Mədəniyyət Nazirliyi tərəfindən "İlin ən fəal gənci" adına layiq görülən, TÜRKSOY-un xüsusi mükafat laureatı, "Mənimlə rəqs et" layihəsinin rəhbəri Lalə Aslanur "Qarabağ Mədəniyyət Xəritəsi" festivalında möhtəşəm bir çıxış gerçəkləşdirib.
"DİA-AZ" xəbər verir ki, "Hər rayonun öz səsi" proqramı çərçivəsində keçirilən festivalda sənətçi xüsusi "Qarabağ" rəqs proqramı ilə tamaşaçıları heyran edib.
L.Aslanur öz ifası ilə Qarabağın zəngin mədəni irsini, milli ruhunu və sönməz tarixini unudulmaz bir festival ab-havası içərisində səhnəyə daşıyıb.
Tarixi İçərişəhər Qoşa Qala Meydanında keçirilən tədbiri izləmək üçün yüzlərlə yerli və xarici turist toplaşıb. Aslanur-un enerjili və emosional çıxışı böyük maraqla qarşılandı, tamaşaçılar anları əbədiləşdirmək üçün görüntü almaqdan çəkinmədilər.
Tədbirin finalında TÜRKSOY-un xüsusi mükafat laureatı Lalə Aslanur söz alaraq festivalın təşkilatçılarına belə mənalı və yüksək səviyyəli bir tədbiri həyata keçirdiklərinə görə dərin minnətdarlığını bildirib.
Səhnədən endikdən sonra sənətçi pərəstişkarları ilə xatirə şəkilləri çəkdirdi və onlarla səmimi söhbətlər edib.
