Əvvəllər Azərbaycan vətəndaşlarının müxtəlif dini qruplaşmalara, Azərbaycana aid olmayan müharibələrə qatılmasına şahidlik etmişik. Bu gün isə, azərbaycanlılar müxtəlif səbəblərdən Rusiya–Ukrayna müharibəsinə qatılır, bu müharibələrdə iştirak edir, orada həyatlarını itirirlər. Dövlət Təhlükəsizlik Xidmətinin əməliyyatları nəticəsində Rusiya-Ukrayna müharibəsində iştirak edən 4 azərbaycanlı aşkarlanaraq, saxlanılıb.
Azərbaycanlı gənclər niyə öz ölkələrinə aid olmayan müharibələrə qatılır?
Milli Məclisin deputatı Hikmət Babaoğlu Bizimyol.info xəbər portalına açıqlamasında bildirib ki, Azərbaycan Respublikasının qüvvədə olan qanunvericiliyinə görə, Azərbaycan vətəndaşlarının bu və ya digər formada başqa ölkələrdə gedən müharibələrə, qarşıdurmalara cəlb edilməsi qadağandır. Deputatın fikrincə, bu qanunun mahiyyəti ondan ibarətdir ki, Azərbaycan dövləti əslində öz vətəndaşlarının qayğısına qalır, çünki onların bizim milli maraqlarımızdan kənarda olan müharibələrdə öz həyatlarını itirmələrini istəmir: “Bu, hər şeydən öncə dövlətin vətəndaşına qayğısıdır, onun həyatının qiymətləndirilməsidir. Nəticə etibarilə, hər bir Azərbaycan vətəndaşı öz enerjisini də, öz gücünü də, öz qabiliyyətini də, öz istedadını da elə öz xalqının inkişafı üçün səfərbər etməlidir. Təəssüf ki, Azərbaycan vətəndaşlarının bəzi hallarda könüllü, bəzi hallarda məcburi şəkildə Rusiya-Ukrayna müharibəsində müxtəlif tərəflərdən müharibəyə cəlb edilməsini görürük. Yəni, hər iki tərəfdən biz buna şahidlik edirik ki, Rusiya tərəfindən də, Ukrayna tərəfindən də Azərbaycan vətəndaşları müharibəyə cəlb edilir. Azərbaycana aid olmayan müharibədə Azərbaycanın tərəf kimi göstərilməsi meydana çıxır və bu siyasi kontekstdə təqdim olunur ki, Azərbaycan vətəndaşları bu və ya digər tərəfdən müharibədə iştirak edir”.
Deputat vurğulayıb ki, Dövlət Təhlükəsizliyi Xidmətinin həyata keçirdiyi əməliyyat çox qiymətlidir: “Ölkənin xarici siyasətinin müdafiə edilməsidir. Eyni zamanda, Azərbaycanın milli qanunvericiliyinin tələblərinin hüquqi kontekstdə yerinə yetirilməsidir”.
