Şərur rayonunda fermerlər suvarma suyu üçün alınan ödənişin ikiqat artırılmasına etiraz edirlər. Onların sözlərinə görə, yeni qaydalardan sonra 5-6 hektar yonca sahəsinin bir mövsüm ərzində suvarılması təxminən 300 manata başa gələcək.

Bir çox fermer isə bildirir ki, yeni qiymətlər səbəbindən əkinçiliyi tamamilə dayandırmaq məcburiyyətində qalacaqlar.

Fermerlərin bildirdiyinə görə, yeni qiymətlər “Şərur” Sudan İstifadəçilər Birliyi tərəfindən müəyyən edilib.

Mahmudkənd kənd sakini Nəriman Mehdiyev deyir ki, artan xərclər səbəbindən əkdiyi yonca sahəsini suvarmaqdan imtina edib:

“Bu qədər özbaşınalıq olmaz. Prezident deyir ki, kənd təsərrüfatının inkişafı üçün şərait genişləndirilməlidir, bunlar isə əksinə, bizi daha da çıxılmaz vəziyyətə salırlar. İndi deyirlər ki, hər hektarın suvarılması üçün 10 manat verməlisiniz. Mən 5 hektar sahədə yonca əkmişəm. Biçin vaxtına qədər ən azı beş dəfə suvarılmalıdır. Bu isə təxminən 250 manat edir. Torpağın arenda pulu və digər xərclər çıxıldıqdan sonra bizə demək olar ki, heç nə qalmır. Mən kimsənin köləsi deyiləm.”

Fermer deyir ki, məsələ ilə bağlı aidiyyəti qurumlara müraciət etsələr də, nəticə əldə edə bilməyiblər:

“Yerli Kənd Təsərrüfatı Nazirliyi ilə əlaqə saxladım. Dedilər ki, suvarmaya nəzarət edən və ödənişləri yığan Birlik səhmdar cəmiyyətidir, bizim qarışmağa səlahiyyətimiz yoxdur. Necə yəni səlahiyyət yoxdur? Birlik kimdir ki, nazirliyin xəbəri olmadan qiymətləri qaldırır?”

Əkinçiliklə məşğul olan digər fermer Rasim Babayev də yeni qiymətlərin kənd təsərrüfatına ciddi zərbə vurduğunu düşünür:

“Naxçıvanda elə vəziyyət yaradıblar ki, burada qalanlar da dolanışıq üçün çıxıb getsin. 8 hektar sahəm var. Hər il birtəhər dolanırdım. Bu il həm su pulu, həm arenda qiymətləri qaldırılıb. Hər tərəfdən nəfəsimizi kəsirlər. Yəqin ki, gələn ildən mən də hər şeyi buraxıb Türkiyəyə işləməyə gedəcəyəm.