MƏCBURİ KÖÇKÜN İTV RƏHBƏRLİYİNDƏN ƏL ÇƏKMİR
Şəfa Həşimov: “Mənə dəyən zərər ödənilməzsə, o zaman mən özüm İTV-yə yardım kampaniyasına başlayacam”
İctimai kanalla sms davasına çıxan Şəfa Həşimov DİA.AZ-a İTV rəhbərliyinə ittiham dolu yeni məktubunu yollayıb. Həmin məktubu olduğu kimi diqqətinizə çatdırırıq:
В«Hörmətli redaksiya. Sizə göndərdiyim bundan öncəki məlumatlarda üzləşdiyim problemdəm bəhs etmişdim. Vurğulamışdım ki, İTV kanalında yayımlanan “Pöhrə-2012” müsabiqəsi zamanı övladım Qalib Həşimovun üzləşdiyi haqsızlığa etiraz əlaməti olaraq İTV rəhbəri İsmayıl Ömərov və mədəiyyət naziri Əbülfəz Qarayev adından verilən diplomları geri qaytarmışam. Bundan başqa, “Pöhrə-2012” layihəsinin rəhbəri Azər Abdullayevlə İTV yetkililərinin açıqladığı fikirlər arasında ciddi ziddiyyətlər var ki, bu ziddiyyətləri izah etmək mümkün deyil. Məhz bu səbbədən də növbəti dəfə İ.Ömərova müraciət edənrək məni naraat edən məsələlərə aydınlıq gətirməsini istəyirəm.
Məlumat üçün qeyd edim ki, müsabiqə və onun nəticələri ilə bağlı yaşanan olaylardan sonra layihə rəhbəri A.Abdullayev bəzi qəzet və saytlara açıqlama versə də, bu gün adıçəkilən şəxs sədri olduğu “Sehirli Aləm” cəmiyyətinə xas gizəmli bir şəkildə qeybə çəkilib. Mən bir vətəndaş olaraq layihə rəhbərini tapa, mənə maraqlı olan suallara cavab ala bilmirəm. “Sehirli Aləm” cəmiyyətinin saytına qoyulan iki əlaqə nömrəsinin heç biri işləmir. Bundan başqa, A.Abdullayevin İTV rəhbərinə ünvanladığı və İTV kanalının da mənə göndərdiyi müraciətdə A.Abdullayev əlaqə məqsədilə bütövlükdə dörd mobil nömrə göstərib ki, bu nömrələrin hamısı bağlıdır. Bu, A.Abdullayevin hadisələrdən qaçmaq, prosesləri kənardan izləmək cəhdinin ən böyük isbatıdır. Lakin təəssüflər olsun ki, üzləşdiyim problemlə bağlı İTV kanalının sərgilədiyi mövqe də əsla arzuedilən deyil. Mən istər elektron poçt, istər xəbərnaməli məktub, istərsə də mətbuat vasitəsilə İTV-yə dönə-dönə müraciət etsəm də, bütün bu müraciətlərə İTV bir tək məktubla cavab verib ki, bu məktubda da telekanala ünvanladığım sualların heç birinə cavab verilməyib. İTV-nin Musiqi, bədii və əyləncəli verilişlər departamentinin direktoru Natiq Abdullayevin imzası ilə daxil olan məktubda məlum telekanalın öz efirində yayımlanan layihə ilə bağlı məsuliyyət daşımadığını bildirən telekanal yetkilisi, bütün məsuliyyətin A.Abdullayevə məxsus olduğunu qeyd edib. Halbuki, məsələyə bu cür yanaşma yanlış və qeyri-məntiqidir.
Həm “Pöhrə-2012” layihəsinin rəhbəri Azər Abdullayevin, həm də İTV rəhbərliyinin məsələyə qəti aydınlıq gətirməkdən yayınması ortadakı ziddiyyətlərə aydınlıq gətirməyə imkan vermir. Məhz buna görə də bir daha mənə qaranlıq qalan məsələlərlə bağlı İTV rəhbərliyinə müraciət edir, ondan aşağıdakı sualları cavablandırmağı rica edirəm:
1.İTV-də kommersiya əsaslı layihələrin işıqlanmasına icazə varmı? Əgər yoxsa o zaman “Pöhrə-2012” layihəsi niyə, hansı əsasla keçirilib? Əgər varsa, onda nə üçün bu layihənin smsli əsaslarla təşkil edilməsi ictimaiyyətdən gizlədilib və efir vasitəsilə bir dəfə də olsun bu barədə tamaşaçılara məlumat verilməyib?
