“ABB (Beynəlxalq Bank) bankomatları ilə ehtiyatlı olun”.
Yeniavaz.com xəbər verir ki, bunu tanınmış jurnalist, yazıçı İlqar Rəsul sosial şəbəkə hesabında yazıb.
O bildirib ki, iki gün əvvəl, “20 Yanvar” metrostansiyanın yaxınlığındakı bankomatlardan birinə pul çıxarmaq üçün yaxınlaşıb və bankomat ona məxsus kartı “udub”:
“İki addımlıqda bir xanım dayanmışdı, telefonla danışa-danışa mənə baxırdı. Dedim, bəlkə tanışdır, istədim salam verim, düzü tərəddüd etdim. Kartı saldım bankomata, qadın dərhal qulağını telefondan ayırıb dedi ki, “vsyo, sizin də kartı uddu bankomat...”
Sən demə, məndən əvvəl bankomat onun kartını udub. Zəng edib banka, danışa-danışa fikri məndə imiş ki, görsün mənim də kartım gedirmi. Halbuki xəbərdarlıq edə bilərdi.
Mən də zəng elədim banka, danışa-danışa 4 nəfərə də xəbərdarlıq etdim ki, kartı bankomata salmasınlar.
Bankdan dedilər, 35 dəqiqə gözlə orada, bəlkə kart çıxdı, ya da get, 7 gün ərzində sizə xəbər verəcəyik. Getdim.
Bir gün kartsız qaldım. Bu gün səhər evdəkilər cibimə kart qoydular ki, pulsuz qalmayım. Yolumun üstündə ABB bankomatı var. Fikirləşdim, oradan bir az pul çıxarım. Fikirli oldum, bankomatı ötüb keçdim. Geri qayıdanda gördüm, o bankomat da bir xanımın kartını udub. Bilmir nə etsin. “937-yə zəng edin”, deyib oradan aralandım.
Yolda düşündüm ki, deməli, ABB-nin bankomatları bu günlər kart udmaqla məşğuldur. Bəs niyə bank xəbərdarlıq etmir? – sualıma hələ ki, cavab ala bilməmişəm.
Bəlkə kimlərsə belə bir xəbərdarlıq eşidib, TV-də filanda? Mən yox.
Hər halda mən buradan xəbərdarlıq etdim, bilməyənlər üçün. Ehtiyatlı olun”.