Son aylarda Qaradağ Rayon İcra Hakimiyyətində baş verən korrupsiya qalmaqalı fonunda rayonun icra başçısı Süleyman Mikayılovun mart ayında vəzifəsindən azad ediləcəyi ilə bağlı iddialar yayılmaqdadır. Məsələ ilə bağlı hələlik rəsmi qərar açıqlanmasa da, hökumətə yaxın mənbələrdə bu istiqamətdə müzakirələrin getdiyi bildirilir.

Xatırladaq ki, təxminən iki ay əvvəl Qaradağ Rayon İcra Hakimiyyətində bir sıra vəzifəli şəxslər barəsində korrupsiya faktları üzrə saxlanılmalar həyata keçirilmişdi. Saxlanılanlar arasında Qaradağ Rayon İcra başçısının müavini Nadir Muradov, Rayon təsərrüfatı şöbəsinin baş məsləhətçisi Qafar Abdullayev, Əmlak Məsələləri Dövlət Xidmətinin Dövlət Əmlakının idarə edilməsi və səmərəli istifadəsinə nəzarət şöbəsinin rəis müavini Zülfüqar Mansurov Binəqədi rayon Məhkəməsinin qərarı ilə 3 ay 28 gün müddətinə həbs edilib. Həmçinin Sülüeyman Mikayılovun ən çox etibar etdiyi şəxslərdən biri köməkçisi Rəşad Umudov da saxlanılanlar arasında olub və başçısın köməkçisi ev dustaqlığına buraxılıb.

Məlumatlara görə, istintaq çərçivəsində maliyyə maxinasiyaları, dövlət vəsaitlərinin mənimsənilməsi və səlahiyyətlərdən sui-istifadə halları araşdırılıb. Həmin həbslər cəmiyyətdə ciddi rezonans doğurmuş, icra strukturlarında sistemli korrupsiya ehtimalları ilə bağlı sualları gündəmə gətirmişdi.

Rəsmi qurumlar istintaqın detallarını tam açıqlamasa da, saxlanılan şəxslərin bir qisminin icra hakimiyyətinin müxtəlif şöbələrində rəhbər vəzifələrdə çalışdığı bildirilirdi.

Qeyd edək ki, icra başçı Mikayıl Süleymanov həbs olunanlarla 15 ildən artıq birlikdə çalışıb və həmin şəxslər Sülüeyman Mikayılovun komandasının nüvəsini təşkil edib. Mediada və sosial şəbəkələrdə də yayılan məlumatlarda korrupsiya işi üzrə saxlanılan məmurların birbaşa və ya dolayı yolla icra başçısı Süleyman Mikayılovun yaxın çevrəsinə aid olduğu iddia edilir. Bildirilir ki, uzun müddət eyni kadrların vəzifədə saxlanılması, nəzarət mexanizmlərinin zəifliyi və maliyyə proseslərinə effektiv nəzarətin olmaması bu cür halların baş verməsinə zəmin yaradıb. Həmçinin mətbuat və sosial şəbəkələrdə Sülüeyman Mikayılovun komandasının cinayət tərkibli fəaliyyətindən xəbərsiz olmadığı da ifadə edilib.

Bununla belə, Süleyman Mikayılovun korrupsiya əməllərində birbaşa iştirakına dair hər hansı məhkəmə qərarı və ya rəsmi ittiham mövcud deyil. Buna baxmayaraq, Sülüeyman Mikayılovun istintaqa ifadə verməsi haqqında mətbuatda məlumat yayılıb.

Qeyd edək ki, baş verənlər fonunda Qaradağda kadr dəyişiklikləri qaçılmaz görünürdü və ona görə də Novruz bayramına qədər icra başçısı ilə bağlı qərarın verilməsi ehtimalı yüksəkdir. İddia olunur ki, Qaradağ rayonuna başçı vəzifəsinə bir neçə namizədin müzakirəsi aparılır və onların arasında Bakı şəhər İcra Hakimiyyətinin başçısı Eldar Əzizova yaxın olan şəxs də var.