Oktyabrın 16-da Naxçıvan şəhər Məhkəməsində keçmiş universitet müəllimi Aysel Quliyevaya qarşı məhkəmə prosesi keçirilib. Prosesdə iştirak edən müəllimin sözlərinə görə, onu bu dəfə də vatsap qrupundakı yazışmalarına görə ittiham edirlər:

“Bir müddət öncə mətbuatda demədiyim sözə görə NDU Beynəlxalq Münasibətlər və Hüquq fakültəsinin dekan müavini Abbas Əhmədov məni məhkəməyə vermişdi. Hakim Aslan Heydərov şikayət əsassız olduğu üçün işi icraata belə götürməmişdi. Gördülər olmur, bu dəfə vatsap qrubunda tələbələrimlə paylaşdığım məqaləmə görə şikayət olundum. Bu yazışmaların nə şəkildə əldə olunduğu da hələlik məlum deyil.“

Aysel Quliyeva deyir ki, prosesdə iştirak etmək üçün çalışıdığı Türkiyədən geri qayıtmalı olub. Müəllimənin sözlərinə görə, hakim mədəni davransa da qarşı tərəf və onun vəkili onunla kobud davranıblar

„İşi aparan hakim elə, bundan öncəki işə xitam verən Aslan Heydərovdur. O, çox mədəni idi, prosesi ədalətli apardı. Amma qarşı tərəfin vəkili Vüsal Həsənov sözümü dəfələrlə kəsdiyi üçün fikrimi tam ifadə edə bilmədim. Dekan müavini Abbas Əhmədov isə, açığı, məni yenə təəccübləndirmədi. Məhkəməyə sadəcə doğruları deyəcək deyə and içdikdən sonra dedi ki, “tələbəyə sual vermişəm – geri zekalısınız? – bu, təhqir deyil, sualdır”.

Sonra dedi ki, “səs yazılarında müəlliməniz gerizəkalıdı, tupoydu demişəm, amma adını çəkməmişəm ki.” Yəni sırf dekan müavini olduğu üçün istədiyi müəllimi aşağılamağa haqqı çatdığını düşünür və müdafiəsini də bu şəkildə edir.

Mən ifadəmdə bildirdim ki, səs yazılarından da görüldüyü kimi sinifdən insana aid olmayan qəribə səslər eşidildiyi üçün polisə müraciət etmişəm. Onların taktikası ilə cavab verirəm və deyirəm ki, o səslər bəlkə də bülbül səsi idi, nə bilmək olar. Qısacası bu proses mənim üçün həm təcrübə oldu, həm də bir daha gördüm ki, bəzi adamlar vəzifə ilə tərbiyəni qarışıq salırlar.“

Məhkəmədəki mənbənin sözlərinə görə isə, sədr Gülnar Səfərəliyeva hakimə ədalətli qərar çıxarmaqda mane olmağa çalışır:

„Gülnar xanım işi dekan müavinin xeyrinə həll edib Aysel Quliyevanı cəzalandırmaq qarşısında universitet rəhbərliyindən 20 min manat rüşvət alıb. Bu pulu dekan müavinin vəkili Vüsal Hüseynov gəritib, Gülnar xanıma verib. Hakim Aslan Heydərov bura yeni təyin olunsa da ədalətli adama oxşayır. Yəni belə işlərə görə görə pul alıb, absurd qərar çıxarmaz. Bu səbəbdən Gülnar Səfərəliyeva ona təsir edib, yola gətirmək istəyir. Məhkəmə günü otağına girib, yarım saatdan artıq danışsalar da razılığa gəlməyiblər. İndi ya Gülnar xanım rüşvəti geri verməlidir, ya da Aslan müəllimi yola gətirməlidir.“

Təxminən iki ay öncə səhifəmiz NDU Hüquq və Beynəlxalq Münasibətlər fakültəsinin bir qrup tələbəsinin müraciətini yaymışdı. Müraciətdə dekan müanivi Abbas Əhmədovun tələbələri döydüyü, təhqir etdiyi bildirilirdi. Tələbələr, universitet rəhbərliyinin aqressiv dekanı cazalandırmaq yerinə, onları müdafiə edən müəllim Aysel Quliyevanı işdən çıxardığını bildirmişdilər.

Abbas Əhmədov tələbələrin bu müraciətini əsas gətirərək, məhkəməyə şikayət etmişdi. Şikayət olunan şəxsin- Aysel Quliyevanın isə, müraciətin yayılması ilə heç bir əlaqəsi yoxdur. Buna baxmayaraq, Naxçıvan şəhər Məhkəməsinin hakimi Gülsüm Əliyeva dekan müavininin şikayətini qəbul etmişdi. Məsələ ictimailəşdikdən sonra hakimin bu hərəkəti ciddi ictimai qınağa səbəb olmuşdu. Bu qınağı nəzərə alan hakim, elə ilk iclasdaca işə baxmaqdan imtina etmişdi. Bundan sonra iş Bakıdan yeni təyin olunmuş hakim Aslan Heydərova həvalə olunmuşdu.