UÇURULAN EV BU VİLLANIN QARŞISINDAKI BİRMƏRTƏBƏLİ MÜLKDÜR
Xətai rayon Polis İdarəsinin sabiq bölmə rəisi Mirəli Seyidzadə 14 yaşlı qızının və 8 yaşlı oğlunun göz yaşlarına niyə hələ də inanmır?
Bakı şəhər Prokurorluğu Xətai rayon Məhkəmə icraçılarının istinad etdiyi sərəncamı niyə saxta çıxarıb?
Bakı şəhər sakini, şəhid Eldar Kamil oğlu Arazovun qızı Arzu Seyidzadənin şikayət məktubu daxil olub. Şikayət məktubuna əlavə edilmiş sənədlərin ciddi araşdırılmasına zərurət yarandığından növbəti sayımızda ətraflı bəhs ediləcək.
Hələlik isə bir sıra vacib məqamı qeyd etmək istəyirik. Qeyd edək ki, Arzu Seyidzadə dünən redaksiyamızda oldu və qəzetimizə geniş müsahibə verdi. İki azyaşlı uşaq anası olan A.Seyidzadə ölkədə çox tanınan bir insanın çox yaxın qohumudur. Ən maraqlısı budur ki, biz bunu şikayətçi xanım redaksiyadan gedəndən sonra bildik. Hələlik bu barədə susmağa qərar veririk. Amma bircə məqamı mütləq qeyd etməliyik ki, Arzu Seyidzadə ilə ailə həyatı quran Xətai rayon Polis İdarəsinin sabiq bölmə rəisi Mirəli Seyidzadənin bir zamanlar sürətlə irəli getməsi də bu qohumluqdan bəhrələnib. Amma... Allah zamanın üzünü qara eləsin, həmin adını çəkmək istəmədiyimiz şəxs başqa vəzifəyə keçiriləndən sonra M.Seyidzadə bu qohumluğu rəsmi qaydada pozmaq eşqinə düşür və nigah pozulur. Buna digər ciddi səbəblərin də olduğunu deyən Arzu Seyidzadənin müsahibəsindəki sərt açıqlamaları sonraya saxlayaraq qayıdaq indiki məqama...
12 il əvvəlki saxta sərəncam niyə indi üzə çıxıb?
Bu yerdə bir dəhşətli məsələni də diqqətə çatdıraq ki, redaksiyaya həmçinin Mirəli Seyidzadənin 14 yaşlı məktəbli qızı Ləman Seyidzadədən atasına "Açıq məktub"u da daxil olub. Adamı dəhşət bürüyür: ata öz azyaşlı övladlarının məskunlaşdığı evi məhkəmə qərarı ilə yerlə yeksan etdirir! Niyə?
Məsələyə bir az keçmişdən qayıdaq: M.Seyidzadə bir gün yuxarıda qeyd etdiyimiz və hələki yazmağı vacib saymadığımız bəzi səbəblərdən ailəsi ilə nigahı rəsmən pozur. Elə bundan sonra onun yadına düşür ki, qonşuluqda yaşayan bu ailəni yeganə sığınacaq yeri olan evdən və ərazidən (gözünün qabağından) uzaqlaşdırsın. Bunun üçün hardansa(Məlumdur hardan. Bu barədə də az sonra) Xətai rayon İH başçısının saxta sərəncamı üzə çıxır. Qısaca olaraq deyək ki, həmin sərəncamı əsas tutan M.Seyidzadə Xətai rayon Məhkəməsinə üz tutur və iddia qaldıraraq həmin sərəncama əsasən onun rəsmi nigahdan ayrıldığı, iki azyaşlı övladlarının yaşadığı evin torpaq sahəsinin ona məxsus olmasını əsas tutaraq ərazinin boşaldılmasını, evin sökülməsini məhkəmədən xahiş edir. Hakim Habil Məmmədov isə 21 oktyabr 2010-cu ildə tələm-tələsik qətnamə çıxararaq iddianı əlüstü təmin edir. Və dərhal icraya yönəldir. Sonra qarşı tərəf Bakı Apellyasiya Məhkəməsinə şikayət verir, əvvəlki qətnamə qüvvədə saxlanılır... Ali Məhkəməyə verilmiş kassasiya şikayətinə baxan hakimlər kollegiyas isə bu dəfə "Əlinin papağını Vəlinin başına, Vəlinin papağını isə Əlinin başına" prinsipini rəhbər tutur, yəni iddia qismən təmin edilir: əvvəlki qənamələrdə evin söküntüsü Arzu Seyidzadənin boynuna qoyulmuşdusa, bu dəvə bu söküntü Mirhəsən Seyidzadəyə tapşırılır! Ev söküləndən sonra lap onu Həsənqulu söksün, bunun iki körpə uşağı olan gənc anaya nə isti-soyuqluğu?!
