SUMQAYITDA KORRUPSİYA TÜĞYAN EDİR
DİA.AZ: - Redaksiyamıza müraciət edən şikayətçilərdən biri Sumqayıt şəhəri, 12-ci mikrorayon, bina 7a, mənzil 44 ünvanında müvəqqəti məskunlaşmış Qubadlı rayonundan məcburi köçkün Tümən Əhmədovadır. Şikayətçi yazır ki, həyat yoldaşı 1993-cü ildə Qubadlının işğal edilməsindən sonra ağır stress keçirib və vəfat edib. Hazırda o, oğlu, qızı, gəlini və nəvəsi ilə birlikdə yaşayır: "Həyat yoldaşım dünyasını dəyişəndən çətin, ağrılı günlərin dəhşətlərini yaşamağa məhkum oldum. Ailəni dolandıra bilmədiyim üçün 2005-ci ildə ölkə prezidenti İlham Əliyevə rəsmi olaraq müraciət etdim. Bu müraciətdən sonra dolanışığımızın ağır olduğunu nəzərə alan Sumqayıt şəhər İcra Hakimiyyəti qeyri-rəsmi olaraq mənə "Yaşıl dərə" adlanan yerdə torpaq sahəsi verdi".
Tümən Əhmədova min bir əziyyətlə həmin torpaq sahəsini yararlı hala salıb və o vaxtdan orada tərəvəz məhsulları yetişdirib satmaqla ailəsini dolandırıb. Lakin bir müddət sonra həmin torpaq sahəsi Tümən Əhmədovanın əlindən alınıb: "Yerli məmurlar neçə illərdir ki, bizim hüquqlarımızı pozur, başımıza olmazın müsibətlər açırlar. Sizə şikayət etməyimə səbəb də elə onların özbaşınalıqlarının görünməmiş həddə çatmasıdır".
Qeyd edək ki, Tümən Əhmədova bu özbaşınalıqlarla bağlı prezident İlham Əliyevə də müraciət edib. O, həmin müraciətində yazır ki, şəhər bələdiyyəsinin üzvləri - Fətulla, Kamran və Bilal Sumqayıt sakinləri - Paşayev Cəfər Mikayıl oğlu, Cəbiyev Nizami Xanqulu oğlu, Məmmədov Malik Əziz oğlundan pul alaraq ona məxsus torpaq sahəsini həmin şəxslərə satıblar. Tümən Əhmədova torpaq sahəsinin məcburi köçkün ailəsi kimi ona İcra Hakimiyyəti tərəfindən verildiyini bildirsə də, buna məhəl qoyulmayıb. Həmin torpaq sahəsi zorla onun əlində alınıb. Tümən Əhmədovanın sözlərinə görə, Cəfər Paşayev, Nizami Cəbiyev və Malik Məmmədovun əlində torpağın onlara vrilməsi barədə heç bir sənəd yoxdur, onlar özbaşına olaraq torpağı zəbt edib və orada tikinti işləri aparıblar.
Ailənin dolanışıq mənbəyi olan torpaq zorla əlindən alınandan sonra Tümən Əhmədova məcburiyyət qarşısında qalıb 11-ci mikrorayondakı çayxanalardan birində işə düzəlib. Lakin o, bu ədalətsizliklə barışmayıb və torpağın əlindən alınması ilə əlaqədar müxtəlif instansiyalara müraciət edib. Tümən Əhmədova yazır ki, saysız-hesabsız müraciətlərinə baxmayaraq, icra hakimiyyəti, bələdiyyə, polis və məhkəmə orqanları onun şikayəti ilə bağlı tədbir görməyib: "Əksinə bütün yerli qurumlar birləşib torpağımı əlimdən alan pullu adamların tərəfini tutur, onların mövqeyini müdafiə edirlər. Cəfər Paşayev, Nizami Cəbiyev və Malik Məmmədov torpağı əlimdən almaqla kifayətlənməyib, Bələdiyyəyə verdikləri pulu məndən almaq üçün polis orqanları və məhkəmələrdə mənə qarşı iş qaldırıblar. Sumqayıt şəhəri, 8-ci mikrorayonda yerləşən 1-ci polis bölməsində işləyən Sahib adlı şəxs isə mənimlə bağlı işi xətm edəcəyinə söz verib, məndən və mənimlə birlikdə olan Qubadlı rayonundan məcburi köçkün, 11-ci mikrorayon, bina 2b, mənzil 22 ünvanında məskunlaşmış Mütəllibova Ayna Saleh qızından 3500 ABŞ dolları aldı. Sahib dələduzluq yolu ilə bizi aldadıb aradan çıxdı".
