"İki aydır ki, ELektron Məhkəmə Sistemi normal işləmir. Aprelin əvvəlində 2-3 həftə ümumiyyətlə çökmüşdü. Gül kimi işləyən əvvəlki sistemi milyonlar xərcləyib dəyişdilər, nəticəsi isə inkişaf əvəzinə kollaps oldu..." "DİA-AZ" xəbər verir ki, bunu özünün sosial şəbəkə hesabında tanınmış hüquq müdafiəçisi Əkrəm Həsənov qeyd edib.

O daha sonra fikrini belə davam etdirir: "Bu barədə danışanların da ağzını yumurlar ki, susun! Bir rəsmi şəxs də çıxıb demir ki, yeni sistemin əvvəlkindən üstünlüyü nədir axı, niyə bunu etdilər, nəyə görə etdilər...

İndinin özündə də vəkillər bu sistemlə xeyli problem yaşamaqdadırlar. Hətta sistemdə işlər və sənədlər də tapılmır bəzən. Nə bilək ki, əvvəlki illərin işləri olduğu kimi qalıb, yoxsa orada da dəyişiklik, "barmaq" edilib, ya yox?!

Ən böyük cari problem isə mövcud işlər üzrə bildirişlərin gəlməməsidir. Vəkillər məcburdur ki, hər bir işini vaxtaşırı bir-bir yoxlasınlar: əlavə sənəd yüklənməyib? iclasın tarixi təyin olunmayıb? məhkəmə aktı dərc olunmayıb? və s. və i.a. Şəxsən mən buna hər gün xeyli əlavə vaxt sərf edirəm. Allah etməmiş, hansı məlumatı görməsəm, reaksiya verməsəm, müddəti buraxa bilərəm, sonra da gəl bunlara nəyisə sübut et. Heç ağın qara olmadığını məhkəmə proseslərində həmişə qəbul etmir məhkəmələrimiz...

Bax, elə bu gün region məhkəmələrindən biri 16 aprel tarixli qətnaməsini dərc edib. Təbii, bildiriş-zad gəlməyib mənə, sadəcə gündəlik izləyirəm deyə gördüm. Bu cəhənnəmə! Qətnamə ilə bərabər hakim qətnaməni göndərməsi haqda məktubunu da dərc edib və onun da tarixini 16 aprel kimi göstərib. Yəni belə çıxır ki, guya 1 aylıq apellyasiya şikayəti müddəti də artıq 17 mayda ötüb. Sistemə bildiriş gəlsə idi, heç olmasa ona istinadən deyə bilərdim ki, nə olsun 16 aprel yazıb məktubunda, 1 iyunda dərc edib axı. Lakin bunu da deyə bilməyəcəyəm indi. Çünki hakim 1 iyunda göndərdiyi məktubu da köhnə tarixlə edib.

Hörmətli Azərbaycan Respublikası Məhkəmə-Hüquq Şurası, sizdən artıq heç bir açıqlama, izahat-filan gözləmirik onsuz da, Allah və tarix sizə HAKİM olsun, ədalətsiz məhkəmə aktlarına da alışımışıq çoxdan, özümüz özümüzə poçtalyonluq etməyə də hazırıq, amma heç olmasa sonradan göndərdilən məktubların köhnə tarixlə edilməsinin qarşısını alın! Olmayacaqsa, açıq deyin, gedək özümüzə başqa iş tapaq. Məsələn, kənd təsərrüfatı və ya urologiya ilə məşğul olaq..."