BU DƏFƏ “QUSKA”YA GÖRƏ MANDATINDAN OLMUŞ TAĞIYEV HƏDƏFƏ ALINIB
DİA.AZ: - "Avropa Qapıları" adı ilə qapı və mebel istehsal edən "Tağıyev" şirkəti tərəfindən istehlakçı hüquqlarının pozulması barədə bəzi vətəndaşların şikayətləri çoxaldıqca Baba Tağıyevin biznes imperiyası üçün hansı təhlükələrin mövcud olması üzə çıxır. Qeyd edək ki, bir zamanlar Milli Məclisin deputatı olmuş və eyni zamanda hazırda axtarışa verilən sabiq millət vəkili Hüseyn Abdullayevlə kifayət qədər yaxın olmuş Baba Tağıyev hələ 2009-cu ildə "Avropa qapıları" üçün yaranmış labüd təhlükəni aradan qaldıra bildi. Müvafiq orqanların vergi yoxlamaları, habelə digər monitorinqlər zamanı üzə çıxarılmış bir sıra çatışmazlıqlar aradan qaldırıldı. Çünki onda Baba Tağıyev deputat idi və biznes imperiyasının toxunulmazlığını qoruyub saxlaya bilirdi. Amma bütün bunlara baxmayaraq, "Avropa qapıları" ilə bağlı şikayətlər səngimirdi.
Belə ki, "Avropa Qapıları" adı ilə qapı və mebel istehsal edən "Tağıyev" şirkəti tərəfindən istehlakçı hüquqlarının pozulması barədə vətəndaşlar Yarməmməd Əhmədov və Məhəmmədəli Əfəndiyev tərəfindən İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə təqdim edilmiş materiallar əsasında aparılmış araşdırmalar nəticəsində istehlakçıların hüquqlarının pozulmasının aradan qaldırılması barədə Dövlət Xidməti tərəfindən "Tağıyev" şirkətinə icrası məcburi göstəriş verildi. Göstərişin yerinə yetirilməsi barədə şirkət tərəfindən Dövlət Xidmətinə məlumat verilmədiyi üçün göstərişin icra vəziyyətinin müəyyən edilməsi məqsədilə "Tağıyev" şirkətində yoxlama aparıldı. Yoxlama nəticəsində "Tağıyev" şirkəti tərəfindən vətəndaşlar Yarməmməd Əhmədov və Məhəmmədəli Əfəndiyevlə bağlanmış müqavilələrdə nəzərdə tutulan müddətlərə əməl olunmadığı, ödəniş şərtləri pozularaq hazırlanmış məhsulların dəyərinin istehlakçılardan onların faktiki ünvanında deyil, yaşadıqları binanın həyətində tələb olunduğu müəyyən olundu. Aşkar edilmiş pozuntularla əlaqədar müəssisəyə mövcud qanunvericiliyə uyğun olaraq, 4000 manat məbləğində cərimə tətbiq edildi. Bundan sonra isə istehlakçıların hüquqlarının bərpa olunması barədə Dövlət Xidməti tərəfindən "Tağıyev" şirkətinə verilmiş icrası məcburi göstərişin yerinə yetirilməsinin təmin olunması məqsədilə qanunvericilikdə nəzərdə tutulmuş əlavə tədbirlər görüldü.
Baba Tağıyevin şirkətinin müştəriləri aldatması barədə ittihamlar bununla yekunlaşmır. Uzun müddətdir ortalarda görünməyən Baba Tağıyevə məxsus "Avropa Qapıları" şirkətinin müştəriləri aldatması ciddi qanun pozuntularından xəbər verir. Sektorun ən böyük istehsalçısı hesab edilən "Avropa Qapıları" a T.S şirkətinin bazara təklif etdiyi qapı, pəncərə, ev, ofis və bağ evləri üçün mebellərin keyfiyyətini, zavodun istehsal prinsiplərini araşdırdıq. Araşdırmalar zamanı "Avropa Qapıları"nın əhaliyə təqdim etdiyi məhsulların keyfiyyətinin heç də ürəkaçan olmadığı üzə çıxdı. Belə ki, yüksək keyfiyyətlə hazırlandığı iddia edilən bu məhsullar əslində insan həyatı üçün zərərli olmaqla yanaşı, beynəlxalq standartlara əməl edilmədən istehsal olunur. Faktlara diqqət edək - 1993-cü ildən bu tərəfə şirkətin nə məhsullarının dizaynında, nə istehsal prosesində, nə də keyfiyyətində dəyişiklik baş verib. "Avropa Qapıları" şirkəti hələ də məhsullarının ekoloji keyfiyyət normasını açıqlamayıb. Baba Tağıyevin gəlir mənbəyi sayılan bu biznes strukturunun istehsal etdiyi məhsulların beynəlxalq və yerli standartlara uyğun olub-olmamağını yoxlamaq üçün keyfiyyət sınaq laboratoriyası belə yoxdur. Rəsmi internet saytında fabrikin istehsalatda Avropa texnologiyasından və avadanlığından istifadə etdiyi bildirilsə də, həmin texnologiyanın nədən ibarət olduğu, avadanlıqların adları açıqlanmır. Eləcə də ötən10 ildə şirkətin istehsal texnologiyasında hansısa reform etdiyi göstərilmir. Əslində məhsulun keyfiyyətini artırmaq məqsədilə zəruri dəyişikliklər böyük miqdarda sərmayə yatırımı tələb etdiyindən, görünür, şirkət üçün bu reformlar sərfəli olmayıb.
