Qazaxıstanda keçirilən “Silkway Star” yarışmasında münsif qismində çıxış edən Azərbaycanın “Avroviziya-2021” təmsilçisi Samirə Əfəndinin erməni ifaçıya münasibəti ölkə ictimaiyyətində etiraz doğurub. Müğənninin erməni iştirakçını qucaqlaması və “sülh üçün sənə ən yüksək xalı verirəm” deməsi sosial şəbəkələrdə birmənalı qarşılanmayıb.

Globalinfo.az-a danışan yazıçı-kulturoloq Aydın Xan Əbilov deyib ki, 30 ildən artıq davam edən münaqişədən sonra iki qonşu ölkə – Azərbaycan və Ermənistan sülh müqaviləsini imzalamaq ərəfəsindədir:

“Bu prosesdə ictimaiyyətin geniş təbəqələrinin, o cümlədən mədəniyyət və ictimai xadimlərin də xalq diplomatiyası vasitəsilə etimadın bərpasına töhfə verməsi vacibdir. Şübhəsiz ki, bu münaqişə bizim tariximiz, ağrımız və şəhidlərimizin xatirəsi ilə bağlıdır. Ermənistan uzun illər işğal siyasəti yürüdüb. Lakin bu gün Ermənistan tərəfi artıq reallığı qəbul edir: sülh sazişini Azərbaycanın tələb etdiyi şərtlər çərçivəsində imzalamağa hazır olduğunu bildirir. Buna görə də münaqişənin nifrət və qarşıdurma deyil, sülh ilə birgəyaşayış çərçivəsində həll olunması üçün hər iki xalqın səyləri zəruridir. Bu baxımdan həm Ermənistan, həm də Azərbaycan ictimaiyyətinin nümayəndələri sülhə aparan münasibətlərin qurulmasında maraqlı olmalıdırlar.

Samirə Əfəndinin yarışmada erməni iştirakçıya qucaq açması bəlkə də bizim üçün ağırdır. Amma bu jestinə görə onu tənqid atəşinə tutmaq düzgün deyil. Bəziləri üçün bu, emosional olaraq çətin görünə bilər. Lakin bu davranış düşmənçilik yox, sülh niyyəti daşıyan bir addım kimi qəbul edilməlidir. Uzun illər davam edən münaqişələr, Birinci və İkinci Dünya müharibələrinin dəhşətləri bütün dünyaya göstərib ki, silahlı qarşıdurmalar heç bir xalqa inkişaf gətirmir. Bu baxımdan azərbaycanlı münsifin davranışı dünya tərəfindən də alqışla qarşılandı”.

Kulturoloq qeyd edib ki, müharibə XXI əsrin formatı deyil:

“Müharibəyə sərf olunan resurslar ölkələrin inkişafına yönəldilə bilər. Sərhədlərin dəqiqləşdirilməsi, açılması və regional nəqliyyat dəhlizlərinin, o cümlədən Tramp dəhlizinin fəaliyyətə başlaması hər iki ölkə üçün yeni imkanlar yaradacaq. Sülhü yalnız siyasətçilər deyil, xalqlar da istəməli və dəstəkləməlidir. Azərbaycanın ictimai xadimlərinin İrəvana səfəri, Ermənistan nümayəndələrinin Bakıya gəlişi etimadın formalaşdığını göstərir. Xalq diplomatiyasının müxtəlif formaları – mədəni tədbirlər, idman yarışları, birgə layihələr münasibətlərin normallaşmasına mühüm töhfə verə bilər.

Azərbaycan və Ermənistan xalqları arasında musiqi, mədəniyyət, adət-ənənələr və gündəlik həyat tərzində çoxlu oxşarlıqlar mövcuddur. Bu ortaq cəhətlər qarşılıqlı etimadın bərpasına kömək edə bilər. Sülh prosesinə qarşı çıxanlar faktiki olaraq dövlət siyasətinə də zidd mövqe sərgiləmiş olurlar. Çünki hər iki dövlətin məqsədi bölgədə uzunmüddətli sabitliyi təmin etməkdir. Ona görə də cəmiyyət bu kimi addımları emosional şəkildə deyil, məntiqli şəkildə qiymətləndirməli və sülhə xidmət edən təşəbbüsləri dəstəkləməlidir. Samirə Əfəndinin jesti də bu kontekstdə sülhə yönəlmiş bir davranış kimi qəbul edilməlidir”.