Hesablama Palatasının sədri Vüqar Gülməmmədovun qayınatası, Olympus Şirkətlər Qrupunun təsisçisi olduğu deyilən Əbülfəz Babayevə qarşı külli miqdarda dələduzluq etdiklərinə görə həbs olunan dəstə barədə məlumat vermişdik.
Cinayət işindən aydın olur ki, dəstə üzvləri Bakının müxtəlif ünvanlarında Əliyar Abbasovdan Türkiyə Respublikasının İstanbul şəhərində tikinti üçün torpaq sahəsinin alınması adı ilə ümumilikdə 2 milyon 550 min 150 manat pulunu 2022-ci ilin əvvəlindən 02.05.2024-cü il tarixinə kimi ələ keçiriblər.
Bakı Ağır Cinayətlər Məhkəməsinin hakimi Aytən Əliyevanın sədrliyi ilə keçirilən prosesdə Cinayət Məcəlləsinin 178.4 (xüsusi külli miqdarda dələduzluq etmə), 193-1.2.3 (Şəxs tərəfindən öz qulluq mövqeyindən istifadə etməklə cinayət yolu ilə əldə edilmiş pul vəsaitlərini və ya digər əmlakı leqallaşdırma) və 228.4-cü maddəsi ilə təqsirləndirilən şəxslər Əliyar Abbasov, Ümid Abbasov, Asiman Əzizov, Məhərrəm İbrahimli, Pərvin Zeynallı, Ramal Əzimov və Xəyalə Hüseynovanın işinə baxılıb. Prosesin gedişində Ə.Babayevə vurulan zərər ödəndiyinə görə təqsirləndirilən şəxslərə şərti cəza verilib, onlar sərbəst buraxılıblar.
Maraqlıdır ki, cinayət işində zərərçəkmiş şəxs kimi Əbülfəz Babayev tanınıb. Lakin ölkə mətbuatının yazdığına görə, 2,5 milyon manat tək Əbülfəz Babayevə məxsus olmayıb. Belə ki, pulun çox hissəsi onun kürəkəni Vüqar Gülməmmədova məxsus olub. Sadəcə, Vüqar Gülməmmədovun prokurorluq orqanları ilə isti münasibətləri olduğundan, həmçinin vəzifəli şəxs olduğundan onun adı ittiham aktına salınmayıb. Onu da qeyd edək ki, keçmiş ədliyyə polkovniki olan Əbülfəz Babayevin təsisçisi olduğu Olympus Şirkətlər Qrupu daha çox Olypus Park kimi tanınır. Özü də ölkə mətbuatında gedən saysız-hesabsız şikayətlərdən aydın olur ki, şirkət heç də yaxşı əməllərin sahibi deyil.
Məlumdur ki, Azərbaycan Nazirlər Kabineti 2016-cı ildə Bakı şəhərində köhnəlmiş binaların sökülərək yerində müasirlərinin tikintisini nəzərdə tutan 86 saylı qərar imzalayıb. Qərara əsasən tikinti şirkətləri köhnə binaların sakinlərinə ədalətli kompensasiya ödənilməsi, yaxud yeni binada onlara daha geniş mənzillər verməklə onların köçürülməsinə nail olmalıdır. Pilot layihə adlanan proses başlananda ona ən aktiv qoşulanlardan biri də Olympus Park olub. Lakin şirkətin Bakının çoxsaylı ərazilərində köhnə binaları, qeyri-yaşayış tikililərini alan zaman, həmçinin aldıqdan sonra tikinti prosesi, köçürülən sakinlərə kirayə haqlarının verilməsi, onların həmin ərazidəki binadan mənzillə təmin olunması, binaların təhvil verilməsi müddəti ilə bağlı verdiyi vədlərin çoxuna əməl etməməsi kütləvi narazılıqlara səbəb olub.
