“Aqrar İnnovasiya və Təchizat” şirkətinin həbsdə olan keçmiş əməkdaşı Elvin Məmmədlinin atası Vilayət Məmmədov yenidən müraciət edərək kənd təsərrüfatı sektorunda dövlət subsidiyalarının mənimsənilməsi ilə bağlı silsilə iddialarını davam etdirib.

Ailə redaksiyamıza müraciəti zamanı Kənd təsərrüfatı məhsullarının (pestisidlər, toxumlar, gübrələr) təchizatçısı Şəmkir rayon sakini, fiziki şəxs Ülviyyə Ənvər qızı, “Zirvə Aqro”, “Amin-Q”, “Aqro servis” şirkətləri, “Rövşənoğlu şirkətlər qrupuna daxil olan “Rövşənoğlu1”, “Rövşənoğlu2”, “Rövşənoğlu3” , eləcə də “AzGübrə”, “TapAgro” , “GübrəAz” şirkətlərinin adlarını xüsusi vurğulayıb.

O, oğlunun 7 illik həbs cəzasını ədalətsiz adlandıraraq, əsl cinayətkar şəbəkənin hələ də azadlıqda olduğunu və dövlət büdcəsini talamaqda davam etdiyini iddia edir.

Onun redaksiyamıza təqdim etdiyi sənədlər, bank çıxarışları və konkret faktlar əsasında onun iddialarını olduğu kimi təqdim edirik:

Mənimsəmə mexanizmi: Fermer kartları necə boşaldılır?

V.Məmmədov iddia edir ki, Elnur Hakdari və onun rəhbərlik etdiyi “TAPAGRO-XRAM AGRO” şirkəti vasitəsilə ölkənin müxtəlif rayonlarında fermerlərə məxsus subsidiyalar qanunsuz yollarla nağdlaşdırılır. Onun sözlərinə görə, bu şəbəkə heç bir mal satışı həyata keçirmədən, yalnız saxta post-terminallar vasitəsilə vətəndaşların kartındakı vəsaiti silir və bunun müqabilində dövlətə saxta hesabatlar təqdim edir. Atanın iddiasına görə, 2020-ci ilə qədər Qubada kiçik bir mağaza sahibi olan Elnur Hakdari, bu qanunsuz yollarla hazırda lüks həyat şəraiti qurub.

Məhkəmə və istintaq prosesləri: Niyə hələ də azadlıqdadırlar?

Şikayətçi bildirir ki, Elnur Hakdari hazırda Bakı Ağır Cinayətlər Məhkəməsində Azərbaycan Respublikası Cinayət Məcəlləsinin 178.4-cü (xüsusilə külli miqdarda dələduzluq) maddəsi ilə təqsirləndirilən şəxs qismində mühakimə olunur. Lakin buna baxmayaraq, o, hələ də azadlıqdadır və fəaliyyətini davam etdirir. Onun sözlərinə görə, eyni şəxslə bağlı Hacıqabul rayon Prokurorluğunda fermer kartlarından 30 min manatlıq vəsaitin mənimsənilməsi ilə bağlı daha bir cinayət işi başlanıb və hazırda Baş Prokurorluq yanında Korrupsiyaya Qarşı Mübarizə Baş İdarəsində istintaq edilir.

Saxta sənədlər və milyonluq yayınmalar

Atanın növbəti iddiası “Yusif” adlı Türkiyə vətəndaşı ilə bağlıdır.

İddia olunur ki, bu şəxs Elnur Hakdari ilə yaxın qohumluq (kirvəlik) əlaqələri quraraq, ona və digər iş adamlarına saxta elektron qaimə-fakturalar təmin edir. Xüsusilə Tural və Turqay Nağızadə qardaşlarına 20 milyon manatlıq saxta sənəd verildiyi və bu yolla külli miqdarda vergidən yayınma halının baş verdiyi iddialar arasındadır.

Hacı Hümbət və “Agro-Kimya” iddiası

O “Hacı Hümbət” ləqəbli Hümbət Həsənov barəsində də şok faktlar səsləndirib. Onun iddiasına görə, əvvəllər yük maşını sürücüsü olan bu şəxs, fermer kartlarındakı dövlət vəsaitini mənimsəmək hesabına İmişli rayonunda böyük obyektlər, yanacaqdoldurma məntəqələri və Bakı şəhərinin Həzi Aslanov qəsəbəsində çoxmərtəbəli yaşayış binaları inşa etdirir. İddia olunur ki, o, bu əməllərini “Agro-Kimya” adlı şirkət vasitəsilə həyata keçirir.

Dövlət strukturlarındakı “dayaqlar”

E.Məmmədlinin atası bəzi vəzifəli şəxslərin də bu şəbəkəyə şərait yaratdığını iddia edir.

O, “AzGübrə” MMC-nin Tovuz rayonu üzrə satış müdiri Habil Cəfərovun və Ağstafa rayon Aqrolizinq idarəsinin rəhbər vəzifəli şəxsi Cavanşir Əmrahovun adını çəkərək, onların öz vəzifə səlahiyyətlərindən sui-istifadə etdiklərini bildirir.

Həmçinin Maliyyə Nazirliyinin əməkdaşı Feyruz Tağıyevin də proseslərdə adı hallandırılır.

Həmçinin onu da bildirir ki Tovuz və ətraf rayonlarda saxta post terminallar vasitəsilə fermer kartlarının silinmesine Feyruz Tağıyev başçılıq edir.. O öz qanunsuz əməllərini qardaşı Çingiz Tağıyev və oğlu Fariz Tağıyev ilə birlikdə edir.

Elvin Məmmədlinin durumu: “Oğlum iki dəfə canına qəsd edib”

Məhbusun atası bildirir ki, oğlu Elvin Məmmədli bütün bu haqsızlıqlara dözməyərək həbsxanada iki dəfə intihara cəhd edib və həkimlərin müdaxiləsi ilə xilas olunub. 2025-ci ilin dekabrında ağır əməliyyat keçirən Elvinin səhhətində ciddi problemlər olduğu, lakin buna baxmayaraq ona təzyiqlərin davam etdirildiyi vurğulanır. O deyir: “Əgər bu qədər cinayət törədənlər azadlıqdadırsa, o zaman mənim oğlum günahsızdır. Onun tək səhvi bu şəxslərə inanmaq olub”.

Təqdim olunan sənədlərdə nədən söhbət gedir ?

Redaksiyamıza təqdim olunan bank çıxarışlarında aydın görünür ki, fermerlərin kartına “subsidiya” adı ilə köçən vəsaitlər (məsələn, 37.95 AZN və 101.75 AZN kimi məbləğlər) bir neçə gün sonra “TAPAGRO-XRAM AGRO” şirkəti tərəfindən “satınalma” əməliyyatı ilə silinib. Atanın iddiasına görə, bu, kütləvi xarakter daşıyır və minlərlə fermerin kartı bu üsulla boşaldılıb.

Vilayət Məmmədov sonda bildirib ki, o və ailəsi haqlı mübarizələrindən vaz keçməyəcəklər və ölkə rəhbərliyindən bu mənimsəmə zəncirinin köklü şəkildə araşdırılmasını tələb edirlər.

 32gun.az