Bakı şəhəri, Yasamal rayonu, M.Muxtarov küçəsi, ev 115, mənzil 4 ünvanında yaşayan Əhmədova Cavahir Cahangir qızı tərəfindən “Hürriyyət”in redaksiyasına şikayət məktubu daxil olub. Şikayətçi qəzetimiz vasitəsilə Baş prokuror Kamram Əliyevə və Daxili İşlər naziri Vilayət Eyvazova müraciət edir:

“Cənab Kamran Əliyev!

Cənab Vilayət Eyvazov!

Məlumat üçün bildirim ki, 2022-ci ilin dekabr ayında hesab açdırmaq məqsədi ilə “Azərbaycan Beynəlxalq Bankı”nın "Nəqliyyat filialı"na yaxınlaşdım. Növbəm çatanda bank işçisinin oturduğu masaya yaxınlaşıb, hesab açdırmaq istədiyimi bildirdim. Daha sonra mənə təklif etdi ki, banka məxsus "TAM kart" plastik kartını da əldə edim. Bankın əməkdaşı bildirdi ki, bu kartla rahat köçürmələr həyata keçirə bilərəm. Həmçinin dedi ki, mağazalardan alış-veriş edən zaman da istifadə edə bilərəm. Bonuslar yığılacaq, sonra onları da xərcləyə biləcəyimi dedi.

Düzü, kart sistemindən başım demək olar ki, çıxmır. Bu səbəbdən də razılaşdım. Yatsam yuxuma belə girməzdi ki, bank işçisi məni aldadaraq, pulumu mənimsəyər.

Bir-iki sənədə imza atdım və "TAM kart" adlı plastik kartını mənə təqdim etdi. Kartı götürsəm də heç vaxt istifadə edə bilmədim. Olduğu kimi də çantamın bir hissəsində qaldı.

Təxminən 2023-cü ilin iyul ayında “Azarbaycan Beynəlxalq Bankı”ndan mənə zəng vurub bildirdilər ki, "Nəqliyyat” filialından əldə etdiyim “TAM kart” kredit kartımda 2883 manat borcum var. Fikirləşdim ki, nəsə yanlışlıq var. Axı, özümə arxayınam. Üstəlik, ilk gün banka yaxınlaşan zaman da kredit kartı üçün getməmişəm. Hesab açdırmaq niyyəti ilə getmişdim. Bank işçisinin təklifi ilə debet kart əldə etmişəm. Amma kredit kartı götürməmişəm.

Səhəri gün ABB-nin “Nəqliyyat” filialına yaxınlaşdım. Bildirdilər ki, 13.12.2022-ci il tarixində kredit kartı götürmüsünüz.

Deməli, bank işçisi mənə kredit kartı olan sənədə də imza atdırıb. Lakin kartı mənə verməyib. Daha sonra başqa bir sənədə baxarkən gördüm ki, adımın qarşısında olan ikinci imza mənə aid deyil, oxşadılıb.

Əgər o kartdan istifadə etmişəmsə mənə aid sübut olmalıdır. Amma mənim əleyhimə heç bir sübut yoxdur.

Hazırda iş Nəsimi Rayon Polis İdarəsindədir, guya araşdırılır. Yəni 2022-ci ilin dekabr ayında olan dələduzluq halının araşdırılması hələ yekunlaşmayıb.

Bank rəhbərliyinə də, polis bölməsində də kredit kartını istifadə etmədiyimi, ümumiyyətlə heç vaxt görmədiyimi bildirdim. İşi həm bank, həm də polis araşdırır. Amma səhlənkarlıqla araşdırırlar. Belə ki, artıq 6 aydır mənim maaş kartımdan hər ay 300 manat pul çıxılır.

Bir sözlə, dələduzluğa uğramışam. Amma həm maddi, həm də mənəvi ziyana düşsəm də, yenə əziyyəti mən çəkirəm.

Heç vaxt ağlıma gəlməzdi ki, bank əməkdaşı tərəfindən başıma bu oyun açılar. Sübut olmadan, pulu çəkən mən olmadan necə mənim əmək haqqı kartımdan pul çəkilə bilər? Bu qədər özbaşınalıqdır?!

Belə çıxır ki, hüquq-mühafizə orqanları, xakerlər və bank bir yerdə çalışırlar.

Cənab Kamran Əliyev!

Hörmətli Vilayət Eyvazov!

Mən Sizdən xahiş edirəm, şikayətimi diqqətdə saxlayıb, dəqiq və düzgün araşdırılması üçün göstəriş verəsiniz. Mən hazırda küçələrdən dəmir parçası yığıb satıram ki, acından ölməyim. Bu qədər böyük haqsızlıqla qarşılaşmışam. Bir daha qeyd edim ki, pulu mənim çıxarmağımla bağlı heç bir sübut yoxdur”.