Maaşlar aylıq verilir, mükafatlar aylıq olur, kommunal xərclər aylıq ödənilir, amma “Azercell” tariflərini 30 gündən bir yox, 28 gündən bir yeniləməyə başlayıb.
Yeniavaz.com xəbər verir ki, bu barədə jurnalist, İTV-nin əməkdaşı Naibə Qurbanova sosial şəbəkə hesabında yazıb.
Naibə Qurbanova yazıb ki, ayların 30-31 günlük sistemi Roma dövründən qalıb, min illərdir istifadə olunur:
“Maaşlar (adətən) aylıq verilir, mükafatlar aylıq olur, kommunal xərclər aylıq ödənilir… və s. Aylıq müddət isə yenə deyirəm, 30-31 gündür. Amma siz birdən ayılıb o günləri 28 etmisiniz və tarifləriniz 30 gündən bir yox, 28 gündən bir yenilənməyə başlayıb. Olmaya, qalan 2 günlərdən 13-cü ay düzəltmək istəyirsiniz?
Siz əsrlərin sınağından çıxmış Qriqori təqviminə də barmaq eləyirsinizsə, gör indi bizim cibimizə nələr edirsiniz e? Dayanmayın, sutkanı da 22 saat edin, dəqiqədən də kəsin - 1 dəqiqəni 30 saniyə edin, saniyəni ümumiyyətlə saya salmayın, necə ki saymırsınız. Nəyi var, göstərin potensialınızı...”.
Qeyd edək ki, “Azercell”ə məxsus sosial şəbəkə hesabı tərəfindən jurnalistin bu paylaşımına münasibət bildirilib.
“Paketlərimizin etibarlılıq müddətinin 30 gündən 28 günə endirilməsi aylıq təqvim günləri praktikasından imtina edərək 4 həftəlik (28 günlük) dövrlərə keçid, beynəlxalq standartlara uyğunluq, xidmətin idarəolunmasının sadələşdirilməsi və daha çevik təkliflərin təqdim edilməsi məqsədi daşıyır”, - deyə “Azercell”dən bildirilib.
Məsələ ilə bağlı Yeniavaz.com-a danışan iqtisadçı-ekspert Allahverdi Aydın deyir ki, mobil operatorun istinad etdiyi “28 günlük dövr” məsələsinin hər hansı beynəlxalq standartla əlaqəsi yoxdur:
“Beynəlxalq standartlar deyəndə, adətən hər kəs tərəfindən qəbul edilən İSO (Beynəlxalq Standartlaşdırma Təşkilatı) və ya İTU (Beynəlxalq Telekommunikasiya İttifaqı) kimi nüfuzlu qurumların müəyyən etdiyi texniki standartlar başa düşülür. Bu qurumlar xidmətin keyfiyyəti, təhlükəsizliyi və digər texniki məsələlər üzrə normalar qoyur. Ödəniş müddətləri isə tamamilə kommersiya qərarıdır. Bu qurumların heç birinin “paket 30 yox, 28 gün olmalıdır” deyə bir qaydası və ya standartı yoxdur”.

Ekspert bildirir ki, mobil operatorun “beynəlxalq standart” ifadəsi işlətməsi əslində reallığı bir az bəzəmək cəhdidir:
“Telekommunikasiya sahəsində bütün dünyada tətbiq olunan belə bir standart mövcud deyil. Bu, sadəcə operatorların gəlirlərini artırmaq üçün istifadə etdikləri və beynəlxalq bazarda sınanmış bir kommersiya fəndidir. Məsələ çox sadədir; bir təqvim ili 365 gündür və siz ödəniş dövrünü 30 gündən 28 günə endirdikdə, il ərzindəki ödənişlərin sayı 12-dən 13-ə qalxır. Yəni operator faktiki olaraq abunəçidən il sonunda bir aylıq əlavə xidmət haqqı almış olur ki, bu da illik dövriyyədə heç bir investisiya qoymadan təxminən 8 faizlik bir artım deməkdir. Şirkətin “idarəetmənin sadələşdirilməsi” və ya “çeviklik” deməsi sadəcə bu gizli qiymət artımını ört-basdır etmək üçündür. Dünyada bu praktika daha çox öncədən ödənişli paketlərdə tətbiq olunur və Hindistan bu mövzuda ən bariz nümunədir. Orada da operatorlar kütləvi şəkildə 28 günlük sistemə keçmişdilər, lakin istehlakçıların haqlı narazılığından və kütləvi şikayətlərindən sonra dövlətin tənzimləyici qurumu prosesə müdaxilə etdi. Nəticədə operatorlar məcbur qaldılar ki, 28 günlük paketlərlə yanaşı, insanların alışdığı və daha ədalətli olan tam 30 günlük paketləri də yenidən təqdim etsinlər. Yəni bu, bir beynəlxalq standart deyil, tamamilə mənfəət maraqlarına xidmət edən bir addımdır və istehlakçı üçün hər hansı bir faydası yoxdur”.