Məmməd Məmmədovun rəhbərlik etdiyi Tovuz Rayon İcra Hakimiyyəti tərəfindən rayon ərazisində il ərzində keçiriləcək anım günləri, hüzn mərasimləri, dövlət və peşə bayramları ilə əlaqədar tədbirlərin təşkili məqsədilə satınalma elan edilib.

32gun.az xəbər verir ki, satınalmanın ehtimal olunan ümumi dəyəri 235.512,30 AZN təşkil edir.

Tender sənədlərinə əsasən, tədbirlərin təşkili çərçivəsində müxtəlif növ atributların və ləvazimatların alınması, eləcə də şəhərin bəzədilməsi nəzərdə tutulur. Satınalma predmeti olduqca genişdir və aşağıdakı əsas istiqamətləri əhatə edir:

Müxtəlif ölçülərdə dövlət bayraqları (0.5x1, 0.75x1.5, 2x4, 6x12 ölçülərdə, raşel parçadan),

Bayraq dirəkləri (taxta materialdan),

Təşəkkürnamələr və çərçivələr,

Suvenir məhsulları – qol saatları (smart və ya mexaniki), stolüstü əşyalar, ətirlər,

Bayram günlərinə uyğun döş nişanları,

Dekorativ elementlər və işıqlandırma vasitələri (LED lampalar, işıqlı oyuncaqlar, tor və pərdə işıqlar, dekorativ maral fiqurları, “2026” işıqlı konstruksiyalar və s.),

Tədbirlər üçün çiçəklər – 1.500 ədəd qızılgül, 6.000 ədəd qərənfil və 80 ədəd gül buketi,

Poster və elanlar (UV çapla),

Şəhərin ümumi bəzədilməsi, qurulma və sökülmə işləri, avadanlıqların anbara yığılması və texniki təminat.

Məlumatda qeyd olunur ki, bütün bu xidmət və mallar il ərzində müxtəlif rəsmi və ictimai əhəmiyyətli tədbirlərin təşkili üçün istifadə ediləcək.

Qeyd edək ki, son dövrlər rayon icra hakimiyyətləri tərəfindən bayram və tədbirlərin təşkili ilə bağlı elan edilən satınalmaların məbləği və məzmunu ictimai maraq doğurur.

Xatırldaq ki, sözü gedən icra orqanı 2025-ci il ərzində 3.6 milyonluq tender müqavilələri bağlaması barədə məlumat vermişdik.

Həmçinin qeyd etmişdik ki, eyni profilli işlər bir neçə dəfə ard-arda eyni şirkətə verilib.

"DİA-AZ" əlavə edir ki, eyni məzmunlu tədbirlərə əvvəlki illərlə müqayisədə bu il üçün 15 dəfədən də az vəsaitin xərclənməsi nəzərdə tutulubsa, bu həm də əvvəlki illərdə baş verən korrupsiya faktlarının rəsmi etirafıdır. Tək qalanı bütün bu baş verənlərə hüquqi qiymətin verilməsidir.

Çünki əvvəlki illərlə müqayisədə nəinki qiymətlər ucuzlaşıb, əksinə qat-qat bahalaşıb. Yəni endirim üçün bəhanə yoxdur... Bəlkə də Tovuzun çox hörmətli icra başçısı Məmməd müəllim israrla bildirəcək ki, məsələn, Yeni il şənliyində Şaxta Baba özünün köhnədən alınan paltarları ilə iştirak edəcək, amma bu belə 15 dəfə BAHA GÖSTƏRİLMİŞ rəqəmlərə bəraət üçün zərrə əhəmiyyətindədir....