BİLƏSUVAR SAKİNLƏRİ ALLAH ÜMİDİNDƏ...
Biləsuvar rayonunun Xırmandalı kənd sakini, II qrup əlil Maqsud Mustafayevin yerli məmurlardan şikayət məktubunu dərc etmişdik. Bu günlərdə redaksiyamıza M.Mustafayevin daha bir şikayət məktubu daxil olub.
Həmin məktubu olduğu kimi dərc edirik: “Biləsuvar son vaxtlar bir qrup oliqarxın at oynatdığı meydana çevrilib. Bu adamlar təkcə öz ailələrinin təlabatlarını ödəməklə kifayətlənmir, həm də öz qohum-əqrəbalarını, dost-tanışlarını himayələri altına alaraq dövlətin və xalqın sərvətini mənimsəyirlər.
Rayon sakinlərini təsbeh kimi əlində oynadıb, barmağıına sarıyanlardan biri Biləsuvar RİH başçısının birinci müavini, 75 yaşlı Akif Kazımovdur. O, rayondakı abadlıq işləri üçün nəzərdə tutulan maliyyədən tutmuş xırda-para təsərrüfata qədər ayrılan pulların “silinməsinə” nəzarət edir.
Məlum olduğu kimi, Biləsuvar iri kənd təsərrüfatı rayonudur. Əhaliyə pay torpaqları parçalanmış şəkildə verilib. Belə ki, zavalı kəndliyə verilən 1-2 hektarlıq pay torpağının bir hissəsi digərindən 20-30 km aralıda yerləşir. Bu da kəndlini torpaqdan soyudur. A.Kazımov da həmin əraziləri yaxınlarına satır. Onu da qeyd edim ki, A.Kazımov və yaxın çevrəsi (qohum-əqrəbaları) dövlət və bələdiyyə torpaqlarına da müdaxilə edir. Rayonun Babaş və Nərgiz adlanan ucqar torpaqları daha münbit olduğundan artıq neçə illərdir mənimsənilib. Mən hələ İranla sərhəddə yerləşən 500 hektardan artıq olan dəmyə torpaq sahələrini demirəm.
A.Kazımovun torpaqdan əlavə, çoxlu sayda balıq vətəgəsi yaratmaqla da ad çıxarıb. Qeyd etdiyim kimi, rayonun abadlıq işlərinə prezidentin sərəncamı ilə ayrılan pulların mənimsənilməsində Akif Kazımovun “əvəzsiz rolu” var. Dövlət vəsaitini podratçı təşkilatların rəhbərləri ilə şərikli mənimsəyən Akif Kazımov “itkilərin” yerini doldurmaq üçün rayonun idarə və müəssisə rəhbərlərinin, sahibkarların boynuna qeyri-qanuni vergilər yükləyir. Zərbə sonda qara camaata dəyir. Belə olan halda, camaat arasında narazılıq yaranır, dövlətdən incik salınır. Başqa bir misal, Xırmandalı kənd qəbiristanlığına gedən 1,5 km-lik yolun asfaltlaşdırılması nəzərdə tutulduğu halda, A.Kazımovun təkidi ilə işin səmti dəyişdirilərək, onun yaşadığı küçə asfaltlaşdırıldı.
Rayonda digər yeyinti işlərini həyata keçirənlərdən biri də Biləsuvar RİH başçısının aqrar məsələlər üzrə müavini Rafael Quliyevdir. Onun “biznesi” daha rəngarəngdir. Rayondakı əkilməyən və ya şoran torpaqları əkilmiş kimi təqdim edən və rəsmiləşdirən R.Quliyev hər il minlərlə hektar torpaq sahəsi üçün külli miqdarda “dotasiya” alır. Özü də ildə iki dəfə. Bundan başqa, R.Quliyev sahibkarlara torpaqları münbitləşdirmək üçün verilməli olan gübrələrin də “qara bazarda” satışını təşkil etməklə xeyli qazanc götürür.
Rayonun ən varlı adımı isə Biləsuvar Sevarma Sistemləri İdarəsinni müdiri Ədalət Babayevdir. Onun ən böyük “biznesi” isə yanacaqdır. Ə.Babayev bu “biznesi” Suvarma Sistemləri İdarəsinin benzindoldurma məntəqəsinə nəzarət edən Nizami Rəsulovun vasitəsilə həyata keçirir. Dizel yanacağının dövlət satış qiyməti 45 qəpik olduğu halda, idarənin gizli satış nöqtəsində bu yanacağın litri 20 qəpiyə satılır. İdarəyə dövlət tərəfindən ayrılan benzin də mənimsənilir. Satış qiyməti 55-60 qəpik olan bu yanacağın litri də xeyli ucuz - 40 qəpiyə satılır. İdarəyə istifadə üçün verilən elektrod, sement, üzərinə “Azmelsu” yazılmış fəhlə ayaqqabıları bazarda və ya xüsusi dükanlarda işbazlar tərəfindən satılır.
Suvarma Sistemləri İdarəsinə məxsus texnika idarənin işini görmək, yəni şor kanallarını və xəndəkləri lildən təmizləmək əvəzinə, balıq gölləri inşa etməklə məşğuldur. Mənim mətbuatda dərc olunmuş şikayətimdən sonra Ə.Babayev traktorların üzərindəki “Azmelsu” yazısının silinməsi barədə göstəriş də verib. Motorlar işləmədiyi halda, işləyirmiş kimi rəsmiləşdirilir.
İdarənin kadrlar şöbəsinin rəhbəri Kazım İbişov isə işçilərə verilən əmək haqqının üçdə birini yığıb Ə.Babayevə ötürməklə məşğuldur. İdarədə 500-dən artıq adamın işlədiyini nəzərə alsaq, bu məbləğ o qədər də az deyil.
Sonda onu da bildirirəm ki, Ə.Babayev məni zərərsizləşdirmək üçün bir “qoçu” da tutub. Bu “qoçu” idarənin kadrlar şöbəsinin əməkdaşı olan İqbal adlı şəxsdir...”
M.Mustafayev məktubunda qeyd etdiyi ittihamların məsuliyyətini dərk etdiyini və hər kəlməsinə cavabdeh olduğunu bildirir. Məktubunun sonunda əlil aidiyyəti orqanlara müraciət edərək, Biləsuvardakı korrupsiyanı dayandırmağı tələb edir. \ tezadlar \
Yazıda adı hallanan hər kəsi dinləyib mövqeyini dərc etməyə hazırıq.
