Naxçıvan şəhərində bir məhəllə var ki, taksilər belə oraya girməkdən imtina edir. Yağış yağanda küçələr çaya çevrilir, yayda isə tozdan evdə nəfəs almaq olmur.
Şəhərin kənarında yerləşən Nəcməddin Naxçıvani küçəsindəki “Çuxur” adlanan bu məhəllə illərdir eyni vəziyyətdədir.
Adından da göründüyü kimi, məhəllə şəhərdən xeyli aşağıda yerləşir və bütün yağış, sel suları birbaşa buraya axır. Asfalt olmadığı üçün yollar palçıq içində qalır, yayda isə toz-torpaq sakinlərin həyatını dözülməz edir.
Sakinlərin “Gündəlik Naxçıvan”a bildirirdiklərinə görə, vəziyyət o qədər ağırdır ki, artıq taksi sürücüləri belə bu məhəlləyə gəlməkdən imtina edirlər:
“Küçələrin abadlaşmağa, asfaltlanmağa ehtiyacı var. Hər yer bərbaddır. Yayda toz-torpaqdan həyətdə oturmaq, yağış yağan kimi isə palçıqdan yerimək mümkün olmur. Taksi çağırırıq gəlmir. Məhəllənin adını eşidən kimi imtina edirlər. Deyirlər ki, yollar bərbaddır. Oraya yenib, qalxmaq çətindir.”
Sakinlər iddia edirlər ki, illərlə şəhər İcra Hakimiyyətinə müraciət etsələr də, heç bir dəyişiklik baş verməyib.
Hər dəfə “tender elan olunacaq”, “yol təmir ediləcək” kimi vədlər verilir, lakin sonradan heç nə həyata keçirilmir:
“Dəfələrlə aidiyyətı qurumlara müraciət etmişik. Hər il tender elan olunduğun, problemin həll olunacağını deyirlər. Lakin ortada nəticə olmur. Tender elan olunduğunu deyib, sakinləri sakitləşdirilər. Yalnız şəhərin görünən yerlərini abadlaşdırırlar. Kənar məhəllələrə isə baxan yoxdur.”
Sakinlərin sözlərinə görə, bu vəziyyət təsadüfi deyil və yol təmiri üçün ayrılan vəsaitlər illərdir mənimsənilir:
“Biz məsələni ictimailəşdirərək, aidiyyəti qurumlardan hesabat tələb edirik. Qoy açıqlama versinlər görək, bu günə qədər vəsait ayrılıbmı, ayrılıbsa, vəsait hara xərclənib. Ayrılmayıbsa, hansı səbəbdən ayrılmayıb, bunu desinlər. Bu yolla yol təmit-tikintisi üçün pulları mənimsəyirlər.”
