Son dövrlər QHT sektorunda satınalınma, QHT-lərin, habelə müvəqqəti işlətməyə verilmiş QHT-lərin ölkədəki əksər donorların keçirdiyi qrant müsabiqələrində qalib gəldiyinin şahidi oluruq.

Biri QHT satır, digəri QHT icarəyə verir, başqa biri isə donor təşkilatla digər QHT-lər arasında vasitəçilik edir.
Təbii ki, hər bir QHT-nin istənilən qrant müsabiqələrində səmərəli təşəbbüslərlə çıxış edib, qalib olması onun doğal haqqıdır. Lakin, bu sektorda hamı bir-birini gözəl tanıdığı üçün qrantların necə əldə edilməsi də, onların necə reallaşdırılması da çox yaxşı bilinir.
Bu istiqamətdə Yenixeber.org-a ötürülən məlumata görə, bir neçə şəxsin pulla aldığı təşkilat hazırda Elm və Təhsil Nazirliyindən, QHT-lərə Dövlət Dəstəyi Agentliyindən, Gənclər və İdman Nazirliyindən, Gənclər Fondundan, Mədəniyyət Nazirliyindən və bir çox özəl şirkətdən külli miqdarda maliyyə yardımı, qrant alır.
Eləcə də şəxsən tanıdığımız başqa bir şəxs bir nəfərdən ona məxsus QHT-ni müvəqqəti icarəyə götürüb(?) Hər qrant aldığı layihədən təşkilatın qanuni rəhbərinə müəyyən vəsait verir. Bunu qrant aldığı QHT-lərə Dövlət Dəstəyi Agentliyində də, yuxarı təşkilatlar da yaxşı bilir.
Yəqin ki, bu faktları heç kim inkar edə bilməz. Bütün bunlar donor təşkilatların məsuliyyət məsələsi olmaqla yanaşı, yoxlayıcı qurumların keçirdikləri auditlərin səhihliyindən xəbər verir. Onlar yoxlama apardıqları qurumlarda müəyyən sövdələşmələr apararaq, bütün qanun pozuntularını görməzdən gəlirlər.Bir media resursu olaraq, biz bu faktları biliriksə, yoxlayıcı qurumların bunları görməzdən gəlməsi ciddi suallar doğurur.

Bazar olsun…
Bütün bunlar onu göstərir ki, QHT sektoru qanunvericilik çərçivəsində deyil, bazar prinsipləri ilə idarə olunur. Biri QHT satır, digəri QHT icarəyə verir, başqa biri isə donor təşkilatla digər QHT-lər arasında vasitəçilik edir.
Digər bir fakt isə QHT adlarının dəyişdirilməsi ilə bağlıdır. Son vaxtlar xeyli sayda qeyri-hökumət təşkilatı Əmək və Əhalinin Sosial Müdafiəsi Nazirliyi yanında Sosial Xidmətlər Agentliyindən maliyyə yardımı almaq üçün adlarında və nizamnamə məqsədlərində dəyişiklik aparmışdır.
Ailə QHT-ləri isə ayrı bir mövzudur. Bu da faktdır ki, bir ailənin bir neçə üzvü eyni qrant müsabiqələrində qalib ola bilir. Donor qurumlar dildə bunu inkar etsələr də, fakt qrant nəticələrinə dair elanlarda əks olunur.

Bu QHT-lər də, onların patronlarının kimliyi də Yenixeber.org-a ötürülən məlumatlarda yer alır. Müəyyən dəqiqləşdirmələrdən sonra bir-bir adları açıqlayacağıq…Hələlik isə onu bildirək ki, bu sırada sayt rəhbərlərinin adı daha çox hallanır(?)
Bütün bunlar dövlət büdcəsi hesabına həyata keçirilən qrant müsabiqələrində şəffaflıq və qanunçuluq prinsipləri ilə yanaşı, ədalət prinsiplərinin pozulmasıdır. Real problem həlli ilə məşğul olmaq istəyən QHT-lər kənarda qalır, kimlərinsə icarəyə götürdükləri və ya satın aldıqları QHT-lər müsabiqə qalibləri olurlar.

QHT-lərə Dövlət Dəstəyi Agentliyinin icraçı direktoru Aygün Əliyeva isə hər şeyin, hər zaman belə də davam edəcəyini düşünür kimi görünür…Hələ ki, ona bir "DUR" deyən tapılmır. Hələ ki,…

Mövzu ilə bağlı araşdırmalarımız davamlı olacaq.

Yenixeber.org