***
Beləliklə, bu gün saat 11-00-da ata Mirəli Seyidzadə saxta sənədlər hesabına hasilə gəlmiş məhkəmə qətnaməsini əsas tutub evi azyaşlı övladlarının başına uçuracaq! Bu işi Xətai məhkəmə icraçıları həyata keçirəcək. Halbuki ortada həmin qətnamənin istinad edildiyi yeganə sənəd-Xətai RİH başçısının 17 iyun 1999-cu il tarixli 199 saylı sərəncamı saxta çıxıb. Belə ki, şikayətçi A.Seyidzadə 18.11.2010-cu il tarixdə Nəsimi rayon Prokurorluğuna şikayət verərək Mirəli Seyidzadənin sənəd saxtalaşdırdığını bildirmişdir. Nəsimi rayon Prokurorluğuna verilmiş ərizə araşdırılmış, sonra Bakı şəhər Baş Polis İdarəsinin İstintaq və Təhqiqat İdarəsində araşdırma aparılaraq toplanmış sənədlər Bakı şəhər Prokurorluğuna verilmişdir. Şikayət ərizəsi üzrə aparılmış təhqiqat əsasında hazırlanaraq Bakı şəhər Prokurorluğuna təqdim edilmiş rəsmi arayışda isə göstərilir: "...Odur ki, vətəndaş Məmmədov Gündüz üzeyir oğlunun barəsində Az.Res. CM-nin 313 və 320-ci maddələri ilə cinayət işinin başlanılması və ibtidai istintaq aparılması məqsədəmüvafiqdir".
İbtidai istintaq isə davam edir. İstintaq davam edirsə, məhkəmə icraçıları mübahisəli ərazidə tikilmiş evi, özü də qışın indiki bu soyuğunda və qar-yağışında azyaşlı körpələrin başına necə uçura bilər axı? Doğrudanmı ata Mirəli Seyidzadə öz övladlarının göz yaşlarına hələ də inanmır? Hansı ki, həmin uşaqlar 3 ildir "Ata, sən hardasan?" deyrək gözü yaşlıdırlar...
- Xətai RİH başçısının 17 iyun 1999-cu il tarixli 199 saylı sərəncamını kim saxtalaşdırıb?
- Bu saxta sərəncam Mirəli Seyidzadəyə necə verilib?
- Xətai rayon Məhkəməsi həmin saxta sərəncama hüquqi qiymət verilməsi üçün xüsusi qərardad çıxararaq niyə aidiyyəti prokurorluq orqanlarına göndərməyib?
- Bakı şəhər Prokurorluğunun bu sərəncamın araşdırılması üzrə qərarında nələrdən bəhs olunur?
- Mirəli Seyidzadəni və onun xeyrinə saxta sənəd əsasında qətnamə çıxarmış hakim Habil Məmmədovu hansı qanuni cəza gözləyir?
- 14 yaşlı Ləman Seyidzadənin atası Mirəli Seyidzadəyə yazdığı ürəkparçalayan "açıq məktub"unda nələr var?
(Ardı var)
P.S.Qeyd edək ki, evi uçurulan Arzu Seyidzadə 1992-ci il fevralın 16-da Xocavəndin Qaradağlı kəndində gedən ağır döyüşlərdə şəhid olmuş Eldar Kamil oğlu Arazovun qızıdır. Onun yaşadığı evin divarında şəhidin barelyefi vardır. Dərdə bax: torpaq uğrunda şəhid olan atanın ailə üzvləri indi Bakıda bir qarış torpağın güdazına verilir...
