"Hörmətli Cənab Prezident. ​Bu müraciəti etməkdə məqsədim dövlətimizin strateji sütunu olan neft sənayesində, xüsusilə SOCAR-ın "Azneft" İstehsalat Birliyində çalışan dəniz neftçilərinin üzləşdiyi ciddi kadr və idarəetmə problemlərini diqqətinizə çatdırmaqdır..." "DİA-AZ" xəbər verir ki, bunu sözügedən qurumun işçisi Rac Kərimov dövlət başçısı İlham Əliyevə ünvanladığı müraciətində qeyd edib.

Müraciətdə daha sonra deyilir: "İllərdir dənizin ağır şəraitində, polad konstruksiyalar üzərində can qoyan insanların əməyi bu gün "optimallaşdırma" və "müasir kadr islahatları" adı altında həyata keçirilən soyuq bürokratik baryerlərlə qarşı-qarşıya qalıb.
​Cənab Prezident, hazırda tətbiq edilən kadr siyasəti dənizçilərin karyera ümidlərinə və illərlə qazandıqları təcrübəyə böyük zərbə vurur. Şüşəli ofislər və rəqəmsal platformalar üçün nəzərdə tutulmuş korporativ metodlar dənizin ortasındakı istehsalat reallığı ilə tamamilə ziddiyyət təşkil edir. SOCAR-ın rəsmi səhifələrində nümayiş etdirilən "uğur hekayələri" ilə dənizdəki real vəziyyət arasındakı uçurum getdikcə dərinləşir. Çünki mövcud sistem ömrünü quyu ağzında qoyan peşəkarın təcrübəsini deyil, onun qarşısına qoyulan süni "test" və "ümumi müsabiqə" baryerlərini əsas götürür. Görünən odur ki, bu rəhbərlik SOCAR ilə "Mobil Operator Xidmətləri"ni qarışdırıb; neft hasilatının ağır texnoloji prosesini mobil operator xidmətləri ilə eyniləşdirmək sənayemizin gələcəyi üçün təhlükəlidir.
​Xüsusilə vurğulamaq istəyirəm ki, "Azneft" İB-də tətbiq edilən vakansiya siyasəti daxili varislik prinsipini darmadağın edib. Müəyyən bir idarə daxilində vakansiya yarandıqda, həmin işin bütün çətinliklərini çəkmiş, aşağı vəzifədə özünü sübut etmiş peşəkarın vəzifə artımı gözləməsi onun təbii haqqıdır. Lakin İnsan Resursları Departamenti bu vakansiyanı bütün qurum üzrə ümumi dövriyyəyə buraxmaqla, daxili varislik prinsipini məhv edir. Müşahidələr göstərir ki, bu cür qəliz və süni vakansiya tələbləri məhz baş ofisdə oturanların imkanlarına hesablanıb. Bu sistem elə qurulub ki, lazım olan vaxtda lazım olan yerlərə ancaq öz yaxınlarını və qohum-əqrəbalarını yerləşdirsinlər. Nəticədə dənizin soyuğunu-istisini, çörəksiz-susuz günlərini görməyən, istehsalatın içindən gəlməyən şəxslər illərin sınağından keçmiş dənizçinin haqq etdiyi yeri tutur.
​Müasir kadr rəhbərliyi fəhlənin peşə bacarığını kağız üzərindəki balla ölçməyə çalışır. Halbuki dənizdə real peşəkarlıq qəza şəraitində göstərilən çevikliklə, istismar olunan neft quyusunu səsindən tanımaqla ölçülür. Təəssüf ki, təcrübəli qazmaçıların və ya hasilat operatorlarının ustalığını qiymətləndirən xüsusi meyarlar yoxdur; onlar rəqəmsal labirintlərdə azdırılır, idarəetməyə keçidləri isə qəsdən çətinləşdirilir.
​Cənab Prezident, bu yanaşma SOCAR-ın ən böyük gücü olan "insan kapitalının" sürətlə sıradan çıxmasına səbəb olur. İslahat kabinetlərdən çıxıb estakadaların vəziyyəti ilə tanış olmaq, fəhlənin niyə vəzifə artımına cəhd belə etmədiyinin səbəbini soruşmaq deməkdir. İnsanların vəzifə artımı şansını əlindən alıb bunu "şəffaf seçim" adlandırmaq istehsalatın onurğa sütununu sındırmaqdır.
​Sizin hər zaman əməyə və zəhmətkeş insana verdiyiniz yüksək dəyəri rəhbər tutaraq, dəniz neftçilərinin səsinin eşidilməsinə və bu ədalətsiz kadr sisteminin islah olunmasına dəstək olacağınızı ümid edirik. Dəniz neftçisi üçün inkişaf parlaq təqdimatlar deyil, əməyinin real dəyərini görmək və öz evində, öz idarəsində yadlaşdırılmamaqdır.
Dövlət Təhlükəsizliyi Xidmətinin rəisi cənab Əli Nağıyevdən də xahiş edirəm yuxarıda qeyd olunan məqamların nəzarətə götürülməsinə müvafiq tapşırıqlar versin. Son illərdə vakansiya "qaliblərinin" SOCAR-da işləyənlərlə qohumluq əlaqələri barədə obyektiv araşdırma aparılmalıdır..."