"DİA-AZ" xəbər verir ki, bizimesr.com portalının əldə etdiyi məlumata görə, aparılan yoxlamaların nəticələri hələlik ictimaiyyətə açıqlanmır. 

Mənbələrin iddiasına əsasən, müəyyən edilmiş nöqsan və uyğunsuzluqların qısa müddət ərzində aradan qaldırılması üçün AYNA rəhbərliyinə müvafiq tapşırıqlar verilib

Məlumatda qeyd olunur ki, qurumun fəaliyyətinin yenidən yoxlanılması da gündəmdədir. Bildirilir ki, yoxlamaların nəticələri və aşkar edilmiş problemlər aidiyyəti yuxarı instansiyalarda müzakirə edilir.

İddialara görə, AYNA İdarə Heyətinin sədri Anar Rzayevin fəaliyyəti ilə bağlı məsələlər də müvafiq dövlət qurumlarında diqqət mərkəzində saxlanılır və müxtəlif səviyyələrdə dəyərləndirilir.

Qeyd edək ki, Azərbaycan Yerüstü Nəqliyyat Agentliyi yarandığı gündən etibarən fəaliyyəti ilə bağlı cəmiyyətdə müxtəlif müzakirələrə səbəb olub. Xüsusilə paytaxtda nəqliyyatın təşkili, avtobus marşrutları, parklanma siyasəti, nəqliyyat sıxlığı və digər məsələlər üzrə qəbul edilən qərarlar zaman-zaman ictimai narazılıqlarla qarşılanıb.

Vətəndaşlar AYNA-nın həyata keçirdiyi bəzi layihələrin gözlənilən nəticəni vermədiyini, nəqliyyat sahəsində problemlərin isə tam həll olunmadığını bildirirlər. Digər tərəfdən, qurum tərəfindən son illərdə ictimai nəqliyyatın modernləşdirilməsi, rəqəmsal xidmətlərin genişləndirilməsi və yol hərəkətinin tənzimlənməsi istiqamətində müəyyən addımların atıldığı da qeyd olunur.

Hazırda yoxlama ilə bağlı rəsmi qurumlar tərəfindən hər hansı açıqlama verilməyib. Məsələ ilə bağlı AYNA-nın və aidiyyəti dövlət qurumlarının mövqeyini dərc etməyə hazırıq.