Gəncənin sabiq icra başçısı Elmar Vəliyevin dönəmində şəhər ərazisindəki müxtəlif kateqoriyalı, xüsusilə də dövlət fond torpaq sahələrinin kütləvi şəkildə vətəndaşlara paylanması, qanunsuz sərəncamlarla ev tikintisi adı ilə torpaq satılması prosesi davam etdirilir. Şəhərin inzibati idarəçiliyini yarıya bölən Kəpəz və Nizami rayon icra hakimiyyətlərinin başçılarının rüşvət müqabilində ayrı-ayrı vətəndaşlara satdıqları sərəncamların sayı artırılır.
"Demokratik.Az"-a bu barədə daxil olan növbəti şikayətin mahiyyətindən də aydın olur ki, prezidentin Gəncədəki rayonlar üzrə səlahiyyətli nümayəndələri sözügedən alverlərini davam etdirmək üçün şəhər meri Niyazi Bayramovun da "qılığına girə biliblər. Həm Nizami RİH başçısı Nizami Hacıyev, eləcə də Kəpəz İHB başçısı Eldəniz Xudiyev onları bu qanunsuz işə alışdıran Elmar Vəliyevin və hazırda həbsdə olan "torpaq baronu" Məharət Mustafayevin əyri məmur yoluna sadiqlik edirlər. Paylanılmış (satılmış-O.N) qanunazidd sərəncamlar isə Gəncənin dörd bir yanını əhatə edir, şəhərdə yüzlərlə qanunsuz evlər tikilib və tikilməkdədir. İşlərin kortəbiiliyi şəhərsalma və arxitektura normalarına zidd tikililəri, adsız və yararsız küçə və dalanları ortaya çıxarır.
Gəncə sakini Pənahova Günay Pərzaman qızının bildirdiyinə görə, Gəncə şəhəri Kəpəz rayon icra başçısı Eldəniz Xudiyevin imzasını daşıyan qanunazidd sərəncamlardan bir neçəsi də eyni qəbildən olmaqla, onun mülkiyyət hüquqlarının pozulması ilə nəticələnib. Ən dəhşətlisi, vətəndaşlar əllərindəki absurd sərəncamlar sayəsində məhkəmələrdə üz-üzə qalıb bir-birlərilə düşmən olurlar.
Şikayətçi xanımın "Demokratik.Az"-a təqdim etdiyi sənədlərdən görünür ki, Gəncə şəhər Kəpəz rayon İH başçısının 04 noyabr 2014-cü il tarixli 1859 nömrəli sərəncamla Gəncə şəhəri Ü.Hacıbəyov küçəsi ev-7, mənzil 57-də yaşamış mərhum Pərzaman Pənahova eyniadlı küçədə yerləşən 1 saylı çörək zavodunun arxasında 400 kv-m torpaq sahəsində fərdi yaşayış evinin yerləşdirilməsinə (layihələndirilməsinə) icazə verilib.
Şikayətçi qeyd edir ki, həmin torpaq sahəsi uzun illər əvvəldən atasının istifadəsində olub və mərhum həmin ərazidə müxtəlif meyvə ağaclarından ibarət böyük bağ salıbmış. Ata vəfat etdikdən sonra isə bağa ailə üzvləri qulluq edirmiş.
Şikayətçi həmin bağçılıq təsərrüfatının 10 sotdan artıq olduğunu və son illərdə bir hissəsinin icra başçısı Eldəniz Xudiyev tərəfindən qanunsuz əsaslarla ayrı- ayrı şəxslərə satıldığını qeyd edir. Günay Pənahova bildirir ki, Kəpəz İH başçısı rüşvətlə torpaq satarkən alıcının Samux rayon sakini olmasını belə nəzərə almayıb, "yetər ki, pul olsun!" prinsipini üstün tutub. Hətta, cənab Xudiyev sərəncam verərkən 2021-ci il tarixli müraciətləri 2017-ci il kimi göstərməklə real tarixçəni də saxtalaşdırıb. Nəticədə, həmin ərazidən 0,02 ha torpaq "qamarlayan" Samux rayon sakini Axirət Sərdarova və Azər adlı qohumu, eləcə də digər yanda tikinti edən vətəndaş Dinarəddin Məmmədov əllərindəki sərəncama dayanaraq Pənahovların istifadəsindəki bağı qəsb ediblər.
Ağacları kəsməklə bağın köhnə hasarını da uçurublar. Tərəflər arasında mülki mübahisə yaranıb, problem yerli hüquq mühafizə və məhkəməyədək qalxıb, lakin, icra başçısı Eldəniz Xudiyevin saxta sərəncamı qanunun tələblərini üstələyir.
