Hüseynov Murad Fizuli oğlu Yevlax rayonu Hacıselli kəndindəki Ə.Yolçuyev adına tam orta ümumtəhsil məktəbində coğrafiya fənni üzrə müəllim işləyir. Həmçinin məktəbdə fəaliyyət göstərən “Təbiətə qayğı” dərnəyinin rəhbəridir. Murad 44 günlük Vətən Müharibəsi başlayanda könüllü olaraq cəbhəyə gedib, torpaqlarımız uğrunda döyüşərək yaralanıb. 3-cü qrup müharibə əlili və qazidir. Vətən Müharibəsi medalları ilə təltif olunub.
Murad Hüseynov redaksiyamıza müraciət edərək Azərbaycan Respublikası Elm və Təhsil Nazirliyinin Aran Regional Təhsil İdarəsinin Yevlax Şəhər Təhsil Sektorunun əməkdaşı və məsləhətçisi Fərid Nağızadə və onun müdiri Namidə Abbasovadan şikayətçi olduğunu bildirir. O, bu barədə 30 dekabr 2025-ci il tarixində Azərbaycan Respublikasının Prezidenti cənab İlham Əliyevə, 1-ci Vitse Prezident Mehriban xanım Əliyevaya, Baş Prokuror Kamran Əliyevə, elm və təhsil naziri Emin Əmrullayevə, Ombudsman Səbinə xanım Əliyevaya müraciət edib.
Şikayətçi bildirir ki, 22 dekabr 2025-ci il 15:37 radələrində dərs zamanı onun mobil telefonuna zəng olunub. Zəng edən Yevlax Şəhər Təhsil Sektorunun əməkdaşı, metodist Yeganə Məmmədova olduğunu bildirib. Yeganə xanım dərsdən sonra təşkil olunan, Murad müəllimin rəhbəri olduğu “Təbiətə qayğı” dərnəyinin fəaliyyəti, dərnəkdə şagirdlərin iştirak edib-etməməsi, həqiqətən dərnəyin təşkil olunub-olunmaması və hansı formada olması barədə monitorinq keçirmək istədiyini bildirib. Bu vaxt təhsil sektoru müdiri vəzifəsini müvəqqəti icra edən, həmin sektorun əməkdaşı və məsləhətçisi Fərid Nağızadə mobil telefonu Yeganə Məmmədovadan alaraq rişxəndlə “bunun adı nədir?” soruşub. Dövlət qulluqçularının etik davranış qaydalarına uyğun olmayan bir formada, özünü təqdim etmədən müəllimə qarşı kobud sözlər işlədib. Monitorinq zamanı WhatsApp-la görüntülü danışanda şagirdlərin eşidəcəyi tərzdə Murad Hüseynova qarşı səs tonunu qaldırıb, işçinin işgüzar nüfuzunu, şərəf və ləyaqətini alçaldıb. Şagirdlərinin yanında kobud rəftara, psixoloji təzyiqə və təhqirə məruz qalan Murad Hüseynov bu söhbətdən sonra çox sarsılıb. Bunun nəticəsi olaraq hazırda da Mingəçevir Şəhər Xəstəxanasında müalicə alır.
Fərid Nağızadə ilə telefon danışığı zamanı Murad müəllim ona kobudluq etməməsi barədə dəfələrlə xəbərdarlıq etməsinə baxmayaraq Fərid Nağızadə yenə sözlərinə ara verməyərək şagirdlərinin yanında, məktəbdə olan pedaqoqa “siz” əvəzinə “sən” deyərək kobudluğunu davam etdirib. Çarəsizlikdən müəllim dərs otağından dəhlizə çıxıb, qarşı tərəfdən xahiş edib ki, danışığına diqqət etsin. Yenə də xeyri olmayıb. Fərid Nağızadə “sözün varsa, Yevlaxa gəl, sözünü üzümə de”, “sən mənimlə nə qanunla danışırsan, mən də səninlə qanunla elə danışaram” kimi hədələyici ifadələr işlətməklə həm də Murad Hüseynovu təxribata çəkmək istəyib.
Halbuki, “Dövlət qulluqçularının etik davranış qaydaları haqqında” Azərbaycan Respublikasının Qanununs əsasən dövlət qulluqçusu şəxsin, cəmiyyətin və dövlətin maraqları naminə öz vəzifə borcunu səmərəli yerinə yetirməyə borcludur. O, hər bir şəxs üçün vicdanlılıq nümunəsi olmalı, fəaliyyətini qanunvericiliyə uyğun müəyyən olunmuş səlahiyyətlər çərçivəsində və peşəkarlıq səviyyəsində yerinə yetirməlidir.
Dövlət qulluqçusu dövlət qulluğu ilə bağlı vəzifələrin icrası ilə bir araya sığmayan və onun adına xələl gətirə biləcək, habelə dövlət orqanının nüfuzunu aşağı sala biləcək hərəkətlərə yol verməməli, bütün şəxslərə, o cümlədən birbaşa və yuxarı rəhbəri ilə və ya tabeliyində olan şəxslərə münasibətdə nəzakətli, xeyirxah, diqqətli və səbrli olmalıdır.
