Azərbaycan Milli İstiqlal Partiyası (AMİP) növbəti qurultayına hazırlaşır.

AMİP Siyasi Şurasının üzvü Əli Orucov “Reytinq” qəzetinin əməkdaşına deyib ki, artıq partiyanın 42 rayon təşkilatında konfranslar keçirilib, yerli təşkilatlardan qurultaya nümayəndələr seçilib.

Onun sözlərinə görə, yaxın müddətdə 5 rayon təşkilatında konfrans keçiriləcək.

Ə. Orucov bildirib ki, bəzi rayon təşkilatları yenidən təşkil olunur. Çünki partiyanın 20 ildən çox parlamentdən kənarda qalması və düçar olduğu maliyyə sıxıntıları, eyni zamanda, uzun müddət mövcud olmuş iqtidar-müxalifət münasibətlərindəki qeyri-sağlam düşüncə fəaliyyətdə dərin izlərini buraxıb: “İtirilmiş mövqeləri yenidən bərpa etmək, AMİP-in gücünü özünə qaytarmaq çətin olsa da, bu yöndə işlər davam etdirilir. İstər sədr, millət vəkili A. Əlizadə, istər Siyasi Şura üzvləri, istərsə də Mərkəzi Aparat çalışır ki, ölkənin bir saylı qeydiyyatdan keçən partiyasını siyasi arenada daha güclü, mütəşəkkil və təşkilatlanmış səviyyəyə qaldırsın. Partiyanın patensialı var, yetər ki, həmin potensialdan istifadə edilsin.

Yeri gəlmişkən, qurultaya hazırlıqla bağlı sədrin təşkilat mələləri üzrə müavini Afsəddin Nəbiyev və seçki məsələləri üzrə müavini Yəhya Həsənovun adlarını xüsusi çəkməz yerinə düşərdi. Mən özüm də çalışıram ki, konfrans çərçivəsində daha çox təşkliatlarda olum, yerlərdə partiya üzvləri ilə görüşlərdə və müzakirələrdə iştirak edim".

Etibar Məmmədovun yenidən aktiv siyasətə qaydacağı barədə sualı cavablandıran Əli Orucov “Etibar Məmmədov kimi təcrübəli, vətənpərvər, nüfuzlu və beynəlxalq aləmdə geniş tanınan siyasətçinin aktiv siyasətə qayıtmasının xalqın tələbi ilə mümkün ola biləcəyini" vurğulayıb.