BU FIRILDAQ PROSESİNDƏ BANKLAR DA İŞTİRAKÇIDIR
Dövlət Yiol Polisi əməkdaşlarının qanunsuz hərəkətləri bitib-tükənmir. Müəyyən yollarla vəzifə səlahiyyətlərindən sui-istifadə halları bu qurumun bəzi əməkdaşlarının gündəlik iş prinsipinə çevrilib. Redaksiyamıza müraciət edən Bakı şəhər sakini də yol polisinin özbaşınalığına məruz qalıb. Amma nə qədər qəribə olsa da, bu dəfə yol polisi sürücüyə deyil, piyadaya qarşı özbaşınalıq edib. Bakı şəhər sakini, tanınmış jurnalist Hacı Zeynalov deyir ki, o yol polisi tərəfindən piyada kimi yol hərəkəti qaydalarına əməl etmədiyi üçün cərimələnsə də, onun cərimə ödəməsinə imkan verilmir. Şikayətçinin dediyinə görə, bu il martın 31-də Bakının Nərimanov rayonu, Gənclik dairəsində piyadalarla bağlı reydə düşüb. Şikayətçi qanunu pozduğunu etiraf edir və ona qarşı tətbiq edilən cərimə ilə razıdır. Amma…
Cərimələnən piyada pulu kimə və necə ödəsin, bilmir
Amması odur ki, piyadanı cərimələyən yol polisi əməkdaşı ona qarşı haqsızlıq edib. Daha doğrusu, yol polisinin əməkdaşı cəriməni özü bildiyi kimi yazıb ki, piyada cəriməni bir neçə dəfə artıq ödəsin. Piyadanın adi vətəndaş olduğunu zənn edən yol polisi düşünüb ki, cərimələdiyi şəxs hüquqlarını bilmir. Elə buna görə də, yol polisi vəzifəsindən sui-istifadə edib. Nəticədə piyada jurnalist bir aydan artıqdır ki, cəriməni ödəyə bilmir və ödəniləcək məbləğin üzərinə hər gün əlavə məbləğ gəlir. Bu da yol polisinə xeyir, piyadaya isə ziyandır. Bilərəkdən piyadaya külli miqdarda ziyan vurmağa cəhd edən yol polisi əməkdaşı barədə isə tədbir görülmür. Hazırda piyadanın bir aydan artıqdır ki, döymədiyi qapı, şikayət etmədiyi aidiyyəti məmur qalmayıb. Yol polisinin əməkdaşı isə piyadanı bu vəziyyətə salmasından həzz alır. Dövlət yol polisinin əməkdaşı bilir ki, vətəndaşın ödədiyi məbləğin müəyyən faizi onun əmək haqqının artmasına səbəb olacaq. Elə buna görə də, o bilərəkdən qanunsuzluğa yol verib ki, vətəndaşdan bu yolla rüşvət alsın. Hələ ki yol polisi buna nail olur. Amma buna nə vaxta qədər nail olacaq bilinmir.
Nərimanov yol polisi əməkdaşı piyada və sürücülərə elə divan tutur
Hadisə belə olub. Şikayətçi həmkarımın dediyinə görə, o Gənclik dairəsində həqiqətən də yol hərəkəti qaydalarına zidd olaraq piyada keçidindən istifadə etməyib və yolda avtomobillərin hərəkətinə mane olub. Həmin vaxt da adıçəkilən ərazidə Bakı şəhər Dövlət Yol Polisi İdarəsinin əməkdaşları yol hərəkətinin təhlükəsizliyi ilə bağlı reyd keçirirmiş və təsadüfən Hacı Zeynalov reyd zamanı yaxalanıb. Bu faktı özü tam etiraf edir və qaydanı pozduğunu deyir. Bu vaxt Nərimanov rayon Yol Polisi Şöbəsinin əməkdaşı Ə.Almuradov ona yaxınlaşıb və yol hərəkəti qaydalarına zidd hərəkət etdiyi üçün barəsində İnzibati Xətalar Məcəlləsinin müvafiq bəndinə uyğun olaraq protocol tərtib edib. Hacı Zeynalov da protokolun şərtləri ilə razılaşıb. Piyada qanunvericiliyə uyğun olaraq cəriməni yerində ödəmək istəyib və təklifini yol polisi əməkdaşına bildirib. Amma cənab Almuradova bu vasitə sərf etməyib. Əvvəlcə yol polisi Hacı Zeynalovdan şəxsiyyətini təsdiq edən sənəd tələb edib. Almuradov elə zənn edib ki, piyadanın şəxsiyyətini təsdiq edən sənədi üzərində olmayacaq və o da bundan istifadə edib protokol yazacaq. Amma Hacı Zeynalov şəxsiyyət vəsiqəsini dərhal yol polisinə təqdim edib. Bu isə polis əməkdaşını çaşdırıb. Bir müddət Hacı Zeynalovla mübahisə edən yol polisi vəzifə səlahiyyətlərini aşaraq onu protokol tərtib etmək üçün Nərimanov rayon Polis İdarəsinə aparıb. yazmaq üçün aparıb, özü də məcburi. Yol polisi Ə. Almuradov orada Hacı Zeynalovun yol hərəkəti qaydasını pozması barədə protokol tərtib edib və piyadaya verib. Qanunlara riayət eədn jurnalist-piyada protokolu qəbul edib və dərhal cəriməni vaxtında ödəmək qərarına gəlib. Amma…
