Bakının mərkəzindəki “Bayırşəhər məhəlləsi” adlanan ərazidə - “Təzə Pir” məscidinin ətrafında söküntülər davam edir. Söküntü prosesi sakinlərin narazılığı ilə müşayiət olunur.

Sakinlərin bir qismi bu ərazidəki söküntünü “Bakının tarixinin silinməsi” kimi dəyərləndirir. Onlar bildirir ki, oradakı binaların bir çoxu tarixi-memarlıq abidələridir. Bu səbəbdən ümumiyyətlə, evlərini tərk etmək istəmirlər.

Sakinlərin bir hissəsi isə onlara təklif olunan kompensasiyanın azlığına etiraz edir. Onlara evlərinin hər kvadrat metrinə görə 2700 manatdan kompensasiya təklif olunur. Bildirirlər ki, ömür boyu Bakının mərkəzində yaşadıqları halda, təklif olunan məbləğə nəinki mərkəzdə, hətta nisbətən yaxın ərazilərdə də ev almaq mümkün deyil. Qeyri-yaşayış sahələrinin (obyektlərin) sahiblərinə isə kvadrat metrə görə 3000 manat pul təklif edilir.

Ərazidəki söküntü Bakı Şəhər İcra Hakimiyyətinin başçısı Eldar Əzizovun sərəncamı əsasında həyata keçirilir. Sərəncama əsasən, Azərbaycan prospekti ilə Mirzə Fətəli Axundov, Nizami və Mirzağa Əliyev küçələri arasında qalan ərazi sökülməlidir. 6 aydır ki, sərəncamın icrası başlayıb.

Sakinləri narazı salan məqamlardan biri də alınmış evlərin söküntüsü zamanı ətrafdakı mənzillərin su, qaz xətlərinin sıradan çıxarılması, evindən çıxmaq istəməyən vətəndaşların dözülməz şəraitdə yaşamağa məcbur edilməsidir.

Bizimyol.info xəbər verir ki, dekabrın 1-də Vidadı küçəsi 52 ünvanında söküntü işləri aparılarkən sakinlərlə Bakı şəhər İcra Hakimiyyətinin nümayəndələri, eləcə də söküntünü icra edən şəxslər arasında problem yaşanıb. Sakinlər həyətdə söküntü aparılmasına etiraz edib, qaz xəttinin sıradan çıxdığını bildiriblər: “Biz yaşaya-yaşaya həyəti sökürlər, insanların mülkiyyətində olan şkafları sındırırlar. Bütün bu proseslərə də Zülfəli adlı şəxs (Bakı Şəhər İcra Hakimiyyətinin şöbə müdiri Zülfəli İsmayılov) rəhbərlik edir. Dövlətin qayda-qanunu sənədlə olur. Heç bir sənəd göstərmədən söküb-dağıdırlar”.

Memar Abdul Hüseynov bildirib ki, təkcə ora deyil, “Bayırşəhər”dəki başqa ünvanlarda da həyətlərdə bütün sakinlərlə razılaşma olmadığı halda, söküntü aparılır. Məsələn, iki gün əvvəl Vidadi küçəsi 40 ünvanında sakinlərin hamısı ilə alqı-satqı edilmədiyi halda, 2019-cu ildə Bakı Abadlıq xidməti tərəfindən əsaslı təmir olunmuş ina dağıdılıb.

“Bayırşəhər” sakinlərindən Zahidə Əzizova deyir ki, partladılan borulardan bir aya yaxındır ki, içməli su axır. Bu israfçılığın qarşısı alınmır: “Evini satmayanlarla qəddarcasına davranırlar, su, qaz, işıq, internet üzünə həsrət qoyurlar. Hətta “Azərsu” cəsarət edib, suyun axıdılmasınin qarşısını almaq istəmir. Bir aya yaxındır ki, içməli su axır”.

Qeyd edək ki, 31 narazı sakin Bakı şəhər İcra Hakimiyyətinə qarşı məhkəmədə iddia qaldırıb. Onlar “Bayırşəhər”in sökülməsi barədə sərəncamın ləğvini tələb edirlər.

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, söküntü ərazisindəki tarixi abidələr qorunacaq.

“Təzə Pir” ətrafında sökülən tikililərin yerində isə park salınacaq. O da Mərkəzi Parka birləşdiriləcək.