"Şəhid adı daşıyan küçəyə bu münasibət qəbulolunmazdır!.." "DİA-AZ" xəbər verir ki, bu sözlər Binəqədi rayon Biləcəri qəsəbəsi sakinləri adından edilən müraciətdə yer alıb.

Müraciətdə daha sonra deyilir: "Tural Ruslan oğlu Zeynalov — Aprel döyüşlərinin və Vətən müharibəsinin qəhrəmanlarından biri… Canını bu torpaq üçün fəda etmiş bir şəhid… Bu gün onun adını daşıyan Biləcəri qəsəbəsindəki küçənin vəziyyəti isə sözün həqiqi mənasında ürəkağrıdır.
Dağılmış yollar, saysız-hesabsız çuxurlar, yağış yağanda gölə çevrilən küçələr, hər gün əziyyət çəkən sakinlər… İllər keçir, müraciətlər edilir, narazılıqlar səsləndirilir, amma aidiyyəti qurumlar sanki görmür, eşitmir, hiss etmir.
Bir küçəyə baxıb dövlətin şəhidinə verdiyi dəyəri görmək olar. Əgər bu küçə şəhid adı daşıyırsa, o küçə ən nümunəvi yerlərdən biri olmalıdır. Çünki o ad adi ad deyil — o ad qanla yazılıb!
Bu gün Biləcəridə Tural Ruslan oğlu Zeynalov adını daşıyan küçənin vəziyyəti həm sakinlər, həm də şəhid ailələrinə qarşı böyük hörmətsizlik təsiri bağışlayır. Şəhidlərin adını tribunadan qürurla səsləndirib, onların adını daşıyan küçələri baxımsız qoymaq olmaz!
Aidiyyəti qurumları bu məsuliyyətdən yayınmamağa çağırırıq. Bu küçə təcili şəkildə təmir edilməli, şəhid adına layiq vəziyyətə gətirilməlidir.
Çünki şəhidlər bu xalqın qürurudur. Onların adı isə laqeydlik içində yox, hörmət içində yaşamalıdır!.."

Video BURADA: baxmaq üçün TIKLAYIN...