Redaksiyamıza daxil olan növbəti şikayət ərizəsində vətəndaş Akif Yusifov çalışdığı “Azəriqaz” İstehsalat Birliyi Binəqədi Qaz İstismar İdarəsinin rəhbərliyi tərəfindən əliəyriliyə, korrupsiya hallarının icrasına təhrik olunduğunu və bu kimi göstərişlərə əməl etmədiyindən işdən qovulduğunu iddia edir: “Mən uzun müddətdir ki, Binəqədi Qaz İstismarı idarəsində çalışıram. İş qabiliyyətim qənaətbəxşdir və təcrübəm də yetərlidir. Üzərimə düşən vəzifələri layiqincə yerinə yetirməyə çalışır, buna nail oluram. Ancaq tutduğum vəzifə üzrə mənim və mənim kimi başqa əməkdaşların fəaliyyətimizi qanunu surətdə yerinə yetirməyimiz işlədiyimiz idarənin rəisi Orduxan Həsənəliyevin və onun təşkil etmiş olduğu “komanda”sının xoşuna gəlmir. Cənab Orduxan Həsənəliyev öz deməsinə görə hansısa məsul vəzifədə işləyən havadarına arxalanaraq qanunsuz fəaliyyətlə məşğul olur və onun iş təcrübəsi ilə razı olmayan, əyri fəaliyyətə getməyən işçilərə qanunsuz təsirlər göstərir, onları sıxışdırır, hər vasitə ilə tutduğu vəzifədən uzaqlaşdırmağa çalışır. O, işçilərə abonentlər tərəfindən qaz sayğaclarına müdaxilə üçün şərait yaradılmasını, əyri yollarla pul qazanılıb ona gətirilməsini tələb edir.”
Maraqlıdır ki, A.Yusifov Qİİ rəisinin sadəcə passiv rüşvətxor məmur olmadığını, həm də qazanc əldə etməyin “yeni” üsullarının daima axtarışında olduğunu iddia edir: “Orduxan Həsənəliyev heç kimin ağlına gəlməyən üsullar icad edir. Məsələn o, işçilərdən abonentlərin “smart” tipli qaz sayğaclarına siqaret qutusunun gümüşü içliyi ilə müdaxilə edilməsini, bununla da süni surətdə böyük bir sahədə abonentlərin sayğaclarının fəaliyyətinin dayandırılmasına nail olunmasını təşkil edir. Bu əməliyyatdan sonra isə həmin abonentlər istər-istəməz müəyyən pul haqqları müqabilində sayğacların fəaliyyətinin dərhal bərpa olunmasına razılıq verməli olurlar. Konkret olaraq rəisin “komandasının” fəal üzvlərindən olan Heydər adlı işçı mənə bu neqativ hallara yol verilməsinə və onlarda iştirak etməyə qazılıq verməyim üçün hər ay mənə əlavə 300-500 manat, onun isə qeyri-rəsmi köməkçisi Elxan adlı işçi isə 500-1000 manat pul verilməsini təklif ediblər. Mən isə bu təkliflərə razılıq vermədiyim, vicdanla işləməyə çalışdığım üçün daimi surətdə rəhbərlik və onun komanda üzvləri tərəfindən təzyiqlərlə üzləşmişəm. Dəfələrlə heç bir səbəb olmadan məni cəzalandırmaq, işdən kənarlaşdırmaq istəyiblər, buna qismən nail olublar. Mən isə öz haqqımın bərpa olunmasına çalışmışam və əksər hallarda “Azəriqaz”ın və Əmək Müfəttişliyinin vasitəsilə buna qismən də olsa nail ola bilmişəm. Ancaq hiss edirəm ki, mənim gücüm tükənir. Artıq Əmək Müfəttişliyindən də mənə Orduxanla bacara bilmədiklərini deyirlər. Orduxan da bunların müqabilində “məni həyatdan yox etdirəcəyi” barədə mənə ultimatumlar göndərir və bunu aşıqdan-açığa, heç kimdən çəkinmədən edir. Mən özüm, həmçinin ailə üzvlərim də keçirdiyim bu stress hallar nəticəsində şəkər xəstəliyinə düçar olmuşuq. Bu kimi hallar iş qabiliyyətimə, sağlamlığıma mənfi təsir göstərir. Mən isə ailəmin yeganə qazanc gətirən üzvüyəm və iş yerimi itirmək mənim ailəmə olduqca mənfi təsir göstərə bilər...”
