140028632 VÖEN-li Qumru Əliyeva məhkəmədə sahibkarlıqla məşğuldur?

Bakı Apellyasiya Məhkəməsinin Mülki Kollegiyasının Xumar Mərdanova, Vahid Sadıqov və Sabit Bəhrəmzadədən ibarət “troykası”nın kollegiyanın sədri Rafael Eyvazovun sifarişi ilə 1-ci dərəcəli Qarabağ əlilini yataqdan məhkəməyə müraciət etdiyinə görə Novruz bayramı günlərində elə yatağında 400 manat cərimə etməsindən, anında ƏN-in Nizami icra məmuru Aslanov Əlihüseyn Zayralı oğluna icra sənədi verməsindən media bilgi yayıb. Heç demə, məhkəmələrin özlərinin “ştatlı” icra məmurları varmış! İcranın operativliyinə baxın, icra sənədi cərimə qərarından qabaq qəbul edilib!(??) Bəs Konstitusiya, qanun, Mülki Prosessual Məcəllə (MPM) nə deyir? Konstitusiya hər kəsin qadağan olunmayan üsul və vasitələrlə öz hüquqlarını və azadlıqlarını müdafiə etməyə, inzibati qaydada və məhkəmədə müdafiəsinə təminat verir. MPM-in 4.2 maddəsinə görə, məhkəməyə müraciət etmək hüququndan imtina olunması etibarsızdır. MPM-də cərimələr qoyulması da yazılıb, amma bu cərimələrin maddi hüquqa- məhkəməyə müraciətə görə tətbiqi yazılmayıb. Cərimələrin anında icraya yönləndirilməsi isə heç yazılmayıb. Əksinə, cərimə olunan şəxsin onun götürülməsi və ya miqdarının azaldılmasına 20 gün müddətində ərizə verə bilməsi MPM-in 127-ci maddəsində doğrulanıb. “Troyka” qıraqdan qərəzli sifarişə elə uyub ki, apellyasiya instansiyası olduğunu da unudub, MPM-i də; qərəzini 1-ci dərəcəli qazinin üzərində tətbiq edib.

Bakı şəhəri, Nizami məhkəməsinin hakimi Qumru Əliyeva yuxarı məhkəmənin “vahid məhkəmə cəriməsi təcrübəsini” faşizm üzərində QƏLƏBƏ BAYRAMI günlərində 1-ci dərəcəli Qarabağ əlilini 300 manat cərimə etməklə “uğurlu” qərəzlə sınayıb. “Humanist” cərimədir, 400 manat deyil, 100 manat azdır. Di gəl, bu cərimə də MPM-də nəzərdə tutulmayıb. Hakim Qumru Əliyeva iddiaçı 1-ci dərəcəli Qarabağ qazisini hakimə etiraz etdiyinə görə cərimələyib. (?) MPM-in 21.5 maddəsinə görə, əgər etiraz məhkəmə prosesini ləngitmək məqsədilə edilmişsə və ya etirazın dəlilləri uydurma olaraq həqiqətə uyğun deyildirsə, etirazı vermiş tərəf 110 manatadək cərimə edilə bilər. Qumru Əliyevanın “humanist” qərəzi cərimənin 3 dəfə artığına nədən olub. Eləcə də, qazinin etirazı nə uydurmadır, nə də prosesi ləngitmək məqsədi daşımır. Ən başlıcası, MPM-in 22-ci maddəsinin tələbinə görə hakimə etiraza məhkəmənin sədri baxmalıdır, etiraz edilən hakimin özü yox. Əslində etiraz elə hakim Qumru Əliyevanın süründürməçiliyindən, 7 aydır istehlakçı hüququnun müdafiəsi ilə bağlı “Azəriqaz”ın, 4 aydır “Bakcell”-in vəkili rolunda çıxış etməsindən, 2 dəfə ləğv olunan işinə yenidən hakim təyin edilməsindən qaynaqlanır. Qərəzli “humanistliyə” baxın, qazi müalicə ocağında olanda 1400028632 VÖEN-i aktiv olan hakim Qumru Əliyeva məlumat alıb ki, 25 il qabaq qazinin VÖEN-i olub, bu nədənlə istehlakçı hüququnun müdafiəsi ilə bağlı iş kommersiya mübahisəsi olduğundan Bakı Kommersiya Məhkəməsinə göndərilməlidir. Halbuki, 1-cisi, istehlakçı hüququnun müdafiəsi ilə bağlı işlərə ümumi məhkəmələrdə baxılır; 2-cisi, VÖEN-in aktiv-passiv olmasından asılı olmayaraq qazdan, sudan, işıqdan şəxsi istehlak məqsədilə yararlanılması kommersiya mübahisəsi sayıla bilməz. Hakimin VÖEN-i aktivdirsə, sahibkarlıq fəaliyyəti ilə məşğul olur? 3-cüsü, “aidiyyatı” üzrə Bakı Kommersiya Məhkəməsinə göndərilən qərardad qazi xəstəxanada olanda çıxarıldığından mütləq ləğv edilməlidir.

Qumru Əliyeva isə xəstəxana epikrizinin müddətin buraxılmasının üzrlü sayılmasına əsas vermədiyi qərarına gəlib və işi aidiyyatla bağlı olduğundan kassasiya instansiyasına göndərmək yerinə, Bakı Apellyasiya Məhkəməsinə göndərib. Orada isə Xumar Mərdanovanın sədri olduğu “troyka” qazini 400 manat cərimə edib və 4 aydır məhkəmə prosesi ləngidilir, icraat tamam itib. Buna görə Məhkəmə Hüquq Şurası cəza tədbiri görməlidir, amma cəzalanan 17 ildir istehlakçı hüququnu tələb edən iddiaçı qazi olur. Mobil operatorun vəkili rolunda çıxış edən hakim Qumru Əliyeva birinci dəfə işi aidiyyat pozuntusuna görə qaytarıb, qərardadı ləğv olunanda isə ərizəni baxılmamış saxlayıb ki, tərəflər hazırlıq iclasına gəlməyib. Bu yol Bakı Apellyasiya Məhkəməsi qərardadı ləğv edib. İş yenə də qərardadı 2 dəfə ləğv edilən Qumru Əliyevaya verildiyindən ona etiraz da əsaslıdır. Bu etiraz isə qaziyə 300 manat cərimə “qazandırıb”. Özbaşınalığa baxın, hakimə qərəzinə, obyektiv olmadığına, faktiki qarşı tərəfə vəkillik etdiyinə, süründürməçiliyə görə etiraz edən iddiaçı qazi bu etirazına görə cərimə olunur! (?) Bu, faktiki olaraq vətəndaşın məhkəmə təminatı hüququna, Konstitusiyaya kobud qadağa deməkdir. Görək, Ali Məhkəmə, Məhkəmə Hüququ Şurası kobud hüquq pozuntusuna, məhkəmə müdafiəsi hüququna qadağaya qiymət verəcək, yoxsa cərimələr həbslə sonuclanacaq?

... Hakim Qumru Əliyevaya yeni etiraz elektron kabinetdən təqdim edilib. Etiraza görə 300 manatlıq cərimə tətbiq edən hakimin qərəzsizliyi, obyektivliyi, işdə marağının olmaması böyük şübhə altındadır...

M. AĞSU - gundemxeber.az