Yol polisinin qəsdən səhvi jurnalisti “Kapitalbank”la üz-üzə qoyub
Yenə də bir amma çıxıb. Hacı Zeynalov deyir ki, cəriməni ödəmək üçün “Kapitalbank”a yollanıb. Bankda cəriməni ödəyəndə məlum olub ki, Ə. Almuradov onun barəsində tərtib etdiyi protokolu bilərəkdən səhv kodlaşdırıb. Bankdan bildiriblər ki, Hacı Zeynalova verilən protokolun kodunda başqa şəxsin adı var və Hacı Zeynalovun bu protokola ümumiyyətlə aidiyyəti yoxdur: ”Ə. Almuradovun tərtib etdiyi protokolun kodu 497501-dir. Amma, “Kapitalbank”dan bu kodda əcnəbi vətəndaşın adı çıxdı. Mənim adıma olan kod isə ya başqadır, ya da ümumiyyətlə yoxdur. Buna görə də cəriməni ödəyə bilməyib geri qayıtdım. Nərimanov Rayon Polis İdarəsinə məlumat versəm də, bu barədə heç bir tədbir görülmədi və mənə bildirdilər ki, kod düzgündür, guya mən banka getməmişəm. Məcburiyyət qarşısında protokolun kodunu dəqiqləşdirmək üçün yenidən banka yollandım. Amma, yenə də mənə eyni cavab verildi ki, həmin kodlu protokol əcnəbi vətəndaşa aiddir. Artıq bir aydan çoxdur ki, mən yol polisi ilə bank arasında qalmışam. Nə cəriməni ödəyə bilirəm, nə də bu barədə tədbir görülmür. Müraciət etmədiyim qurum qalmayıb. Yol polisi əməkdaşının özbaşınalığı barədə heç kim tədbir görmək istəmir”.
Yol polisi jurnalistdən necə pul qoparmağın yolunu tapıb
Hacı Zeynalov iddia edir ki, yol polisi əməkdaşı Ə. Almuradov bilərəkdən kodu səhv yazıb. Səbəb isə onun protokolda göstərilən məbləğdən artıq vəsaitin ödənilməyə məcbur edilməsidir: “Səbəb çox sadədir. Hamı bilir ki, yol polisinin tərtib etdiyi protokolun cəriməsinin ödənilmə vaxtı bir aydır. Qanunvericiliyə görə, cərimə bir ay müddətində ödənilməsə, ondan sonra keçən hər gün üçün vətəndaş 1 manat əlavə gecikmə faizi ödəməlidir. Bu isə dolayısı ilə yol polisinin vətəndaşları soymasıdır. Bu cür hadisə yüzlərlə insanın başına gəlib və biri də mənəm. Artıq mənim barəmdəki protokolun son ödəmə tarixindən iki gün keçib. Artıq iki gün ərzində həmin cərimə 10 manat deyil, 12 manat olub. Təxminən bir ay da geciksə mən cəriməni 10 manat deyil, 42 manat ödəməliyəm. Yol polisi də bilə-bilə bu cür hərəkət edib ki, o məndən qanunsuz yolla pul alsın”. Hacı Zeynalovun dediyinə görə, bu prosesin yol polisinə ikinci sərf edən variant da var. Bu isə polisin şəxsən qazancının artmasıdır: “Belə ki, polis mənə protokol yazmaqla özünün işə məsuliyyətli yanaşmasını sübut edir və yuxarı rəhbərlikdə qanunla işlədiyini sübut edir. İkincisi isə odur ki, mənim barəmdə tətbiq edilən cərimənin məbləğinin artmasından yol polisi mənfəət əldə edir. Yəni mənim ödədiyim 10 manatın da müəyyən faizi Ə. Almuradovun əmək haqqının üstünə hesablanır. Ona görə də, yol polisi belə hərəkət edir ki, onun əmək haqqına bir protokoldan 10 manatın deyil, 40-50 manatın faizi gəlsin. Məqsəd budur. Buna görə də protokolun kodu qəsdən səhv qeyd olunur”.
Jurnalist yol polisinin qanunsuz hərəkətilə bağlı daxili işlər naziri Ramil Usubova müraciət edib. Hacı Zeynalov nazirdən yaranan problemin həll edilməsi üçün müvafiq göstəriş verilməsini istəyir. Müraciətdə həmçinin, Gənclik dairəsində onu saxlayan polis əməkdaşı Ə.Almuradovun hərəkətləri barədə ölçü götürülməsini xahiş edib.
Samir Əli
