“Rüşvət və korrupsiyaya görə məsuliyyətə cəlb edilən, qanunsuz sərvətin leqallaşdırılmasında ittiham olunan və barəsində məhkəmə hökmü çıxarılan keçmiş məmurların dövlətdən oğurladığı və xaricə daşıdığı pullar hökmən və hökmən Azərbaycana qaytarılmalıdır”.
Bunu Moderator.az-a açıqlamasında tanınmış hüquqşünas Qulamhüseyn Əlibəyli bildirib. Hüquqşünas qeyd edib ki, Azərbaycanın hüquq-mühafizə orqanları rüşvət və korrupsiyaya qarşı mübarizədə ciddi uğurlar əldə etsə də, xaricə çıxarılan qanunsuz pulların geriyə qaytarılması istiqamətində sistemli iş aparmağa böyük ehtiyac var:
“Heç kimə sirr deyil ki, Azərbaycanın hüquq-mühafizə orqanları rüşvət və korrupsiyaya qarşı uğurlu mübarizə aparır, bu sahədə böyük nailiyyətlər ortaya qoyurlar. Bütün bunlar Prezident İlham Əliyevin rəhbərliyi altında Azərbaycan dövlətinin bu cür neqativ hallara qarşı sistemli mübarizə aparmaq qətiyyətindən xəbər verir. Bu səbəbdən də biz mütəmadi şəkildə Dövlət Təhlükəsizliyi Xidmətinin, prokurorluq orqanlarının rüşvətxor məmurlara qarşı uğurlu əməliyyatına şahid oluruq.
Lakin bu da bir həqiqətdir ki, bəzi məmurlar vəzifədə olarkən qanunsuz yolla əldə etdikləri pullaırn önəmli bir qismini xarici ölkələrə çıxarır, orada üçüncü, dördüncü şəxslərin adına böyük mülklər, ictimai iaşə obyektləri və s. alırlar. Bu adamlar sonrakı mərhələdə həbs olunsa da, onların xaricə daşıdıqları pullar geri qaytarılmır. Halbuki, həmin pullar Azərbaycan dövləti, Azərbaycan xalqına məxsusdur və bu pulların geri qaytarılması vacibdir.
Xatırladım ki, Azərbaycan Beynəlxalq Bankının keçmiş rəhbəri Cahangir Hacıyevin həyat yoldaşı Zamirə Hacıyevanın Londonda Naytsbricdəki 14 milyon funt sterlinq (30 238 019 AZN) qiymətində olan evi və Askotdakı qolf klubu qanunsuz vəsaitlər hesabına əldə edildiyi üçün Britaniya dövləti tərəfindən müsadirə edildi. Yəni məmurlarımızın xaricə daşıdığı pullardan bu pulların sahibi olan Azərbaycan dövləti deyil, digər ölkələr yararlanır. Bu halların qarşısını almaq üçün ciddi addımlar atmağa ehtiyac var. Bu addımlardan biri kimi Azərbaycanda rüşvət və korrupsiyaya görə saxlanılan şəxslərin həbsi ilə bağlı məhkəmə qərarının digər ölkələrə göndərilməsinin mümkünlüyünüqeyd etmək olar. Biz bu adımı atmaqla həmin ölkələrə sübut edə bilərik ki, bu şəxs rüşvətə görə həbs edilib və buna görə də həmin şəxsin digər ölkədəki bütün sərvəti Azərbaycan dövlətinə verilməlidir. Çünki istər qanuni, istərsə də ədalət baxımından ən doğru qərar məhz budur”.
Qeyd edək ki, bu gün də bəzi məmurlar və ya onların yaxınlarının xaricdə böyük sərvətə malik olması ilə bağlı mediada çoxsaylı məlumatlara rast gəlinməkdədir. Prezident Aparatınn sabiq rəhbəri Ramiz Mehdiyev də bu qəbildən olan şəxslər sırasındadır. Mediada yer alan məlumatlara görə, sabiq aparat rəhbərinin Dubayda xeyli sayda daşınmaz əmlakı mövcuddur. Ona qarşı yer alan ittihamlardan biri də 193-1.3.2-ci maddədir ki, bu maddə cinayət yolu ilə əldə edilmiş əmlakın leqallaşdırılması ilə bağlıdır.
Onun nəvəsi Hikmət Əliyevin də Dubayda böyük biznes şəbəkəsinə malik olması ilə ölkə mediasında bir sıra məqalələr yer alır.
