Ali Məhkəmənin qərarına əsasən, vətəndaş sadəcə bəyənmədiyi üçün öz adını, soyadını və ata adını dəyişdirə bilməyəcək. Buna görə yalnız əsaslı səbəblər tələb olunacaq. Sözügedən qərar cəmiyyətdə mübahisələr doğurub. Bir tərəf bunun şəxsi azadlıqların məhdudlaşdırılması olduğunu deyir, digərləri isə belə addımın qarışıqlığın və sui-istifadələrin qarşısını alacağını düşünür.

Ad dəyişikliyi sahəsində tam azadlıq olmalıdır, yoxsa məhkəmə məhdudiyyətləri düzgün qərardır? Azərbaycanda hər kəsə ad və soyadını sərbəst dəyişmək hüququ verilsə, bu, hansı sosial nəticələrə gətirib çıxarar?

Globalinfo.az-a danışan deputat Fazil Mustafa deyib ki, ad seçimi vətəndaş azadlığı prinsiplərinə əsaslanmalı, yalnız müəyyən hallarda onun dəyişdirilməsinə şərait yaradılmalıdır:

“Bəzən valideynlərin seçdiyi ad sonradan övladın cəmiyyətdəki reputasiyasına uyğun gəlməyə bilər. Ad seçimi vətəndaşın azad iradəsi ilə bağlı məsələdir və buna müdaxilə edilməməlidir. Əgər bu, dini və ya başqa xüsusi motivlərlə dəyişdirilirsə, müəyyən məhdudiyyətin tətbiq olunması mümkündür. Lakin ad insanın şərəf və ləyaqətini alçaldır və ya hörmətsizlik doğurursa, onun dəyişdirilməsinə imkan verilməlidir. Buna görə də məhkəmə məhdudiyyətlərinin qoyulması doğru qərar deyil”.

Sosioloq Mail Yaqub isə bildirib ki, uşaqlara ad qoymaq zahirən sadə məsələ kimi görünsə də, əhəmiyyətlidir:

“Azərbaycan mədəniyyətində çox gözəl adlar var. Seçimlər elə olmalıdır ki, övladlarımız psixoloji və sosial baxımdan özlərini rahat hiss etsinlər. Qeyri-adi və az işlənən adların qoyulması isə gələcəkdə dəyişiklik istəyinə yol açır. Savadsızlıq və intellektual hazırlığın azlığı ad seçiminə mənfi təsir göstərir”.