"BÖYÜKXANIM TALIBOVANIN teatrlara yerləşdirdiyi ona doğma, yaxın kadrlar barədə danışacağımı demişdim. Elə birincisini Dövlət Kukla Teatrının gözəl rejissoru və ziyalı xanım Səidə Haqverdiyeva yazdı. Amma nazirlikdən heç bir reaksiya olmadı. Bu isə o deməkdir ki, “gedin, hara istəyirsiniz şikayət edin”. Ona görə də bu barədə yenidən xatırlatma edirəm ki, cənab Nazir bu məsələni bilsin..." "DİA-AZ" xəbər verir ki, bunu özünün sosial şəbəkə hesabında əməkdar artist Mehriban Xanlarova qeyd edib.

O daha sonra bildirir:

"Deməli, vəziyyət belədir: Böyükxanım yəni Bella xanım, Akademik Musiqili Teatr kimi ciddi bir dövlət müəssisəsində uzun illər təcrübəsi və beynəlxalq titulları olan Mübariz Həmidovu menecer vəzifəsindən uzaqlaşdırıb. Və onun yerinə… heç bir teatr təhsili olmayan, bir gün belə teatrda işləməyən, evdar bacısı Sona xanımı “menecer” kimi gətirib.

Bu artıq sadəcə nepotizm deyil, peşəkarlığın ayaqlar altına atılması və mədəniyyətə qarşı açıq-aşkar hörmətsizlikdir. Bütün teatr kollektivi də haqlı olaraq mat-məəttəl qalıb: “Evdar bir xanım birdən-birə dövlət teatrının meneceri necə olur?” Cavab isə çox sadədir Böyükxanımın şəxsi iradəsi ilə. Başqa heç bir izahı yoxdur. Peşəkarları kənara atıb, ailə üzvlərini vacib postlara oturtmaq idarəçilik deyil, özbaşınalıq, şəxsi təsir dairəsinin genişləndirilməsi və dövlət mədəniyyət siyasətindən sui-istifadədir.

Teatr meneceri yaradıcı kollektivin taleyinə cavabdeh şəxsdir. İndi isə bu taleyi, təcrübəsi sıfır olan birinə tapşırıblar. Bu teatr deyil, eksperiment laboratoriyasıdır. İnsanların taleyi, sənətin səviyyəsi, dövlətin ad-sanı bir nəfərin şəxsi “istəklərinə” qurban verilir. Bu addımın özü bir mesajdır: “Peşəkarlıq lazım deyil, qohum olmağınız bəs edir.”

İkincisi, elə həmin teatrda fotoqraf kimi işə götürülən, Bella xanımın çox yaxın rəfiqəsinin oğlu, universiteti də Bella xanımın köməyi ilə bitirən Tehran adlı şəxsi gətirib TEATR SEKTORUNA yerləşdiriblər. Və qəribəsi budur ki, fotoqraf olsa da, indi bütün teatrlara Mədəniyyət Nazirliyindən gedən göstərişləri məhz bu Tehran adlı şəxs verir. Bəli, teatr sektorunu bu gün dövlət qulluqçusu olmayan “qulluqçular” idarə edir.

Bella xanımın da Fərəh Əliyeva kimi özünə məxsus “mələkləri” var. Bu barədə ayrıca paylaşım edəcəyəm..."