2.İTV-nin Musiqi, bədii və əyləncəli verilişlər departamentinin direktoru Natiq Abdullayev tərəfindən mənə göndərilən məktubda bildirilir ki, İctimai Televiziyanın Direktorlar Şurası müsabiqəyə “təmənnasız olaraq efir vaxtı ayırıb”. A.Abdullayev isə açıq şəkildə etiraf edir ki, layihə sms əsasında keçirilib və bununla bağlı onun əlində sənədlər var. Əgər İTV tərəfindən müsabiqəyə təmənnasız efir vaxtı ayrılıbsa, o zaman layihə niyə sms əsasında keçirilib? Buradan belə bir nəticə hasil olmurmu ki, ortada istedad kəşfindən daha çox maddı qazanc məqsədi olub?
3.N.Abdullayevin məktubunda göstərilir ki, İTV layihə ilə bağlı heç bir məsuliyyət daşımır və biz məsələni yalnız layihə rəhbəri ilə aydınlaşdırmalıyıq. Doğrudanmı hər hansı bir layihəyə aylar uzunu efir vaxtı ayıran, qaliblərə telekanal rəhbərinin imzası ilə diplomlar təqdim edən bir kanal kimi İTV heç bir məsuliyyət daşımır? Əgər məsuliyyət daşımırdısa, o zaman nə üçün belə bir layihənin onun efir məkanında işıqlanmasına icazə vermiş, qaliblərə kanal rəhbərinin imzası ilə diplomlar vermişdir?”
Övladım sözügedən müsabiqədə aylar uzunu iştirak edib. Bu müddət ərzində bizim yol xərcindən tutmuş məşq və hazırlıqlara qədər müxtəlif məsələlərlə bağlı ciddi maliyyə məsrəflərimiz olub. Bundan başqa, övladımın yarışmada layiqincə təmsil olunması üçün 4-5 ay ərzində bütün işlərimi, hətta ailənin dolanışığı ilə bağlı məsələləri bir kənara qoyub bütün vaxtımı onun müsabiqəyə hazırlığına sərf etmişəm. Lakin bu gün məlum olur ki, sən demə ortada istedada, sənədə istinad edəcək heç bir müsabiqə yox imiş və hər şey sms-dən, iştirakçılar və onların yaxınlarının maddi durumundan asılı imış ki, bu da yarışmanı istedad deyil, pullu valideyn müsabiqəsi olduğunu göstərir. Odur ki, mən həm layihə rəhbəri A.Abdullayevdən, həm də İTV rəhbəri İsmayıl Ömərovdan mənə dəyən bütün maddi-mənəvi zərərin kompensasiya edilməsini tələb edirəm. Onu da nəzərə çatdırmaq istəyirəm ki, bu tələbin yalnız A.Abdullayevə deyil, həm də İTV-yə yönəlik irəli sürməyimə səbəb layihənin məhz bu telekanalın efirində işıqlandırılmasıdır. Onu da bildirirəm ki, əgər İTV rəhbərliyi mənim bu tələbimi yerinə yetirməyəcəyi təqdirdə o zaman məcburi köçkün, sadə zəhmət adamı olmağıma baxmayaraq mən özüm İTV-yə yardım kampaniyasına start verəcəm. Çünki İTV bu tələbimə qarşılıq verməsə, o zaman belə qərara gələcəm ki, sözügedən telekanal və onun rəhbərliyi son qəpiyini belə əlindən aldığı məcburi köçkünün kompensasiya tələbinə cavab vermirsə, deməli bu tələbi qarşılamaq iqtidarında deyil. Bu isə o deməkdir ki, İTV rəhbərliyinin özünün maddi dəstəyə ehtiyacı var. Xalqın, ictimaiyyətin telekanalı olaraq İTV-yə belə bir yardım göstərməyi öz vətəndaş borcum hesab edəcəm və KİV-in iştirakı ilə bu yardımı hər ay, mütəmadi şəkildə telekanalın hesabıma köçürdəcəyəmВ».