DİA.AZ-ın araşdırmalar nəticəsində o da məlum oldu ki, bazara bahalı mal təklif edən şirkət istehsalda keyfiyyətsiz materiallardan, zəhərli ağac növlərindən istifadə edir. Həmin məhsullar əsasən idxal olunur. Şirkət bunu özü də rəsmi internet ünvanında təsdiqləyərək bildirir ki, xammal istehsal və komplektləşdirmə üçün tələb olunan məhsullar, lak-boya materialları, həmçinin aksessuarlar İtaliya, Türkiyə, İran, Rusiya, Gürcüstan kimi xarici dövlətlərin şirkətlərindən alınır. Maraqlıdır ki, bunun üçün adıçəkilən ölkələrin hansı şirkətləri ilə razılaşıldığı açıqlanmır. Eyni zamanda idxal olunan xammalın ekoloji keyfiyyət normasına, antibakteriallığına, müxtəlif fiziki və kimyəvi təsirlərə qarşı nə dərəcədə dayanıqlı olduğuna dair sertifikatların adları çəkilmir. Bütün bunlar bir yana, şirkət komplektləşdirmə üçün tələb olunan məhsulları, lak-boya materialları, həmçinin aksessuarları İran və Türkiyədən gətirir. Xammal kimi istifadə edilən zərərli ağaclar isə Rusiyadan idxal olunur. Hansı ki, həmin ağac materialları zərərli olduğundan Rusiyanın mebel sənayesində onun istifadəsinə icazə verilmir. Şirkətin məhsullarının keyfiyyətindəki problem təkcə xammalla bağlı deyil. Materialların parlaqlığı, səthlərinin cızığa qarşı dayanıqlığı, aşınma, nəmlik dərəcəsi, qırılma (bükülmə) parametrləri, paslanmaya qarşı davamlılıqları kimi məsələlər hələ də sirr kimi qapalı saxlanılır. Görünür, şirkət istehsal prosesində bunları nəzərə almır. Digər tərəfdən təcrübə göstərir ki, qapılara iki qıfıl əvəzinə bir qıfıl qoyulur. İstehsalda təkcə zərərli ağac növlərindən deyil, keyfiyyətsiz materiallardan istifadə olunur. Nəticədə qapı, pəncərələr tez müddətdə sıradan çıxır. O cümlədən taxta məhsulları standartlara cavab vermədiyindən qapılarda əyilmə baş verir. Çox zaman quraşdırıldıqdan sonra xışıltı səsləri çıxarır. Bəzi hallarda isə qapılara qurd düşür.
O da maraqlıdır ki, şirkətin özü də məhsullarına zəmanət vermir. "Avropa Qapıları" məhsullarının zəmanət müddətini göstərmir, sadəcə zərbəyə qarşı davamlı olduğunu bildirir. Halbuki şirkətin təklif etdiyi qiymətlər məhsulların keyfiyyəti ilə bağlı daha dəqiq zəmanət sertifikatının verilməsini tələb edir.
Qeyd edək ki, Baba Tağıyevin himayəsində olan bu şirkətin fəaliyyətindəki qaranlıq məqamlar ciddi şəkildə araşdırılacaq. Əldə etdiyimiz xəbərlərə görə, yoxlamalar ciddi pozuntuları üzə çıxara bilər. Nəticə uzun müddətdir sabiq deputata məxsus olan şirkətinin onun əlindən alınması, ya da bazardakı inhisarçı mövqelərinin sarsıdılmasına səbəb ola bilər. Halbuki indiyədək hökumətdəki himayədarları vasitəsi ilə keçmiş millət vəkili bu təhlükələrdən can qurtarıb. Bir sözlə, "Avropa qapıları" bağlana bilər. Yaxşı olardı ki, şirkət öz fəaliyyətinə korrektələr etsin.
