“MƏHKƏMƏYƏ 45 NƏFƏRİ BİR “VORONOK” DA GƏTİRMİŞDİLƏR”
Müsahibimiz “Xural” qəzetinin əməkdaşı Nurəddin Xocadır.
- Əvəz Zeynallının işində nə yeniliklər var?
- Situatsiya ağır sabit olaraq qalır. Heç bir istintaq hərəkəti aparılmır, təzə heç nə yoxdur. Basqılar yerində, Əvəzə qarşı kobudluqlar, qanunsuzluqlar davam edir. Bir neçə gün əvvəl Əvəz bəyin həbs qəti imkan tədbirini, ev dustaqlığı ilə əvəz etmək üçün vəkil Elçin Sadıqov məhkəməyə müraciət etmişdi. Prosses boyu Əvəz bəyin məhkəmə zalında əllərindən qandallar açılmadı. Məhkəmə prosesi qapalı keçməsinə baxmayaraq Əvəz bəy bütün proses boyu məhkəmədə əli qandallı oturmalı oldu. Vəkili ilə danışmaq üçün ona heç bir şərait yaradılmadı. Məhkəməyə 45 nəfəri bir “voronok” da gətirmişdilər. Daha nələri deyim. Bu ədalət məhkəməsi deyil, ədəlatin mühakiməsidir. Hər şey əvvəlcədən sifariş əsasında hazırlanmışdı, nəticə bəlli idi. Lakin bu məlum olan şeyləri belə insana əzab, işgəncə ilə çatdırırlar.
- Nə üçün hesab edirsiniz ki, baş verənlər siafrişdir, bəlkə ortada hansısa sübutlar var?
- Baxın mən 2 ildir ki, hər gün Əvəz bəylə bir yerdəyəm. Dostam, onun xətrini bir kiçik qardaşım qədər istəyirəm. Vallah o mənə mənim cavanlığımı xatırladır. Sərt, dönməz, heç bir avtoritetləri qəbul etməyən!! Yəni əgər bu insan onun qəlbinə ağlı ilə, əqidəsi ilə, düzlüyü ilə, hakim kəsilməyibsə kimliyindən asılı olmayaraq Əvəz bəy onu qəbul etməzdi. O özü də tənqidi qəbul edir və tənqid oluna bilməyən bir adam tanımadığını deyirdi. Əgər Əvəz bəyin günahı var idisə niyə onun qəzetini bağladılar? Niyə “ Xural” qəzetini qoymadılar çıxmağa? Axı qəzetə qarşı heç bir məhkəmə qərarı yoxdur! Baş redaktorumuzun həbsindən sonra kollektiv olaraq yeni qəzet nəşr etməyə çalışdıq. Əgər Əvəz bəy günahkardırsa kollektiv günahkar deyildi axı. Bu sadə məntiqdir. Amma bu sadə ədalət prinsipləri də qorunmadı. Şəxsən mənim yeni qəzet nəşr etməklə, onu qeydiyyata aldırmaqla bağlı düz dört müraciətim cavabsız qalıb.
- Neçə dəfə Ədliyyə Nazirliyinə müraciət etmisiniz?
- Düz dört qəzetlə bağlı. “ Yeni Xural”, “ Çağdaş Xural”, “ Müasir Xural”, “ Kural”. Heç birinə rəsmi cavab almamışam. Qeyri rəsmi isə deyiblər ki o adla bağlı qəzet buraxmaq olmaz. Niyə, “ Yeni Musavat”, “ Müasir Musavat”, “ Azadlıq”, “ Azadlıq +” olar, amma bizə olmaz. Niyə? Çünki Əvəz Zeynallı ixtiyar sahiblərinin sifarişi ilə tutulub. Sonra, bu qədər vaxt idi ki, yazıram, mənə bir kəlmə deyən olmayıb. Amma Əvəz bəy həbs olunandan sonra maşınım vuruldu, maşınımı qoyub getdim gəldim ki, kapotu əziblər, qabaq şüşəni sındırıblar, evimə və özümə zənglər olub. Hamısı bu qısa müddətdə. Eləcə də redaktorumuz Anar Niftəliyevə zəng edib təhdid edirlər. O da nə qədər vaxtdır “ Azadlıq” qəzetində köşə yazır. Bu vaxta qədər bir kəlmə söz deyən olmayıb nəinki, təhdid edən. Artıq onu da təhdid edirlər. Tutaq ki, bunlar hamısı təsadüflərdir, mən qəbul edə bilərəm. Amma bizim təzə buraxdığımız “ ASİ” qəzetinin qeyri rəsmi çapına qadağa qoyulmasına görəsən skeptiklər nə deyər? Bəli bu artıq nə anonim zəng, nə də anonim maşın dağıdaraq, guya bizə xəbərdarlıq etməkdir. Əməkdaşımız Kamran Zamanlını, gerbli bir maşınla qovalayıb saxlamaq istəmişdilər. Yaxşı ki, yaxındakı polis məntəqəsinə girə bilib, yoxsa Allah bilir nə ola bilərdi? Niyə? Çünki o Əvəz bəyin ailəsini aparıb gətirirdi? Əvəz bəyin vaxtında yoldaşı bizimlə işləyirdi. Nə oldu? Kamranı bir müddət redaksiya işindən uzaqlaşdırdıq. Hər şey sakitləşdi. Bizə qarşı yönəlmiş hər bir hərəkət bizi Əvəz Zeynallının müdafiəsindən uzaqlaşdırmaq üçün atılmış addımlardır. Əvəz Zeynallı vicdan məhbusudur. Əvəz Zeynallını susdurmaq üçün həbs ediblər. Baxın, görəsən daha nə qədər sübut lazımdır ki, Əvəz Zeynallının günahsız yerə tutulduğuna inanasınız?
