Azərbaycan hökumətinin qərarına əsasən, siyasi partiyalara ayrılan vəsaitin məbləği 1 milyon manat artırılıb. Bu addım hakimiyyətin siyasi sistemin institusional dayanıqlığını gücləndirmək niyyəti kimi qiymətləndirilir.

Lakin suallar da az deyil: ayrılan vəsaitlər partiyaların real siyasi fəaliyyətinəmi yönəlir, yoxsa formal hesabatlarda qalır? Parlamentdə təmsil olunan partiyalardan, o cümlədən Razi Nurullayevin (ADP), Elşən Musayevin (Azərbaycan Demokratik Maarifçilik Partiyası) və Elşad Musayevin (Böyük Azərbaycan Partiyası) Sabir Rüstəmxanlının (Vətəndaş Həmrəyliyi Partiyası) və s. kimi rəhbərlik etdiyi təşkilatlar bu vəsaitləri konkret hansı istiqamətlərdə xərcləyir? Partiyaların məsuliyyəti də artacaqmı?

Məsələ ilə bağlı Tribunainfo.az-a açıqlama verən Ağ Partiyanın sözçüsü, siyasi-şərhçi Cavanşir Abbaslı bildirib ki, bu xəbər heç də doğru deyil. Yəni, partiyalara ayrılan vəsait heç də bir milyon artırılmayıb.

C. Abbaslının sözlərinə görə, ötən il necədirsə, bu il də elədir. Təbii ki, maliyyə artırılmalıdır. Amma təəssüflər olsun ki, bu gün Azərbaycan reallığında parlament partiyalarına dövlət büdcəsindən daha çox maliyyə ayırır. Digər partiyalara qəpik-quruş kimi məbləğ artırılır. Onlar ayrılan pulu hara və necə xərcləyirlər, məncə özləri daha yaxşı bilir. Onların əvəzindən danışmağım etik olmaz. Parlament partiyalarının da hər birinin kifayət qədər vəsaitləri xərcləmək üçün istiqamətləri var. Azərbaycanda insanlar parlamentdə təmsil olunan partiyalara daha çox üz tuturlar. Həmin partiyalar da müəyyən qədər vəsait xərcləməyə məcbur qalırlar.

Siyasətçi qeyd edib ki, ötən ilin məlumatları yenidən gündəmə buraxılıb. Belə bir qərar yoxdur. Bizim partiyaya gəldikdə isə, qəpik-quruş ayrılan partiyalar siyahısında Ağ Partiya da var. Heç o vəsait partiyanın daxili xərcləri; kammunal, internet, qərargaha xərclənən vəsaitlər üçün belə yetərli deyil. Könül istərdi ki, ayrılsın. Əslində dövlət qeydiyyatında olan hər bir partiyaya dövlət büdcəsindən maliyyə ayrılmalıdır.

C. Abbaslı vurğulayıb ki, bu gün Azərbaycanda əvvəlki illərə nisbətən çox partiya qeydiyyatda deyil:

“Əvvəllər 60-dan yuxarı idisə, indi konkret olaraq ölkədə 26 partiya dövlət qeydiyyatındadır. Düşünürəm ki, onların hər birinə, gücünə, üzvlərinin sayına, cəmiyyətdəki nüfuzu və roluna görə qiymət verilərək vəsait ayrılmalıdır. Ən yaxşı halda isə hər birinə bərabər şəkildə vəsait ayrılsa, çox yaxşı olardı. Bu, Hakim Partiyası, YAP deyib, daim böyük imkanlar yaratmaq və böyük vəsaitlər ayırmaq, parlamentdəki deputatların sayına görə, vəsait ayırmaq doğru deyil. Ümid edirəm ki, bu vəziyyət düzələcək. Adını qeyd etdiyiniz partiyaların hər biri də mənim dostlarımdır”.