Bakı sakinlərinin bir qrupunun şirkətdən şikayəti bu ilin iyununda mediada dərc olunub. Bakı şəhər sakinləri N.Əhmədova, Ə.Əliyeva, H.Novruzov, M.Məmmədov, Y.Həsənov, T.Hüseynova, İ.Rüstəmova, K.Quliyeva və digər sakinlər bildiriblər ki, “Olympus” park-tikinti şirkəti Bakı şəhərinin bir çox yerlərində yaşayış binaları tikir. AMEA-nın yanında iki bina, Nəsimi bazarının yerində 4 bloklu bina, Təbriz küçəsində 3 bloklu bina, 7-ci mkr-da, Bakı Şəhər Prokurorluğunun istintaq idarəsinin yaxınlığında 7 bloklu bina, Neapol dairəsi yaxınlığında 3 bloklu bina, Yasamalda 3 bloklu bina, Botanika bağının yaxınlığında 2 ədəd 18 mərtəbəli bina və s. yaşayış mənzillərinin tikintisini bu şirkət həyata keçirir. Amma necə? Sakinlərlə müqavilə bağlanır, pullar qəbul edilir, amma binaların tikintisi illərlə uzanır və sakinlər də evsiz-eşiksiz gözləməkdə davam edirlər. Tikilən tək-tük binaların da sakinlərinə hələ heç bir çıxarış verilməyib. Sakinlərin dediyinə görə, 1 ilə tikiləcəyi nəzərdə tutulmuş binalar, üstündən 5-6 il keçməsinə baxmayaraq, hələ də tamamlanmayıb. Şikayətçi N.Əhmədova Bakı-xəbər-ə deyib: “Biz müqavilə bağlayanda dedilər ki, tezliklə gözəl, yaraşıqlı, hər cür komfortu olan mənzillərdə yaşayacaqsınız. Biz də razılaşdıq ki, tezliklə kirayədə yaşamaqdan canımız qurtaracaq. Amma sən saydığını say, gör şirkətin rəhbəri Rəfael Qarayev və ətrafına yığdığı xalası uşaqları Anar və digərləri nə sayır? Biz artıq bu illər ərzində evə ödədiyimiz puldan iki dəfə artıq kirayə pulu ödəmişik. Biz nə vaxta qədər kirayədə yaşamalıyıq? Borc-xərc edib pul ödəmişik ki, nəhayət, bizim də öz evimiz olsun. Amma bu gedişlə, deyəsən, ömrümüzün axırına qədər kirayədə yaşamalı olacağıq”.
Y.Həsənov deyir: “Biz də kirayədə yaşayırıq. Inanırdıq ki, tezliklə bina tikilər və biz də öz mənzilimizdə yaşayarıq. Amma bu şirkətin rəhbəri Rəfael Qarayevin mədəsi doymur. Bizim pullarımızın hesabına özünə və xalası uşaqlarına cənnət həyatı qurub. Aldığımız məlumata görə, Goradildə 4 mərtəbə villası, şəhərin bir neçə yerində evi, neçə-neçə obyekti, Türkiyədə və Avropada evləri var və banklarda da pulları “n” qədərdir. Hazırda sürdüyü axırıncı model “Qalenvagen” markalı maşının qiyməti 550 min manatdır. Bunlar hamısı bizim pullarımızın hesabınadır. Görəsən, Korrupsiyaya Qarşı Mübarizə Baş İdarəsi hara baxır? Gözlərinin qarşısında bu qədər qanunsuzluq baş verir. Amma heç bir tədbir görmürlər. Bizim şikayətimiz əsasında Nərimanov Rayon Prokurorluğunda cinayət işi qaldırılıb, amma nəticə yoxdur. Biz nə vaxta qədər küçələrdə qalmalı olacağıq?”
Maraqlıdır ki, sakinlər Rəfael Qarayevin təkcə onları yox, eyni zamanda bu şirkətə investisiya qoyan 35-dən yuxarı təsisçini də aldatdığını deyirlər. Amma nə məsələdirsə, təsisçilərdən heç biri ondan narazılığını bildirmir. Bəzi mətbu orqanlarda Olympus Park tikinti şirkətinin xarakterik fırıldaq piramidası qurduğu, iş adamlarının aldadılaraq sərmayələrinin mənsimsənildiyinə dair məlumatlar da yer alıb. Məlumatda “Olympus park”da piramida şəbəkəsinin başında şirkətin rəhbəri Rafael Qarayevin dayandığı, 40-a qədər ortağı olan Olympus Park şirkətinə tanınmış iş adamlarının aldadılaraq cəlb edildiyi qeyd olunur.
Hətta bir neçə il əvvəl məlum olub ki, R.Qarayevlə iş adamı, “Avesta” Konsernin rəhbəri Hacı İbrahim Nehrəmli arasında ciddi borc qalmaqalı yaşanıb. Belə ki, H.İ.Nehrəmli Bakının Nəsimi rayonunda, “Zabitlər bağı”na yaxın ərazidə yerləşən torpağını R.Qarayevə 10 milyon manata satıb. Pulun bir hissəsini alsa da, 5 milyon manata yaxın vəsaiti uzun müddət ala bilməyib.