Maraqlı nüans ondan ibarətdir ki, Kəpəz İHB rəhbərinin hələ sabiq başçısı Elmar Vəliyev dönəmindən bu yana satdığı sərəncamların heç bir hüquqi əsası mövcud deyil. Belə ki, vətəndaşlara satılmış sərəncamlar özündə "torpaq məcəlləsi"nin 4-cü bəndini, eləcə də Azərbaycan Respublikası prezidentinin 06 iyun 2012-ci il tarixli 648 saylı fərmanı ilə təsdiq edilmiş "yerli icra hakimiyyətləri haqqında" Əsasnamənin 6.8-ci bəndinə istinad edir. Halbuki, nə "torpaq məcəlləsi"nin 4-cü bəndi, nə də prezidentin müvafiq fərmanı icra başçılarına dövlət fond torpaqları üzərində sərəncam vermək hüququnu ehtiva etmir, əksinə qadağan edir. "Torpaq Məcəlləsi"nin 57-ci maddəsinin 4-cü bəndi "Qeyri-kənd təsərrüfatı və qeyri-meşə təsərrüfatı məqsədləri üçün torpaq sahəsinin ayrılması"nı, yalnız bu haldan irəli gələn tələbləri izah edir. Burada da icra başçısına hansısa sərəncam hüququnun verilməsi imkanları məhduddur.
Prezidentin 06 iyun 2012-ci il tarixli 648 saylı fərmanı ilə təsdiqlənmiş "“Yerli icra hakimiyyətləri haqqında Əsasnamə”nin 6.8-ci bəndi isə deyir ki: SİTAT: "Yerli icra hakimiyyətinin başçısı konkret (birdəfəlik) təşkilati, nəzarət və ya sərəncamverici tədbirlərin həyata keçirilməsi məqsədi ilə və ya digər birdəfəlik tətbiq halları üçün qeyri-normativ hüquqi aktlar qəbul edir. Qeyri-normativ hüquqi aktlar sərəncam və ya əmrlər formasında qəbul edilir".
Göründüyü kimi, verilən sərəncamlar özlüyündə aldadıcı və hüquqi rəzalətdən irəli gələn hallarla yalnız rüşvətlə vətəndaşa satılan rəsmi kağız parçasıdır. Sərəncam verilərkən torpaq sahəsinin koordinatlarının havada qalması, yerləşdiyi yerin ümumi sözlərlə - gah hansısa binanın arxasında və ya nəyinsə yanında yerləşən torpaq sahəsi kimi ifadə edilməsi icra başçılarının adına ayrıca rüsvayçılıqdır.
Onu da xatırlatmaq yerinə düşər ki, ümumiyyətlə, yerli icra hakimiyyətlərinin 1999-cu ildən bu yana öz mülkiyyəti olmadığı üçün torpaqlar üzərində sərəncam vermək səlahiyyətlərini itiriblər. Bu səlahiyyətlər dövlət fond torpaqları üçün Əmlak məsələləri dövlət komitəsinə, digər hallarda isə yerli bələdiyyələrin funksiyasına aid edilib. Əfsuslar olsun ki, son 20 ildə Gəncədə bələdiyyə qurumları mövcud olsa da, İHB-dən fərqli olaraq heç kəs bələdiyyə xəttilə torpaq ala bilməyib ki, bunun da səbəbi məhz sözügedən qanunsuz sərəncamlardadır. Sərəncamlar əsassız olduğu üçün də paylanan torpaqlara və tikilən evlərin əksəriyyətinə DƏDRX tərəfindən mülkiyyət sənədlərinin verilməsi də asan və rüşvətsiz başa gəlmir.
"Demokratik.Az"ın əldə etdiyi digər məlumata görə, sözügedən özbaşınalıqlar barədə Azərbaycan Respublikası Prezidentinin köməkçisi, Dövlət nəzarəti məsələləri şöbəsinin müdiri Kərəm Həsənov daha çox məlumatlıdır. Hətta, Elmar Vəliyevin qudası (K.Həsənov - O.N) özü bu həngamələrin Gəncədə bunca vüsət almasına göz yuman, buna dolayısıyla şərait yaradan məmurlardandır. Nəzərə alınsa ki, Kərəm Həsənov Elmar Vəliyevin Gəncədə icra başçılığı dönəmində Azərbaycan Respublikasının Əmlak Məsələləri Dövlət Komitəsinin sədri kimi Gəncədə 100 hektarlarla dövlət fond torpaqlarının sərəncamlarla talanmasına susqun qalıb, qanunazidd prosesin durdurulmasına çalışmayıb, hər şey aydındır. Buna görədir ki, hələ də torpaq satan icra başçıları saxta sərəncamlarında tarixi 2017-ci ilə yazıb yaxın keçmişə eyham edirlər, bu üsulla guya hüquqi "toxunulmazlıq" qazanırlar.
İnanaq ki, prezidentin etimadını və qanunun tələblərini korrupsiyalı sərəncamlarına qurban edənlər öz tamahlarını bari bundan sonra Gəncənin olan-qalan torpaq sahələrindən çəkəcəklər, ali dövlət rəhbərliyi səviyyəsində özbaşınalıqlarını durduracaqlar...
Demokratik.Az