Qeyd etmək lazımdır ki, redaksiyamıza əvvəllər də Orduxan Həsənəliyevin rəhbərlik etdiyi bu idarənin fəaliyyətində yer almış neqativ hallara dair bir sıra məlumatlar, şikayət ərizələri daxil olmuşdu. Məsələn, daxil olan məlumatlarda vurğulanırdı ki, Binəqədi Qİİ-nin əməkdaşları tərəfindən müxtəlif ərazilərə qaz kəmərinin çəkilməsi və sayğacların quraşdırılması bəhanəsilə tələb olunan vəsaiti ödəyən sakinlər, əvəzində illərdir ki, narahatlıq və problemlərdən başqa heç nə əldə edə bilmirlər. Hər il sakinlərdən yeni məbləğ tələb edən idarənin əməkdaşları, sonunda bu problemləri ya büdcədə bu məqsədlə vəsaitin ayrılmadığı səbəbilə izah edirlər, ya da daha gülünc bəhanələr gətirirlər. Halbuki sakinlərdən yığılan vəsait hesabına bütün rayonun qaz problemi çoxdan həll oluna bilərdi. Sakinlər dəfələrlə müvafiq orqanlara şikayət məktubu göndərsələr də onları eşidən olmayıb. Həmçinin şikayət ərizələrində qeyd olunur ki, Binəqədi rayonunda bu gün aktuallığı ilə seçilən problemlərdən biri də Qİİ-nin əməkdaşları tərəfindən əhaliyə yazılan borclarla bağlıdır. Onlarla abonent illərdir ki, idarənin işçilərindən borc haqqında sənəd ala bilmirlər. Qaz idarəsinin işçiləri isə günün istənilən vaxtında qapını döyüb vətəndaşları bu bəhanə ilə narahat edirlər. Daxil olan şikayət məktublarından birində oxuyuruq: “Adətən elektrik enerjisinə və suya görə olan borcu göstərən sənəd müvafiq idarələrin işçiləri tərəfindən qapımızın kandarına yapışdırılır. Biz də o sənədi götürüb bankda, yaxud da poçtda ödənişi edirik. Amma qaz idarəsinin işçiləri gəlib qapını döyür, evdə kim varsa ona şifahi şəkildə filan qədər borcun olduğunu elan edirlər. Bundan sonra isə öz təkliflərini verirlər: ya borcu özün aparıb ödəməlisən, ya da onlara verməlisən. Maraqlıdır ki, qaz idarəsi işçilərinin əlində poçtun möhürlü kağızı olur və onlar təklif edirlər ki, pulu ver bizə, elə hesab et ki, poçta ödəmisən. Mən təbii ki, heç vaxt buna razılaşmamışam. Elan olunan məbləği vaxtlı-vaxtında özüm ödəmişəm. Amma niyə qaz işçiləri rəsmi borc kağızı vermirlər, necə olur ki, poçtun möhürlü qəbzi onların əlindədir, bunlar mənə qaranlıq qalıb. Mən üç ildir çalışıram Binəqədi Qaz İdarəsindən borc haqda sənəd ala bilmirəm”.
Göründüyü kimi bu faktlar da Akif Yusifovun öz ərizəsində Binəqədi Qİİ-nin rəhbərliyinə qarşı irəli sürdüyü ittihamlarla tamamilə uzlaşırlar. Bəlkə artıq“Azəriqaz” İstehsalat Birliyinin rəhbərliyi tərəfindən rayon qaz istismar idarələrinin fəaliyyətinə nəzarət mexanizmini işə salmaq vaxtı gəlib çatıb?