İ.Nehrəmli bu məsələ ilə bağlı 2022-ci ildə Demokrat.az-a deyib: “Bəli, həqiqətən də Rafael Qarayev bizə aid olan şirkətin ona satılması üçün müraciət etmişdi. Və belə razılaşdıq ki, şirkətin 50 faizini ona verək. O, ilkin 50 faizin ödənişlərini problemsiz icra etdi. İkinci 50 faizi isə ödəniş olmadan bizdən istədi və kişi sözü verdi ki, pulu vaxtında odəyəcək. Bundan sonra isə onunla əlaqə saxlamaq mümkün olmadı. Telefon zənglərimizə cavab vermədi. İndi də təsisçilərimiz ondan şikayətçidir. Pullarını geri alıb-almayacağı hələ ki sual altındadır. Hamı kimi mən də eşidirəm ki, Rafael Qarayevlə bağlı şikayətlər var, onun çoxsaylı şərikləri ilə olan münaqişəsini mən də eşitmişəm. Amma işin içərisində olmadığım üçün dəqiq bir söz deyə bilmirəm. Ancaq bu cür hərəkətləri iş adamına yaraşdırmıram”.
Daha sonra İ.Nehrəmlinin borcun tələbi ilə R.Qarayevə qarşı məhkəmə iddiası qaldırdığına dair məlumatlar yayılsa da, prosesin nəticəsi açıqlanmadı. Lakin R.Qarayevin özünə qarşı edilən bir dələduzluq işi üzrə məhkəmə prosesi qərarla yekunlaşıb. Belə ki, R.Qarayev Türkiyə səfirliyinin yaxınlığındakı torpaq sahəsini almaq istəyərkən aldadılıb. O, 1 milyon 890 min manatlıq dələduzluğa məruz qaldığını iddia edərək hüquq-mühafizə orqanlarına müraciət edib. İş adamına qarşı dələduzluqda ittiham olunan şəxsin İnam Cəfərov olduğu bildirilir.
Rafael Qarayevin şikayətindən sonra cinayət işi açılıb. İbtidai istintaq zamanı təqsirləndirilən şəxs R.Qarayevin zərərinin 1 milyon 400 min manatını geri qaytarıb. Qalan məbləğə görə tərəflər arasında razılığın olduğu bildirilir.
Təqsirləndirilən şəxsin cinayət işi üzrə məhkəmə istintaqı başa çatıb və ona şərti cəza verilib.
Tanış ssenaridir, deyilmi: Əbülfəz Babayev və onun təsisçisi olduğu şirkətin rəhbərinə qarşı qarşı dələduzluq edənlər dərhal tapılır, məsuliyyətə cəlb olunur, zərərləri qarşılanır. Lakin Olympus Park-ın aldatdığı yüzlərlə vətəndaş, hətta iş adamlarının narazılığına, şikayətlərinə baxan yoxdur. Aydın məsələdir ki, bu imtiyaz nə Ə.Babayevin, nə də R.Qarayevindir – imtiyaz onların arxasında duran V.Gülməmmədovundur. Məhz Hesablama Palatasının geniş səlahiyyətlərinə arxalanan V.Gülməmmədova görə heç kim Olympus Park-ın əməllərini araşdırıb hüquqi qiymət vermək istəmir. Məhz bu himayəyə görə şirkət və ona rəhbərlik edən şəxs jurnalistlərin üstünə qoçu göndərir. Həmin jurnalist isə “Yeni Müsavat”ın əməkdaşı İlkin Muradov idi.
2021-ci ildə şirkətin qanunsuzluqları ilə üzləşən vətəndaşların, iş adamlarının şikayətini araşdıran jurnalistimiz V. Gülməmmədova arxalanan R.Qarayevin başına yığdığı qohumları tərəfindən təhdid olunmuşdu.
Məsələ ilə bağlı ətraflı məlumat bu linkdə: https://www.musavat.com/news/olympus-park-rehberinin-dayisi-oglu-sirketle-bagli-yazilan-yaziya-gore-yeni-musavat-in-emekdasini-hedeledi-foto_829725.html
Olympus Park V.Gülməmmədova arxalanan insanların törətdiyi və cəzasız qaldığı qanunsuzluqların mahiyyətini açan bariz nümunədir. Lakin Hesablama Palatası kimi geniş səlahiyyətlərə malik qurumun rəhbərinin öz mövqeyindən sui-istifadəsinə dair yeganə nümunə deyil.
Musavat.com
