Azərbaycan Respublikasi Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsi 15.12.2025-ci ildə “SİMPLEX” QSC ilə odun yanacağının satınalınması üzrə birmənbədən satınalma metodu tətbiq etməklə 1.055.628 manat dəyərində satınalma müqaviləsi bağlayıb. Müqavilənin icra müddəti 31.10.2025 -30.12.2025-ci il müəyyən edilib.
Bundan əlavə Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsi də birmənbədən satınalma metodu tətbiq etməklə odun yanacağının satınalınması üzrə Azərbaycan Respublikası Ekologiya və Təbii Sərvətlər Nazirliyi yanında Meşələrin İnkişafı Xidməti ilə 972.525 manat dəyərində satınalma müqaviləsi bağlayıb. Məlumat satınalmaların portalında 28.11.2025 -ci ildə dərc edilib.
Satınalmaların portalında dərc edilmiş məlumatlarda tenderin başlanma müddəti 30.09.2025-ci il, bitmə müddəti 30.12.2025-ci il göstərilir. Buradan sual yaranır. Sentyabr ayının 30 başlayan tender üzrə müqavilə niyə iki ay sonra bağlanır? Yaxud da sentyabr ayında bağlanmış müqavilə portalda niyə iki ay sonra, 28.11.2025 -ci ildə dərc edilir?
Qeyd edək ki, Elm və Təhsil Nazirliyinin Təsərrüfat Hesabli Əsasli Tikinti Və Təchizat İdarəsi odun yanacağının daşınması xidmətinin satınalınması üzrə birmənbədən satınalma metodu tətbiq etməklə “Qala Express” MMC ilə 1.560.550 manat dəyərində satınalma müqaviləsi bağlayıb. Müqavilənin icra müddəti 31.10.2025 -30.12.2025-ci il müəyyən edilib.
Satınalmaların portalında dərc edilmiş bu məlumatlardan göründüyü kimi Əsasli Tikinti Və Təchizat İdarəsi cari il oktyabr-noyabr aylarında odun yanacağının satınalınması üzrə birmənbədən satınalma metodu tətbiq etməklə ümumi dəyəri 2 028 153 manat məbləğində iki satınalma müqaviləsi bağlayıb. Həmin odunların daşınması xidmətinə isə 1.560.550 manat xərcləyəcək.
Buradan ortaya suallar çıxır. Nazirliyin Əsasli Tikinti Və Təchizat İdarəsi odun yanacağının daşınması xidmətini nə üçün elə yanacağı aldığı təşkilatın, yaxud şirkətin üzərinə qoymayıb? Bu daha ucuz başa gəlməzdimi? Məsələn, elə ETSN-nin Regional İdarələrinin texnikaları ilə. Yaxud da regionlarda yük daşıma xidməti göstərən fiziki şəxslərlə müqavilə bağlansa daha ucuz başa gəlməzdimi?
Qeyd edək ki, “SİMPLEX” QSC-nin fəaliyyət sahəsi bəlli deyil. QSC yalnız dekabr ayında Elm və Təhsil Nazirliyinin Əsasli Tikinti Və Təchizat İdarəsi ilə ümumi dəyəri 17 709 007 manat olan 6 satınalma müqaviləsi bağlayıb. “Məktəblinin dostu” layihəsi üzrə tədbirlərin keçirilməsi üçün malların satınalınması üzrə 386.624,35, noyabr ayında keçiriləcək bir sıra tədbirlərin təşkili ilə əlaqədar xidmətlərin satınalınması üzrə 4.906.519,77 manat, ümumtəhsil müəssisələrinə “maşın və avadanlıqlar” xərc maddəsi üzrə bir sıra malların satınalınması üzrə 7.426.836,17 manat, təhsil müəssisələrinə alternativ yanacaq vasitələrinin satınalınması üzrə 3.634.400 manat, okytabr ayında keçiriləcək bir sıra tədbirlərin təşkili ilə əlaqədar xidmətlərin satınalınması üzrə 299.000 manat dətyərində.
Göründüyü kimi “SİMPLEX” QSC Elm və Təhsil Nazirliyinin Əsasli Tikinti Və Təchizat İdarəsinə həm tədbirlərin keçirilməsi üçün mallar satır, həm də tədbirlərin təşkili ilə əlaqədar xidmətlər göstərir. Həm də qurumu odun və alternativ yanacaqla təmin edir. Bu isə o deməkdir ki, “SİMPLEX” QSC konkret odun təchizatçısı deyil və Əsasli Tikinti Və Təchizat İdarəsinin birmənbədən satınalma metodu ilə bağladığı müqavilə əsassızdır.
