Hacıqabul şəhər H.Z Tağıyev küç ev 142 ünvanında yaşayan Qədirova Kəmalə Baləli qızı tərəfindən SOCAR Azəriqaz İB Baş direktoru cənab Azər Məmmədova müraciət ünvanlanıb. "DİA-AZ" həmin müraciəti təqdim edir:
"Yazıb sizə bildirirəm ki, mən 1970-cı il təvəllüdlü Qədirova Kəmalə Baləli qızı 1989-cu ildən Azəriqaz İB üzrə Hacıqabul rayon Qaz İdarəsi və Şirvan şəhər Qaz İdarəsində müxtəlif vəzifələrdə işləmişəm ;
1) Kadrlar üzrə mütəxəssis
2) Mühəndis (təbii qazın qəbulu və satışı xidməti)
3) Kuryer (2014-2018-ci illərdə)
4) Yerli telefon rabitəsinin telefonçusu (Hacıqabul Xidmət Sahəsi,
Təmir Bərpa Xidməti)
Qeyd edim ki, 2018-ci ildən bu günə qədər Salyan RQİİ Hacıqabul Xidmət Sahəsi, Təmir Bərpa Xidməti üzrə 5-ci dərəcəli "yerli telefon rabitəsinin telefonçusu" vəzifəsində işləyirdim.
17.06.2025-ci il tarixində Salyan RQİİ əməkdaşları tərəfindən mənə ştatların ixtisarı ilə əlaqədar Xəbərdarlıq məktubu təqdim olunub.
Qeyd edim ki, ixtisara düşən işçilərə öncədən bildirmişdilər ki, idarədə boş qalan yerlərdə işləmək sizlərə təklif olunacaq. Lakin mənə heç bir iş təklif olunmadı.
Cənab baş direktor ; mən 36 ildir ki bu qurumda işləyirdim bu yaşdan sonra əmək bazarında işin məhdud sayda olduğu zamanda hara müraciət edə bilərəm. İşim və əmək haqqıma uyğun olaraq hal-hazırda kredit öhdəliyimdə var . Əlavə olaraq qeyd edim ki, həyat yoldaşım da 2-ci qr əlildir.
Sizdən xahiş edirəm yuxarıda qeyd etdiklərimi və ailə vəziyyətimi nəzərə alaraq Hacıqabul XS üzrə boş qalan vakant yerlərdən birinə işə yerləşməm ilə əlaqədar köməklik göstərəsiniz.
Tarix : 14 iyul 2025 ci il"
"DİA-AZ" bildirir ki, bu müraciəti ictimailəşdirən Neftçilərin Hüquqlarının Müdafiəsi Təşkilatının (NHMT) sədri Mirvari Qəhrəmnalı olayı aşağıdakı kimi şərh edib: "Xanımın sadaladığı problemlərlə öz həyatında qarşılaşmayan (zamana ehtiyac var!) yüksək əmək haqlı, bəzən iki vəzifəyə birdən sahib olan, sahə üzrə SOCAR- vəzifəliləri...
36 il bu qurumda işləyən, bu yaşdan sonra əmək bazarında işin məhdud sayda olduğu zamanda bu qadın indi hara müraciət edə bilər?"
