Ötən gün Azərbaycan Avtomobil Yolları Dövlət Agentliyinin (AAYDA) sədri Saleh Məmmədov vəzifədən azad edilib. Uzun illər bu postda qalan Saleh Məmmədovun fəaliyyəti dövründə agentliyin işi cəmiyyət tərəfindən ciddi tənqid olunurdu.
Xüsusilə paytaxt Bakının kənd və qəsəbə yollarının uzun illər baxımsız vəziyyətdə qalması, bəzi ərazilərdə yolların ümumiyyətlə təmir edilməməsi, regionlarda isə bərbad yol infrastrukturu və artan narazılıqlar onun vəzifədən uzaqlaşdırılmasını qaçılmaz edib. Müşahidəçilərin fikrincə, məhz bu problemlər Saleh Məmmədovun gedişi üçün əsas zəmin yaradıb.
Bütün bunların fonunda Bizimesr.az-a daxil olan məlumata görə, fəaliyyəti vətəndaş narazılığına səbəb olan məmurların vəzifədən uzaqlaşdırılması prosesi davam edəcək. Mənbə bildirir ki, hakimiyyət strukturlarında kadr islahatları növbəti, yeni mərhələyə qədəm qoyub.
Növbəti dəyişiklik AYNA-da...
Bu proses çərçivəsində növbəti kadr dəyişikliyinin Azərbaycan Yerüstü Nəqliyyat Agentliyində (AYNA) baş verə biləcəyi bildirilir. Vətəndaşların ciddi narazılığı ilə üzləşən agentliyin sədri Anar Rzayevin fəaliyyəti cəmiyyətdə geniş müzakirə olunur və qəbul edilmir.
Parking xidmətlərində yaranan problemlər, avtobus marşrutlarında nizamsızlıq, nəqliyyat sistemində davamlı xaos və gündəlik artan şikayətlər AYNA-nın fəaliyyətini daim gündəmdə saxlayır. Vətəndaşlar həm xidmət keyfiyyətindən, həm də tətbiq edilən ödəniş mexanizmlərindən narazıdırlar.
Milyonlar ayrılır, narazılıq azalmaq bilmir
Son bir il ərzində Azərbaycan Yerüstü Nəqliyyat Agentliyinin fəaliyyəti və sədr Anar Rzayevlə bağlı minlərlə narahatedici məlumat ictimai müzakirəyə çıxarılıb. Dövlət büdcəsindən milyonlarla manat vəsait ayrılan, eyni zamanda hər gün vətəndaş ödənişləri hesabına büdcəsini formalaşdıran Agentliyin bu vəsaiti real xidmətin yaxşılaşdırılmasına yönəltmədiyi görünür.
Mənbələrin bildirdiyinə görə, ayrılan vəsaitlərin bir hissəsi xidmət keyfiyyətinə deyil, rəhbərliyin və yaxın ətrafın yüksək əmək haqları və imtiyazlarına sərf edilir. Son yayılan məlumatlara əsasən, AYNA sədri Anar Rzayevin aylıq əmək haqqısının təxminən 20 min manata yaxın olduğu bildirildi. Bu məbləğ Azərbaycanda uzun illər dövlətə xidmət etmiş bir çox yüksək vəzifəli şəxslərin əmək haqqısından bir neçə dəfə artıqdır.
Hakimiyyətin mövqeyi sərtləşir
Müşahidəçilərin fikrincə, ictimai narazılığın bu həddə çatması fonunda yaxın vaxtlarda hakimiyyətin Anar Rzayevlə də yollarını ayıra biləcəyi istisna edilmir. Kadr islahatlarının əsas məqsədinin vətəndaş məmnunluğunun təmin edilməsi və məsuliyyətsiz idarəçiliyin qarşısının alınması olduğu vurğulanır.
Səslənən iddialara qarşı tərəfin mövqeyi açıqdır.
Bizimesr.az
