“Ölkəmizin suverenliyinin və ərazi bütövlüyünün bərpasından sonra regionda təşviq etdiyimiz sülh gündəliyi xarici siyasətimiz üçün yeni üfüqlər açır və onun daha qlobal xarakter daşıması baxımından mühüm amil rolunu oynayır”.

Bu sözləri Prezident İlham Əliyev “İnkişaf və təhlükəsizliyin rezonansı:

AQEM-in institusional transformasiyasında regional əməkdaşlıq və idarəetmə” adlı AQEM-in Beyin Mərkəzləri Forumunun 13-cü sessiyasının iştirakçılarına müraciətində deyib. Dövlətimizin başçısı vurğulayıb ki, keçən ay Azərbaycanla Ermənistan arasında sülh sazişinin paraflanması həm bölgə, həm də daha geniş coğrafiya üçün əlverişli imkanlar yaradır.

Qeyd edək ki, 8 avqustda Azərbaycan Prezidenti İlham Əliyev və Ermənistanın Baş naziri Nikol Paşinyan arasında ABŞ lideri Donald Trampın vasitəçiliyi ilə Ağ Evdə görüş keçirilib. Sözügedən görüşdə Bakı və İrəvan arasında sazişinin paraflanması haqqında müqavilə imzalanıb. Bu isə istər Cənubi Qafqaz, istərsə də digər regionlar üçün yeni imkanlar deməkdir. Həmçinin, bu həmlə yaxın perspektivdə Azərbaycanı dünya mərkəzlərindən birinə çevirəcək.

Azərbaycan Milli İstiqlal Partiyasının sədri, Milli Məclisin deputatı Arzuxan Əlizadə “Cebheinfo.az”-a açıqlamasında bildirib ki, ölkəmiz bölgədəki reallıqları dəyişib:

“Yeni reallıqların yaranması fonunda Azərbaycan regionun əsas aparıcı dövlətinə çevrilib. Tam mübaliğəsiz demək mümkündür ki, ölkəmiz bölgənin əsas söz və güc sahibidir. Bu gün Azərbaycanın iştirakı olmadan regionda hansısa layihə reallaşa bilməz. Bu bölgədə marağı olan dövlət Azərbaycanın yaratmış olduğu reallıqlarla hesablaşmalıdır və hesablaşılır da. Vaşinqtonda imzalanan müqavilələr də bunu deməyə əsas verir”.

Millət vəkili diqqətə çatdırıb ki, artıq Avropa dövlətlərinin ölkəmizə münasibəti dəyişmək üzrədir:

“Eyni zamanda, Azərbaycan bu gün iqtisadi potensialı yüksək, hərbi və siyasi imkanları kifayət qədər geniş dövlətdir. Həmçinin, ölkəmiz Avropanın da enerji təminatının bir parçasına çevrilib”.

Partiya sədri onu da əlavə edib ki, Azərbaycanla Ermənistanla sülh müqaviləsinin paraflanması gələcəkdə yeni imkanlar açacaq:

“Hazırda rəsmi İrəvan hakimiyyətinin üzərinə qoyulan öhdəliklər var. Məsələn, Ermənistan Konstitusiyasından Azərbaycana qarşı ərazi iddiaları götürülməli, demorkasiya və delimitasiya prosesi ilə bağlı konstruktiv mövqe sərgilənməli, Azərbayanın hələ də işğal altında olan 4 kəndi geri qaytarılmalı və digər məsələlərlə bağlı Bakının haqlı tələbləri yerinə yetirilməlidir.

Yalnız bunlar olacağı təqdirdə Ermənistanla sülh müqaviləsi imzalanacaq. Sülh müqaviləsinin imzalanması isə regiona dayanıqlı sülh və sabitliyin gəlişi deməkdir. Azərbaycan bunu da etdi. Hansı ki, 30 il ərzində beynəlxalq təşkilatlar və böyük dövlətlər bunun öhdəsindən gələ bilmədilər”.

Arzuxan Əlizadə qeyd edib ki, Azərbaycan reallıqları öz gücünə dəyişdi:

“Ərazi bütövlüyümüz və suverenliyimiz bərpa olunmaqla yanaşı, regionda dayanıqlı sülhün gəlməsi üçün real imkanlar yarandı. Bunun da müəllifi Azərbaycandır. Daha dəqiq desək, Prezident və Ali Baş Komandan olaraq cənab İlham Əliyev bütün bu proseslərin əsas memarıdır. Bunu da xüsusi olaraq vurğulamaq lazımdır”.