ÇİRKLİ PULLARLA BAĞLI BEYNƏLXALQ ARAŞDIRMAYA START VERİLDİ
DİA.AZ: - Ölkəmizdə bir sıra məmurların maaşları 1500-1900 manat arasında dəyişsə də, bəzi məmurların sahib olduğu evlər, daha doğrusu, villalar, malikanələr özlərinin və ailə üzvlərinin idarə etdiyi avtomobillər, xaricdəki bank hesabları, saysız-hesabsız sərvətləri, qanunsuz biznes obyektləri aldıqları məvaciblə heç də uyğun gəlmir.
Bütün bu sərvətlərin sadə məmur maaşı ilə əldə olunmadığı hamıya aydındır. Məsələ burasındadır ki, 1500-1900 manat maaş alan hər hansı şəxsin 500 min-1 milyon manatlıq mülkə sahib olması, külli miqdarda sərvət toplaması qaranlıq məqamlardan xəbər verir. Sirr deyil ki, bizneslə məşğul olmaq inzibati qurumlarda çalışan şəxslərə qanun tərəfindən yasaq edilsə də, onlar müxtəlif səviyyələrdə alqı-satqı işləri ilə məşğul olurlar. Bu azmış kimi, vergidən də yayınır, külli miqdarda maxinasiyalara yol verir, var-dövlətlərin miqyasını daha da artırmaq üçün ən ağlasığmaz vasitələrdən istifadə edirlər. Qeyri-qanuni yollarla varidata sahib olmuş şəxslər çox zaman bunu məharətlə gizlədə bilirlər. Baxmayaraq ki, hökumətdə yüksək postlar tutan bəzi şəxslərin ölkə iqtisadiyyatının müəyyən sahələrini ələ keçirməsi və həmin sahələrdə inhisarçı mövqedə durduğu əhali arasında tez-tez müzakirə edilən mövzulardandır.
Lakin belə faktlar təkcə əhalinin sadə hissəsini düşündürmür. Ötən gün etibarlı mənbədən qəzetimizə daxil olan ən son məlumatlara görə, bu məsələ artıq yuxarı dairələrdə də ciddi müzakirə olunmağa başlayıb. Belə ki, yaxın günlərdə məmurların əmlaklarının araşdırılacağı gözlənilir. Əldə etdiyimiz informasiyaya əsasən bu işə ilk növbədə, məmurların Bakıətrafı ərazilərdə olan mülklərinin təftişi ilə başlanılacaq. Nardaran, Şıx, Mərdəkan, Şüvəlan qəsəbələrində xüsusi reydlər aparılacağı güman olunur. Məhz bu reydlər nəticəsində üzə çıxan mülklərin kimlərin adına olduğu sonradan geniş ictimaiyyətə də təqdim ediləcək. Sözügedən işin heç də asan olmayacağı indidən bəllidir. Çünki əksər hallarda məmurlar mülkləri öz adlarına deyil, qohumlarının, bəzi hallarda isə onlarla heç bir bağlılığı olmayan qaçqın, məcburi köçkün ailələrinin adına rəsmiləşdirirlər. Reydlər zamanı üzə çıxarılacaq hər bir bu cür şübhə doğuran fakt nəzarətə alınacaq, daha sonra isə xüsusi olaraq araşdırılacaq.
Bundan başqa, məmur ailələrinin övladları da nəzarət altına alınacaq. Gənc yaşlarında saysız-hesabsız varidata sahib olan övladlara xərclənən pulların da məmur maaşından qaynaqlanmadığı aydındır. Əsasən xaricdə öz lüks həyatlarını təmin etmiş varlı tələbələr də öz sahibləndiklərinə görə cavab verməli olacaqlar.
Həmçinin, xarici hesablar da xüsusi yollarla nəzarətə götürüləcək. Bu işin də asan olmayacağı məlumdur. Lakin məlumatı bizə ötürən mənbə bu istiqamətdə xüsusi tədbirlər planının hazırlandığını bildirib.
Bir sözlə, yaxın zamanlarda bizi xeyli yeniliklər gözləyir. Dövlətçiliyimizin mənafeyinə hesablanmış və çoxdan atılması gözlənilən bu cür addımlar yəqin ki, hər birimizi çox sevindirəcək.
Amma məsələ tək bununla bitmir. Son bir neçə ay ərzində Avropa və ABŞ-da banklarda ciddi araşdırmalara start verilib. Qeyd edək ki, banklarda öncə ərəb inqilabına görə başlanan yoxlamalar, daha sonra İrana qarşı tətbiq olunan sanksiyalarla əlaqədar davam etdirildi.
Həmin vaxt Azərbaycanda iş adamı kimi tanınan QMİ rəhbəri Şeyxülislam Hacı Allahşükür Paşazadənin qohumu Əli Evsen həbs edildi və aydın oldu ki, o, Hüsni Mübarəkə məxsus olan çirkli pulların yuyulması ilə məşğul olub. Məhz bundan sonra bank yoxlamalarının əhatəsi böyüdüldü və əsasən postsovet məkanından olan oliqarxların hesabatları nəzarətə götürüldü. Bir müddət sonra isə aydın oldu ki, Qazaxıstan Prezidenti Nursultan Nazarbayevin qızlarının da hesabları dondurulub. Çünki onlara məxsus hesablardakı pulların çirkli pullar olması ilə bağlı ortada ciddi faktlar olub. Bunu nəzərə alan ABŞ və Avropa hüquq-mühafizə orqanları əsasən İsveçrə banklarındakı hesablamaların yoxlanılması razılığına gəliblər. Öncə banklar bundan imtina etsələr də, sonra razılaşmalar əldə edilib. İndi isə aydın olub ki, İsveçrə banklarında diqqəti cəlb edən hesablardan bir neçəsi Azərbaycanda yaşayan bəzi oliqarxlara məxsusdur. Başqa sözlə, Şərqi Avropa ölkələri vasitəsilə çirkli pulları yuyaraq İsveçrə banklarına yerləşdirən oliqarxların əməlləri aşkarlanıb. Qeyd edilir ki, çox yaxın günlərdə bu hesablar açıqlanacaq və oliqarxlardan izahatlar istəniləcək. Əgər tutarlı əsaslar olmasa, bütün hesablara həbs qoyulacaq.
Bunu da qeyd edək ki, diqqət mərkəzinə düşən həmin hesablardan pul çıxarmaq artıq yasaq edilib. Yəni artıq azərbaycanlı oliqarxlar həmin pullardan əllərini çəkmək üzrədilər. Bunu da qeyd edək ki, aparılan araşdırmalar nəticəsində iki azərbaycanlı oliqarxla yanaşı, rusiyadan olan bir neçə oliqarx da eyni durumdadır. Bildirilir ki, bu hələ başlanığıcdır və nəzərdə tutulan plana uyğun olaraq Avropa banklarında yoxlamalar davam etdirilərsə, həbsə məruz qalacaq hesabların sayı yüzü keçəcək.
Bunu da qeyd edək ki, hələlik hesabların yoxlanılmasına icazə verməyən İsrail banklarıdır. Yeri gəlmişkən, bəzi azərbaycanlı məmurların İsraildə də bank hesabları var.
