“Əminliklə deyə bilərəm ki, bu gün majoritar seçki sistemi təmsilçilik seçici ilə öz seçdiyi deputat arasında həm əlaqə, həm də məsuliyyət yaradır.” Bunu Milli Məcılisin Hüquq siyasəti və dövlət quruculuğu komitəsinin “Ümummilli lider Heydər Əliyev müstəqil Azərbaycan Konstitusiyasının müəllifidir” mövzusunda keçirdiyi elmi-praktik konfransda komitənin sədri Əli Hüseynli deyib. Əli Hüseynli bildirib ki, vaxtilə proporsional seçki sistemində vətəndaş və deputat arasında məsuliyyət yox idi: “101-ci maddə ilə bağlı referendum keçirəndə bizi çox tənqid edirdilər. Bizim məntiqimiz və arqumentimiz isə sadə idi. Biz kimsəyə bir neçə dəfə seçilmək üçün imkan tanımırdıq. Biz seçən üçün imkan yaradırdıq, seçilən üçün yox. Biz xalqa seçmək hüququ verirdik. Bu gün Prezident İlham Əliyev ən yüksək reytinqdədir. Nəticə onu göstərir ki, biz düzgün yolda olmuşuq”.

Ağ partiyanın sədri Tural Abbaslı Sherg.az-a bildirib ki, millət vəkilinin işi qanun qəbul etməkdən ibarətdir:

“Millət vəkili bələdiyyə, icra hakimiyyəti orqanı, Mənzil-Kommunal İstismar Sahəsinin əməkdaşı deyil ki, bütün gün vətəndaşlarla qaz, su, işıq və yol problemini həll etsin. Millət vəkili təbii ki, vətəndaşlarla ünsiyyətdə ola və insanların sosial sifarişini ala bilər. Lakin buna görə millət vəkilini bir majoritar seçki dairəsinə bağlamaq düzgün deyil. Həmin halda isə məsələn, hansısa şəxs Azərbaycan Respublikasının İmişli rayonunun millət vəkilidirsə, həmin əraziylə bağlı qanun qəbul etməlidir. Bu yanaşma isə düzgün deyil, dünyanın bir çox yerində majoritar seçki sistemi köhnəlmiş sayıldığına görə sıradan çıxıb. Majoritar seçki sistemi təsadüfi insanların parlamentə düşməsinə icazə verir. Belə olan halda kimin pulu varsa, seçiciləri cəlb etmək üçün qeyri-siyasi rıçaqlardan istifadə edir. Amma proporsional seçki sistemində siyahıları partiyalar hazırlayırdı. Proporsional seçki sistemində insanlar şəxslərə deyil, siyasi xətlərə səs verirlər. Həmin halda proporsional şəkildə seçilən heç kəs seçicilərlə görüşməyəcəyini söyləyə bilməzdi. Əksinə olaraq proporsional formada seçilən millət vəkili 125 dairənin hamısına cavabdeh ola bilər. Majoritar seçki sistemi partiya sistemini iflic hala salıb və Azərbaycanda çoxpartiyalı sistemi zəiflədib. Hazırda Yeni Azərbaycan Partiyası (YAP) kadr belə yetişdirə bilmir. Çünki rəqabət yoxdur və partiyların siyasətdə rolu azalıb. Türkiyə, Gürcüstan və Ermənistanda belə hansısa şəxsə deyil, partiyaya səs verilir. Həmin partiyada müvafiq posta uyğun gördüyü adamı qoyurlar. Bu gün parlamentdə 40-dan artıq bitərəf deputatlar var. Onların məsuliyyətini isə heç kəs daşımır. Seçkidən limitin olmasına qaldıqda isə düşünürəm ki, bir şəxs ədalətli şəkildə seçilirsə, qoy qəbul olunsun. Limitin olmasını demokratik hesab etmirəm”.