Tümən Əhmədova yazır ki, Cəfər Paşayev, Nizami Cəbiyev və Malik Məmmədov Sumqayıt Şəhər Polis İdarəsi və məhkəmələrə müraciət edərək ona qarşı yalançı və böhtançı ittihamlarla iddia qaldırmaqda davam ediblər: "Onların şikayətinə baxan Sumqayıt Şəhər Polis Şöbəsinin müstəntiqi Emin Bədəlov isə hansı müəmmalı səbəbdənsə şikayəti təmin edərək mənə qarşı heç bir əsas olmadan cinayət işi açıb və məni axtarışa verib. Hansı ki, mən daim 11-ci mikrorayonda çayxanada olmuşam, məni tanıyanlardan soruşsaydılar çayxanada olduğumu deyərdilər. Emin Bədəlov hədə-qorxu gəlməklə, həbs edəcəyi ilə qorxutmaqla məndən vəkilim Abbasov Tahir Əhməd oğlunun yanında 1800 manat rüşvət alıb və 26 aprel 2010-cu ildə işi məhkəməyə göndərib".
Həmin işə 11 iyun 2010-cu ildə Sumqayıt şəhər Məhkəməsində baxılıb. Məhkəmənin qərarı ilə Tümən Əhmədovaya 3500 manat cərimə kəsilib: "Bu səbəbdən də mənim ümumvətəndaşlıq pasportum Miqrasiya İdarəsində saxlanılır". Lakin şikayətçi polis idarəsində ona hansı maddə ilə iş açıldığı, eyni zamanda məhkəmənin ona nə səbəbdən cərimə kəsdiyi barədə konkret bilgi vermir. O, yalnız bütün bunların qanusuzluq yolu ilə edildiyini bildirir. Tümən Əhmədovanın məktubundan aydın olur ki, ona kəsilmiş 3500 manatlıq cərimə hökmü Sumqayıt Apellyasiya Məhkəməsi və Ali Məhkəmənin Kollegiyası tərəfindən də qüvvədə saxlanılıb: "Mənə qarşı qaldırılmış iddialar tamimilə əsassız, quraşdırma və böhtan xarakterli idi, cərimə tələbi də qanundankənar və saxta tələbdir".
Tümən Əhmədova prezident İlham Əliyevə ünvanladığı mətubunda daha sonra yazır: "Cənab prezident, sizdən xahişim odur ki, sözügedən məsələni nəzarətə götürüb diqqətdə saxlamaqla kimsəsiz, düşmən tərəfindən öz doğma torpağından qovulmuş məcburi köçkün kimi mənə, atasız böyütdüyüm uşaqlarıma yardımçı olasınız və bizə zülm edənlərin cəzalandırılması üçün tədbirlər görəsiniz".
Şikayətçi ölkə başçısından həmçinin, Sumqayıt Şəhər Polis İdarəsinin 1-ci polis bölməsinin polis mayoru Sahibdən 3500 ABŞ dollarının, Sumqayıt şəhər Polis İdarəsinin müstəntiqi Emin Bədəlovdan 1800 manat pulunun alınıb qaytarılmasında, heç bir əsas olmadan ona 3500 manat məbləğində kəsilmiş cərimənin ləğv edilməsində, ona qarşı torpaq və 11920 manat pul iddiası qaldıran şəxslərin tələbinin əsassız sayılmasında, zorla zəbt edilmiş torpaq payının və ümumvətəndaşlıq pasportunun qaytarılmasında yardımçı olmağı xahiş edir.
Sonda onu da qeyd edək ki, məcburi köçkün Tümən Əhmədova öz məktubunda bir sıra konkret şəxsləri, o cümlədən polis mayoru olan Sahib adlı şəxsi, müstəntiq Emin Bədəlovu rüşvət almaqda, onun torpağını əlindən alan Cəfər Paşayev, Nizami Cəbiyev və Malik Məmmədovu isə digər cinayətlərdə ittiham edir. Biz həmin şəxslərlə əlaqə yaratmağa çalışsaq da, cəhdlərimiz baş tutmadı. Bununla belə, Tümən Əhmədovanın ittiham etdiyi şəxslərin mövqeyini də işıqlandırmağa hazırıq.