- Son durum necədir? Əvəz bəyin müdafiəsi nə səviyyədədir?
- Bilirsiniz mən hamılıqla bütün azad mətbuata təşəkkürümü bildirmək istəyirəm. Doğurdan da bizim mətbuatda böyük kişilər var. Bu sözü Əvəz bəydən oğurlamışam. Mehman Əliyev, Emin Hüseynov, Rauf Arifoğlu, Qənimət Zahid, Şirin Cəfəri və adını çəkmədiyim bir çoxlarına bu sözü həqiqətən yaraşdırıram. Onlar həqiqətən mətbu həmrəylik göstərdilər və göstərirlər. Mən adlarını çəkdiyim və çəkmədiyim bu kişilərlə bir səfdə olduğum üçün fəxr edirəm. Çünki, ağır gündə bütün hökumət Əvəz Zeynallının üstünə gələndə onlar geri durmadılar və indi də durmurlar. Amma bu heç də Əvəz bəyi müdafiə edən partiyaların və QHT- lərin rolunu kiçiltmir. Musavat partiyasının bizə redaksiya üçün yer verməsini qeyd etməyim burada yerinə düşür. Onların verdikləri bəyanatlar beynəlxalq təşkilatların Əvəz bəyin müdafiəsinə səfərbər olmasında böyük rolu oldu. Bəli bütün azad mətbuat, siyasi partiyalar və müstəqil hüquq müdafiəsi təşkilatları Əvəz bəyin siyasi sifarişlə tutulduğunu bəyan etdi. Eynulla bəy, Novella xanım, Səadət xanım, Leyla xanım Əvəz bəyin həqiqətən günahsız tutulduğunu dünyaya bəyan etdilər.
- Görülməmiş bir iş qalıbmı? Mətbuatla bağlı yeni təklif və ya hansısa kampaniyalar həyata keçirəcəksinizmi?
- Bəli bir arzum, daha doğrusu, mətbuatdan bir xahişim var. Siyasi və vicdan məhbuslarının şəkillərini çap edib onlara azadlıq tələb edən qəzetlərimiz Əvəz Zeynallının şəklini bu siyahıya əlavə etsə yaxşı olar. Hər halda “ Xural”- ın bazasında çap olunan “ ASİ” qəzetinin çəmi bir nömrə işıq üzü görərək bağlanması çox şeylərdən xəbər verir. Azərbaycanın azad mətbuatı şəkillərini çap etdiyi həbsxanada olan mübarizə qardaşlarımızın şəkil qalereyasına Əvəz bəyin də şəklini əlavə edəcəyinə inanıram. Bütün qadağalara baxmayaraq Əvəz Zeynallı məhbəsdə də düşünür, yaradır, mübarizə aparır. O nəinki öz azadlığı uğrunda, başqalarına qarşı olan haqsızlıqlara qarşıda mübarizə aparır. Elə bu yaxınlarda onun “ Yeni Musavat” qəzetinə qarşı başladılmış savaşı pisləməsi və bu mübarizə də özünün “ Yeni Musavat” qəzeti ilə bir yerdə olması haqda verdiyi bəyanat, məhbəsdən yazdığı analıtık yazılar buna sübutdur.