Həmçinin, qeyd edilən Qanunun 23.1-ci maddəsinin tələbinə görə etik davranış qaydalarının pozulması dövlət qulluqçusunun intizam məsuliyyətinə cəlb edilməsi üçün əsasdır.
Lakin Yevlax Şəhər Təhsil Sektorunun məsləhətçisi Fərid Nağızadə “Dövlət qulluğu haqqında” və “Dövlət qulluqçularının etik davranış qaydaları haqqında” Azərbaycan Respublikası Qanunlarının müddəlarına əməl etməyərək öz vəzifə səlahiyyətlərini aşıb, tabeliyindəki işçiyə qarş dövlət qulluqçusuna yaraşmayan hərəkətlərə yol verib.
Şikayətçi Hüseynov Murad Füzuli oğlu deyir ki, Yevlax şəhər Təhsil Sektorunun məsləhətçisi və əməkdaşı olan Fərid Nağızadənin telefonda yüksək tonla, əmr formasında danışığı, ünvanına təhqiredici sözlər işlətməsi onun bir Vətən Müharibəsi qazisi və əlili kimi əsəb gərginliyindən səhhətində ciddi problemlərin yaranmasına, təzyiqinin kəskin yüksəlməsinə gətirib çıxarmışdır ki, nəticədə 22 dekabr 2025-ci il tarixində saat 17:49 radələrində Mingəçevir şəhər Təcili Tibbi Yardımçı bölməsinə yüksək qan təzyiqi, şiddətli baş ağrısı şikayəti ilə daxil olub. Bununla bağlı Mingəçevir şəhər Mərkəzi Xəstəxanasının Təcili Tibbi Yardım bölməsi tərəfindən 22 dekabr 2025-ci il tarixində Hüseynov Murad Füzuli oğluna təcili yardım göstərilməsinə dair 23 dekabr 2025-ci il tarixində arayış verilib. Həmin gün evə buraxılsa da səhhəti yenə pozulduğuna görə 22:56-radələrində və 23 dekabr 2025-ci il tarixində 11:11radələrində eyni şikayətlərlə yenidən təcili tibbi yardıma müraciət etməli olub. Təcili Tibbi Yardımda tədbirlər görüləndən sonra ona stasionar şəkildə müalicə almaq tövsiyə olunub. Hazırda Murad Hüseynov Mingəçevir Şəhər Xəstəxanasının Nevrologiya şöbəsində stasionar müalicə alır.
Murad Hüseynov səhhətinin bu cür təhlükəli vəziyyətə düşməsində Yevlax Şəhər Təhsil Sektorunun məsləhətçisi və əməkdaşı Fərid Nağızadəni günahkar görür. Dövlət qulluçusuna zidd olan hərəkətləri və nalayiq, kobud ifadələri ilə tabeliyindəki şəxsin işgüzar nüfuzuna, şərəf və ləyaqətinin alçaldılmasına yəqin aidiyyatı orqanlar qanun çərçivəsində qiymət verərlər. Fərid Nağızadə əməkdaşının Vətən Müharibəsi iştirakçısı olması ilə fəxr etməlidir. Əvəzində isə belə bir şəxsi təhqir edir. Od-alov içindən çıxmış insanı təhqir edir. Bu adam ölümü göz önünə alıb könüllü olaraq döyüşə atılıb. Belə oğullar olmasa, görəsən Fərid Nağızadə kimi məmurcuq danışa bilərdi? Görəsən onun başbilənləri bu məsələ barədə niyə bir söz demir, niyə susurlar? Sektor müdiri Namidə Abbasovanın niyə səsi çıxmır? Onun özbaşınalığı haqqında dəfələrlə yazılıb. Heç bir tədbir görülməyib. İndi də yəqin hansısas sehrli əl bu hadisəni idarə etməyə çalışacaq. Murad müəllimin dediyinə görə artıq Namidə xanım hərəkətə başlayıb, onun Yevlax Təhsil Sektorunun qanunsuz əməlləri, Fərid Nağızadənin özünü apara bilməməsi barədə qeydləri sildirmək istəyir. Murad Hüseynov onun sağlamlığında, həyatında, pedaqoji fəaliyyətində yaranmış bütün əngəllərə görə birbaşa Namidə Abbasovanın məsuliyyət daşıdığını bildirir. Deyir ki, əvvəllər də sektor müdiri Namidə Abbasova ona qarşı pis rəftar göstərmiş, müharibə iştirakçısı, qazi, əlil olduğunu bilə-bilə dərs saatlarını azaltmış, məvacibini kəsmişdir. Bu əməli ictimailəşdirildikdən sonra məcbur olub hər şeyi bərpa etmişdi. İndi də eyni tərzdə davam edir. Özü kimi qanun pozucularını himayə edir.
Ümud edirik ki, Vətənimizi, Millətimizi müdafiə etmiş, indi isə vətən övladlarının təhsili ilə məşğul olan bir insanı maddi və mənəvi təzyiqlərə məruz qoyan harın kreslo sahiblərinə qanunun və dövlətin gücü hiss etdiriləcək.
Sima Babayeva - referans.az