Bu məlumatlardan da göründüyü kimi rayonlarda orta ümumtəhsil məktəblərinin qızdırılması üçün Elm və Təhsil Nazirliyi tərəfindən külli miqdarda vəsaitlər ayrılır. Amma sosial şəbəkələrdə və elektron media resurslarında kənd sakinlərinin orta məktəblərdə uşaqların soyuqdan dönması, direktorlar tərəfindən odun pulu tələb olunması barədə kifayət qədər şikayətlərə rast gəlinir. Şikayətçilər bir çox kəndlərdə məktəblərin gün ərzində bir-iki saat qızdırıldığını iddia edir, odun yanacağına pul çatdıra bilmədiklərindən soyuq sinif otaqlarında uşaqlarının xəstələndiyini bildiriblər. Ortaya sual çıxır. Təhsil Nazirliyinin bu rayonlardakı orta məktəblərin qızdırılması üçün ayırdığı milyonlarla manat dövlət vəsaiti hara gedir?
Elm və Təhsil Nazirliyi tərəfindən kənd məktəblərinin isidilməsi məqsədi ilə odun yanacağının alınması üçün keçirilmiş tenderlərin dövlət vəsaitinin kənarlaşdırılması hallarına yol verildiyi açıq-aşkar görsənməkdədir. Burada quru odun yanacağının qiymətləri ya gizlədilir və yaxud da çox yüksək yazılır. Alınan odun yanacağının harada yandırıldığı isə sual altındadır. Hər kəsə bəllidir ki, rayon mərkəzlərindəki məktəblərin böyük əksəriyyəti qazanxanalar vasıtəsi ilə isidilıir. Kənd məktəbləri isə hələ də valideynlərdən toplanan pullar hesabına odun yanacağı almağa məcbur olurlar.
Qeyd edək ki, ölkədə təhsil müəssisələrinin ictiliklə təmin olunması məqsədi ilə keçirilmiş daha bir tender də diqqətimizi çəkdi. Belə ki, Elm və Təhsil Nazirliyinin Abşeron – Xızı Regional Təhsil İdarəsi ümumtəhsil məktəbləri, uşaq bağçaları və körpələr evlərinin binalarının istiliklə təmin olunması üzrə F.H.Abbasova və E.M.Abbasovun tam ortaqlı “Mahmud” Kəndli Fermer Təsərrüfatı ilə bir mənbədən satınalma metodu tərbiq etməklə 1.606.829,28 manat məbləğində satınalma müaviləsi bağlayıb.
Məlum olduğu kimi Abşeron – Xızı Regional Təhsil İdarəsinin tabeliyinə Abşeron, Xızı rayonlarında və Sumqayıt şəhərindəki ümumtəhsil məktəbləri, uşaq bağçaları və körpələr evləri daxildir. Göründüyü kimi Elm və Təhsil Nazirliyi Abşeron – Xızı Regional Təhsil İdarəsinin tabeliyinə ümumtəhsil məktəblərinin istiliklə təmin olunmasına 1 milyon altı yüz min, amma ölkə üzrə yeri, ünvanı bəlli olmayan məktəblərin isidilməsinə 2 milyon manat vəsait ayırıb.
Qeyd edək ki, elektron mediada bu yaxınlarda ümumtəhsil məktəblərinin istiliklə təmin olunması ilə bağlı daha maraqlı bir məlumatı təhsil eksperti Elşən Qafarov açıqlamışdı. Ekspert, Salyanda baş verən son hadisənin (şagirdlərin tüstüdən zəhərlənməsi) pellet sobalarının məktəblərə qeyri-standart şəkildə quraşdırıldığını üzə çıxardığını vurğulayıb. Korrupsiya İddiaları: “Sobalar Elm və Təhsil Nazirliyinin yaxın adamlarının qeyri-rəsmi sexlərində (kustar sexlərdə) hazırlanır. Həmin sexlərdə hazırlanan və bazarda təxminən 50 manat dəyəri olan sobalar məktəblərə 350 manat qiymətlə sənədləşdirilərək quraşdırılıb. Sobaların texniki təhlükəsizlik baxımından ciddi problemlərə malik olması ilə yanaşı, istifadə olunan pellet yanacağı da keyfiyyətsizdir.”
Qeyd edək ki, bu gün respublikada kənd məktəblərinin qızdırılması valideynlər tərəfindən toplanan vəsaitlər hesabına həyata keçirildiyi heç kimə sirr deyil. Amma dövlətin bu məqsədlərlə ayırdığı milyonlarla manat vəsaitin haralara getdiyi bir sirr olaraq qalmaqdadır.
Aktualinfo.net
