliri yarıbayarı azaldılıb, gördükləri işin həcmi isə iki dəfə artırılıb. Bundan əlavə, onlar hər gün 8 saat yerinə 12 saat işləməli olurlar. Bu haqda “Gündəlik Naxçıvan”a bir qrup işçi məlumat verib. Şikayətçilərin sözlərinə görə, buna etiraz edənlərin vəzifəsi aşağı salınır, onlar əsassasız olaraq töhmətlə cəzalandırılır, təhqir olunurlar. Bu işlərin başında rəsi Samir Baxşəliyevin durduğu bildirilir.
Şikayətçilər bildirirlər ki, bu iş şərtlərinə dözməyən 20 nəfər artıq öz ərizəsi ilə işdən çıxıb. Onların yerinə isə, rüşvətlə yeni işçilər götürülüb:
“ Biz isə işləməyə məcburuq. Uzun illərdir bu idarədə işləyirik. Bəzilərimizin artıq yaşı da keçib. İşdən çıxsaq belə iş tapa bilməyəcəyik. Məcburuq ki, hər şərtə dözək. Ailəmizə çörək aparaq. İndi aldığımız maaş da görmür. Onsuz da borca işləyirik. Əvvəllər aylığımız 700-800 manata çıxırdı. İş saatı da 8 saat idi. Əlavə iş olanda artıq saat işlədiyimizə görə pulunu mükafat şəkilində alırdıq. Avtomobil, texnika da xidmətimizdə idi.
Təzə müdir gələndən hər şey dəyişib. İş şərtləri ağırlaşıb, mükafatlar kəsildiyindən aylıq gəlirimiz də təxminən 400 manat azalıb. İşçilər təhqir olunur. İşləmək üçün yaşadığı ərazidən uzağa göndərilir. Əvvəllər 700 abonentə nəzərat edənlər hazırda 1500-2000 abonentə nəzarət edir. Samir Baxşəliyevin çalışdığı odur ki, səs küy olmadan işçilər ərizəsini yazıb işdən çıxsın. O isə pulunu alıb onların yerinə yeni işçilər götürsün. Buna müəyyən qədər də nail ola bilib. Son vaxtlar çoxlu sayda işçi ərizəsini yazaraq işdən çıxıb. Onların yerinə Samir Baxşəliyev rüşvət alaraq başqa işçilər götürüb, öz yaxın adamlarını təyin edib.”
İşçilər həmçinin gecə növbəsini daşıyan avtobusların da ləğv olunduğunu bildirirlər:
“Axşamlar növbəyə gedib-gələn işçilər marşrutlar işləmədiyi üçün əlavə hər gün taksiyə də pul verməli olurlar. Çünki, növbə axşam saat 21.00-dan, səhər 9.00-a qədərdir. 12 saatlıq iş rejimi höküm sürür. Etiraz edənlər isə işdən çıxarılmaqla hədələnirlər”.
Agentlik işçiləri aidiyyəti qurumlara müraciət edərək, haqlarının bərpa olunmasını, günahkarların cəzalandırılmasını tələb edirlər.
